«Prybrali funkcyju źniaćcia dalaraŭ». Što adbyvajecca kala abmieńnikaŭ i bankamataŭ pa ŭsioj krainie
U niekatorych bankamatach skončylisia i dalary, i rubli.
Ad ranicy pa ŭsioj krainie niemahčymymi stali valutna-abmiennyja apieracyi ŭ «Biełarusbanku». Ludziam paviedamlali, što kursy buduć vyznačanyja paśla 12:30.
U «Pryjorbanka» nie pracuje mabilnaja prahrama.
U Minsku ŭ adździaleńni «Pryjorbanka» na Łahojskim trakcie skončylisia hrošy ŭ bankamacie. U samim adździaleńni vialikija čerhi, kab kupić valutu.
Niama valuty ŭ abmieńnikach «Alfa banka» i «Pryjorbanka» kala stancyi mietro «Uručča».
Ab 11-j niemahčyma było źniać dalary ŭ bankamacie «Alfa banka» ŭ handlovym centry «Moma». «Telefanavaŭ u bank — skazali, što sami pakul ničoha nie viedajuć. Čarha na toj momant była čałaviek 5—7, ale, jak ja zrazumieŭ, zdymali ŭ asnoŭnym rubli, avans i da taho padobnaje», — dzielicca čytač.
«U «Alfa banku» na «Spartyŭnaj» — bitkom narodu, ludzi sprabujuć źniać chacia b biełaruskija rubli, kupiury zakančvajucca. «Bielinviest» pakul prymaje zajaŭki na vydaču dalaraŭ, ale nie raniej za paniadziełak», — paviedamlaje minčanka.
Składanaści ŭźnikli ŭ adździaleńni «Pryjorbanka» na Niamizie.
«U kasach dalaraŭ niama, jeŭra jość u adnoj kasie ź dźviuch, pa kolkaści składana skazać», — kaža minčuk.
«Byŭ u abmieńniku ŭ «Pryjorbanku» na praśpiekcie Pieramožcaŭ. Čarha piać-šeść čałaviek a 10-j ranicy. Dalaraŭ užo nie było», — paviedamlaje inšy.
U «Technabanku» na vulicy Sucharaŭskaj dalary pradavali pa kursie 2,95 rubla.
Na Kamiennaj Horcy ŭ handlovym centry «Hryn-sici» taksama nazirajucca pieraboi z valutaj.
«Čerhi nievialikija, ale dalaraŭ niama. Kurs — 2,98 rubla. Ludzi biaruć kvitki i sychodziać pa spravach», — pieradaje čytač.
«U čatyroch bankamatach «Biełhazprambanka» voś taki ček vydała na zapyt dalaraŭ: «Admoŭlena. Skončylisia kupiury». Dalej užo navat nie jeździŭ. U bankamacie «Pryjorbanka» ŭvohule prybrali funkcyju źniaćcia dalaraŭ», — apisvaje situacyju adzin z haradžan.
U adnym sa staličnych adździaleńniaŭ «Alfa banka» paviedamili, što zamović valutu dla źniacca z karty možna tolki na 3 sakavika.
Padobnaja karcina nazirajecca i ŭ rehijonach.
U vioscy Baravaja pad Minskam u bankamacie «Biełhazprambanka» nie zastałosia ni valuty, nie biełaruskich rubloŭ.
U Dziaržynsku ŭ abmieńniku «Biełahraprambanka» ab 11 ranicy nie było dalaraŭ, zastavalisia tolki jeŭra.
«U Maładziečna bank «Biełveb» valuty nie pradaje. U «BPS-banku» ŭsio narmalna», — piša čytač adtul.
Kamientary