Za tydzień na «Hrodna Azocie» zatrymali minimum dziesiać čałaviek. Akcyja zastrašvańnia pierad refierendumam? Daviedalisia detali.
Masavyja zatrymańni na «Hrodna Azocie» pačalisia 14 studzienia.
Mnohich zatrymlivali na pracy. Na prachadnoj u ludziej nie spracoŭvaŭ propusk, i pakul achova raźbirałasia, što nie tak, da čałavieka padychodziła milicyja.
Łabarantku chimičnaha analizu zatrymali ŭ prytułku dla biazdomnych žyvioł, dzie jana była vałanciorkaj. Adnaho z majstroŭ uziali pa darozie dadomu.
Pa słovach kiraŭnika stačkama Juryja Ravavoha, pratakoły na zavadčan składali pa artykule 19.11 (ci 17.11 pa staroj redakcyi Kodeksa, raspaŭsiudžvańnie ekstremisckaj infarmacyi). Sutki pakul nikomu nie davali. Abo zatrymlivali na 72 hadziny, a paśla vypisvali vializny štraf, abo adpuskali da suda.
Juryj Ravavy kaža, što ludziej znachodzili pa adkrytych čatach zavoda, vyličvali tam aktyŭnych udzielnikaŭ, jakija nie zasakrecili svoj numar u Telehramie.
«Meta — trapić u Telehram čałavieka i znajści tam kantakty inšych kaleh, pahladzieć, jak chto padpisany, kab papoŭnić svaju bazu, — miarkuje Juryj. — Vyličyć udzielnikaŭ zakrytych čataŭ, kab papałochać, što ŭ siłavikoŭ usio pad kantrolem, što jany bačać uvieś kantent.
Tamu my raim ludziam pa novaj pastavić svoj telehram-akaŭnt u telefonie, vydalić stary, i zrabić schavanym mabilny numar».
Jon źviazvaje zatrymańni z refierendumam, jaki čakajecca praź miesiac. I kaža, što pa toj samaj schiemie pracujuć nie tolki na ich pradpryjemstvie i nie tolki ŭ Hrodnie.
«Aryštavanych ludziej sprabujuć vierbavać, kab vykryvać lidaraŭ na zavodzie. Pahražajuć administracyjnym aryštam i nastupnym zvalnieńniem. Pakul čałaviek čakaje suda, prapanujuć: maŭlaŭ, kali pahodzišsia na supracoŭnictva, patelefanujem na zavod i ničoha nie budzie. I kali čałaviek pad takim ciskam, jon moža vyrašyć padpisać papieru, kab zachavać pracu».
Hrodzienski prapahandyscki telehram-kanał pisaŭ, što nibyta Juryj pradaŭ kanał stačkama znajomamu, jaki akazaŭsia siłavikom, tamu ŭsie danyja padpisantaŭ — u rukach milicyi. Ale sam Juryj kaža, što ničoha padobnaha nie było. Kanał pa-raniejšamu naležyć jamu, inšyja administratary — za miažoj.
Čytajcie taksama: «Mianie vyklikajuć na prafiłaktyčnuju hutarku». Što heta takoje i jak siabie pavodzić?
Litoŭski viaskovy padvorak na miažy ź Biełaruśsiu vyhladaje, jak aŭtasałon pa prodažy premijalnych aŭto VIDEA1
Kamientary