Raskazvajem pra biełaruskaha vieślara, jaki pajechaŭ vajavać za Ukrainu
Vieteran biełaruskaha viesłavańnia Pavieł Šurmiej zrabiŭ zajavu pra toje, što jon u jakaści dobraachvotnika jedzie abaraniać Ukrainu ad rasijskaha napadu. Uspomnim, čym viadomy hety spartoviec.
U svaim zvarocie Šurmiej adznačyŭ: «Ja na šlachu ŭ brackuju Ukrainu, kab dapamahčy brackamu ŭkrainskamu narodu ŭ baraćbie z hetaj fašysckaj rasijskaj ahresijaj. Nas, biełarusaŭ, jakija buduć vajavać na baku Ukrainy, vielmi šmat».
Udzielnik dźviuch Alimpijad
Šurmieju 46 hadoŭ. Padčas aktyŭnaj karjery jaho asnoŭnaj dyscyplinaj było parnaje viesłavańnie.
Pavieł vystupaŭ za Biełaruś na letnich Alimpijskich hulniach u 2004 i 2008 hadach (adpaviedna — afinskaja i piekinskaja alimpijady), abodva razy — u čaćviarnym parnym viesłavańni.
U 2004 hodzie kamanda Šurmieja zaniała čaćviortaje miesca ŭ svaim zajeździe i kvalifikavałasia ŭ paŭfinał, dzie pryjšła da finišu treciaj. Heta dazvoliła spartoŭcam prajści ŭ finał, u jakim čaćviorka Šurmieja zaniała apošniaje miesca siarod šaści pradstaŭlenych kamand.
Što da Hulniaŭ 2008 hoda, na ich čaćviorka Šurmieja taksama prajšła ŭ paŭfinał, ale tam zaniała apošniaje miesca. Kamandy z takim vynikam traplajuć nie ŭ finał A (dzie i prachodzić baraćba za miedali), a ŭ mienš prestyžny finał B, dzie biełarusy zaniali 5 miesca, i ŭ vynikovym zaliku akazalisia 11-mi.
Rekardsmien pa viesłavańni ŭ pamiaškańniach
Dvojčy — u 2004 i 2005 hadach — Pavieł Šurmiej vyjhravaŭ turnir CRASH-B Sprints, to-bok čempijanat śvietu pa viesłavańni ŭ pamiaškańniach. U 2013 i 2017 hadach Šurmiej braŭ na hetym turniry srebra.
Patłumačym, što na turniry spartoŭcy sprabujuć svaje siły ŭ viesłavańni na śpiecyjalnych trenažorach Concept2.
Biełaruski viaślar navat maje ŭ hetym vidzie sportu svaje rekordy. Jon uładalnik dvuch suśvietnych rekordaŭ u zvyšciažkaj vahavaj katehoryi va ŭzroście 40-49 hadoŭ na dystancyi 1000 i 2000 mietraŭ.
Žanaty na ŭkraincy, jakaja maje orden
Žonka Šurmieja — viaślarka Alena Burak z ukrainskaha Mikałajeva. U adroźnieńnie ad muža, jana maje za svaimi plačyma pakul što tolki adnu Alimpijadu. Alena pradstaŭlała Ukrainu na letnich Alimpijskich Hulniach — 2016 u akademičnym viesłavańni, dyscyplina «parnaja dvojka». Ukrainskija spartsmienki zaniali ŭ finale čaćviortaje miesca.
Burak maje ŭ svaim aktyvie i miedal bujnoha mižnarodnaha turnira. Na letniaj Univiersijadzie-2013 dvojka, u składzie jakoj była ŭkrainka, zavajavała bronzu. A ŭ 2017 hodzie Burak, jak čempijonka Suśvietnych hulniaŭ pa viesłavańnia na erhamietrach (trenažory, — zaŭv. «NN») navat atrymała orden «Za zasłuhi» III stupieni.
Spartsmienka, jak i jaje muž, ciapier zasiarodziła ŭvahu na viesłavańni ŭ pamiaškańniach. I ŭ jaje atrymlivajecca niabłaha: naprykład, na pačatku lutaha Alena stała čempijonkaj śvietu na dystancyi 500 mietraŭ.
Lubić aktyŭnyja vidy adpačynku
Kali prahledzieć staronku Paŭła Šurmieja ŭ sacyjalnaj sietcy, bačna, što viaślar nie suprać taho, kab pabavić čas aktyŭna. Viaślar jaŭna viedaje, što ź siabie pradstaŭlajuć palavańnie, rybnaja łoŭla i płavańnie z akvałanham.
Rodam ź Lidy, ale šmat času pravodziŭ va Ukrainie
Šurmiej — ledźvie nie samy tytułavany viaślar ź Lidy. Tut jon pačynaŭ vučycca viesłavańniu ŭ miascovaj spartovaj škole, dy i paźniej nieadnarazova viartaŭsia ŭ rodny horad.
Jak pryznavaŭsia sam spartoviec, jaho žyćcio šmat u čym było źviazanaje z padarožžami. Časam atrymlivałasia treniravacca ŭ ZŠA, zamiežnyja spabornictvy taksama nie dazvalali šmat byvać doma.
Ale, jak kazaŭ Šurmiej, jon taksama pravodziŭ šmat času va Ukrainie, na radzimie žonki. Mo adsiul i žadańnie abaranić krainu, jakaja ŭžo stała jamu nie čužoj.
Čytajcie jašče:
Jak suśvietny sport padtrymlivaje Ukrainu
Mielicina Staniuta: Učora ja atrymała dźvie admovy ŭ pracy praz moj biełaruski pašpart. Ale heta ŭžo nie maje značeńnia
«This f*cking AI». Pierakładčyk Łukašenki pry prezidencie AAE vykarystaŭ niedypłamatyčnaje słova5
Kamientary