Paŭsiudnyja kamiery nazirańnia i sistemy identyfikacyi pa tvary. Jak ličbavyja technałohii ŭskładnili pracu špijonaŭ
Špijonić tak, jak raniej, užo nie atrymajecca. U 2010 hodzie vyviedniki Masada raspracavali płan tajemnaha zabojstva paleścinskaha bajevika ŭ Dubai. U ich usio atrymałasia, tolki nie atrymałasia zrabić heta tajemna — kamiery nazirańnia zdymali ich pierad i paśla taho, jak jany nadzieli maskiroŭku. Pra novyja vykliki špijonskaj prafiesii raskazvaje Wall Street Journal.
U 2017 hodzie amierykanski vyviednik sustreŭsia — jak jon dumaŭ, tajemna — sa zvodnym bratam paŭnočna-karejskaha lidara, a praź niekalki dzion taho brata zabili. Pra hetuju sustreču taksama stała viadoma dziakujučy kamieram biaśpieki hatela.
Narešcie ŭ minułym śniežni pry dapamozie sajta Bellingcat udałosia praz telefonnyja danyja i infarmacyju pra padarožžy adsačyć traich maskoŭskich ahientaŭ FSB, jakija pieraśledavali, a paśla sprabavali zabić Alaksieja Navalnaha. Bellingcat raskryŭ imiony hetych ahientaŭ i apublikavaŭ ich fota.
Špijonić, jak raniej, užo sapraŭdy niemahčyma.
Dobra padrychtavany ahient CRU moh raniej pierajści miažu pa falšyvych dakumientach na inšaje imia i ŭpeŭniena vandravać pa zamiežnych haradach, kab sustrakacca sa svaimi ahientami. Ale ciapier na jaho šlachu — ličbavyja pieraškody, jakija stali jarkaj admietnaściu sučasnaha žyćcia: usiudyisnyja kamiery nazirańnia i bijamietryčny kantrol na miažy (identyfikacyja pa rysach tvaru), nie kažučy ŭžo pra toje, što smartfony, hadzińniki i mašyny pastajanna padajuć sihnał pra miescaznachodžańnie. Da ŭsiaho, jość ža jašče «ličbavy pył» — ślady, jakija ŭsie ludzi pakidajuć za saboj u internecie.
Štučny intelekt ciapier dapamahaje chutka šukać patrebnyja danyja ŭ vialikaj kolkaści infarmacyi, i heta dazvalaje krainam apieratyŭna vyjaŭlać zamiežnych ahientaŭ na svajoj terytoryi.
«Heta sapraŭdnaja prablema, — pryznaŭsia były ahient amierykanskaj kontrvyviedki. — Sami asnovy i pryncypy našaj pracy padryvajucca».
Dyrektar CRU Uiljam Biornz pryznaŭsia, što ŭpraŭleńniu daviadziecca adaptavacca da novych akaličnaściaŭ.
Prablema ź ličbavymi technałohijami ŭ tym, što jany dajuć bolšuju pieravahu vyviedkam aŭtarytarnych dziaržaŭ, takich jak Kitaj ci Rasija, bo tam ułady majuć bolšy kantrol nad infarmacyjaj.
Adzin z kiraŭnikoŭ CRU ŭ intervju zajaviŭ, što jany nie zdajucca i nie skaračajuć kolkaść supracoŭnikaŭ i ahientaŭ.
«Humint nie pamior, i nie pamre ŭ ahladnaj budučyni», — skazaŭ jon pra čałaviečy intelekt (human intelligence, skaročana humint — čałaviečy rozum).
Ale nie ŭsie z hetym zhodnyja.
«Fundamientalnyja asnovy vyviedki pachisnulisia. Ich užo zrujnavali», — pryznaŭsia Dziujani Norman, były staršynia adździełu CRU, jaki raniej uznačalvaŭ prahramy pa adaptacyi vyviedki da ličbavaj epochi. Bo jak možna amierykanskamu vyviedniku pierakanać zamiežnaje ahienctva ci pryvatnuju kampaniju, što jon pracuje ŭ ich, kali jaho telefon nie padaje pastajannyja sihnały, što jon niedzie pobač, niama infarmacyi pra toje, što jon zdymaje hrošy ci raźličvajecca kartkaj za abiedy niedzie niepadalok, dy i kamiery videanazirańnia nidzie jaho nie fiksujuć?
A kali ŭ ciabie niama tak zvanaha elektronnaha podpisu, to bok ty nie nosiš telefon i nie karystaješsia internietam, zamiežnaja vyviedka ŭ pieršuju čarhu na ciabie i źviernie ŭvahu.
U pramovie 2018 hoda były vice-staršynia CRU pa navucy i technałohijach Don Miejeryks, zajaviŭ, što ŭ 30 krainach zamiežnaja vyviedka ŭžo nie rupicca navat pra fizičny pieraśled amierykanskich ahientaŭ, kali tyja vychodziać ź miesca svajoj pracy (jon havaryŭ pra supracoŭnikaŭ amierykanskich ambasad). «U hetym niama nieabchodnaści, bo hetuju pracu ciapier robiać sistemy videanazirańnia i biazdrotavaja infrastruktura».
Jak ža praca špijona budzie vyhladać u budučyni?
Pierachodzić miažu pad čužym imiem užo ŭčorašni dzień. Bijamietryja i sistema raspaznańnia tvaru hetaha bolš nie dazvolać.
«Ciapier supracoŭniku vyviedki bolš składana schavacca za psieŭdanimam», — skazaŭ były vyviednik adnoj z zachodnich słužb vyviedki, u jakoha za ŭsiu karjeru było dzieviać roznych pašpartoŭ, i kredytnyja kartki da kožnaha ź ich.
Ciapier usio čaściej vyviedkaj buduć zajmacca ludzi pad svaimi sapraŭdnymi imionami. Heta značyć, što špijon nie budzie pradstaŭlacca kimści inšym, jon budzie žyć svajo žyćcio, jakoje i budzie jaho prykryćciom. Heta moža być biznesmien, akademik ci inšy śpiecyjalist, u jakoha nie budzie nijakaj vidavočnaj suviazi z uradam ZŠA.
«Maskva i Piekin užo zrabili «masiŭny ŭkid» takich vyviednikaŭ pa ŭsim śviecie», — raskazaŭ staršynia kontrvyviedki ZŠA Uiljam Ivenina.
Hetych špijonaŭ ciapier nazyvajuć nietradycyjnymi zborščykami infarmacyi za miažoj.
Kamientary