Homielskim pravaabaroncam Sudalenku, Łasicy i Tarasienka prakuror zapytaŭ da troch hadoŭ kałonii
U sudzie Centralnaha rajona Homiela skančajecca praces nad pravaabaroncam Leanidam Sudalenkam i vałanciorkami «Viasny» Taćcianaj Łasicaj i Maryjaj Tarasienka. Usich ich abvinavačvajuć u arhanizacyi i padrychtoŭcy dziejańniaŭ, što hruba parušajuć hramadski paradak (č. 1 art. 342 KK), i navučańni i padrychtoŭcy asobaŭ dla ŭdziełu ŭ takich dziejańniach, a taksama ich finansavańni abo inšym materyjalnym zabieśpiačeńni (č. 2 art. 342 KK). Stała viadoma, jakoje prakurory Jaŭhien Fartušniak i Kirył Vyšniakoŭ zapatrabavali pakarańnie palitviaźniam.
Dla Leanida Sudalenki i Taćciany Łasicy — try hady pazbaŭleńnia voli, Maryi Tarasienka — dva z pałovaj hoda kałonii. Maryja znachodzicca pad padpiskaj ab niavyjedzie, a Leanid i Taćciana — pad vartaj z 18 i 21 studzienia adpaviedna, paviedamlajuć pravaabaroncy.
Usiaho pa kryminalnaj spravie było dapytana kala 200 čałaviek. Pa infarmacyi Leanida, na sudzie byŭ dapytany 61 čałaviek — u asnoŭnym, heta klijenty, jakija źviartalisia da pravaabaroncy pa pravavuju dapamohu:
«Usie śviedki ŭ sudzie skazali praŭdu, i heta hałoŭnaje. Pryjemna čuć, jak ludzi, jakija prychodziać u sud pa pozvach, kažuć «dziakuj», źviartajučysia da mianie ŭ kletku. I heta niahledziačy na zaŭvahi suda».
Nahadajem, Leanid Sudalenka z 18 studzienia znachodzicca pad vartaj u SIZA. U izalatary z 21 studzienia taksama ŭtrymlivajecca Taćciana Łasica. U dačynieńni da Maryi Tarasienka abranaja miera strymańnia ŭ vyhladzie abaviazacielstva ab jaŭcy i padpiski ab niavyjeździe.
Jak raspavioŭ u svaich listach pravaabaronca «Viasny», u vinu jamu stavicca:
- epizod z drovami, jakija Leanid pryvioz dzieciam z šmatdzietnaj siamji, baćku jakoj potym asudzili za «biesparadki»;
- videa na jutubie, dzie pravaabaronca tłumačyć błohieru Andreju Pavuku, što takoje pratest ludziej;
- zaklik u sacyjalnych sietkach sustreć ź IČU žycharku Homiela Maryju Tulžankovu paśla 15 sutak;
- sieminar pa ličbavaj biaśpiecy dla pravaabaroncaŭ;
- apłata štrafaŭ, pošlin za zvarot u sud i dapamohu advakataŭ.
Kamientary