Jak asabistaja doktarka Łukašenki vučyć biełarusaŭ canić radzimu, a sama skuplaje luks i adpačyvaje na Błakitnym Bierazie ŠMAT FOTA
Rasśledavańnie pra nievierahodna raskošnaje žyćcio Aleny Kazak zrabiła «Biuro».
Alena Kazak šmat hadoŭ uvachodzić u blizkaje atačeńnie Alaksandra Łukašenki. Jana sočyć za jahonym zdaroŭjem, źbiraje ź im kavuny i supravadžaje na spartovych mierapryjemstvach.
Pavodle źviestak niezaležnych ŚMI, u pratesnym 2020 hodzie Kazak u kampanii Dźmitryja Baskava i Natalli Ejsmant jeździła pa minskich dvarach i zrazała biełyja i čyrvonyja stužki. Telefonny numar Kazak zaśviaciŭsia i na «płoščy pieramien», u dzień, kali byŭ zabity Raman Bandarenka.
U žniŭni 2020 hoda jana apublikavała voś taki post:
«Hledziačy na ŭsio, što adbyvajecca, jašče bolš pačynaješ lubić svaju radzimu, canić jaje pryhažość i ranimaść. Zaŭvažać drobiazi, na jakija ty raniej, moža, i nie źviartaŭ uvahi, ale jakija takija važnyja! Viečarovuju cišu, duchmianuju kavu ranicami, dziciačy śmiech, prahułki la Śvisłačy, dušeŭnyja viečary ź siabrami. <…>
Ja nie chaču, kab naviazanyja z Zachadu dumki tumanili hałavu majmu narodu. Ja chaču, kab ludzi narešcie ŭklučyli mazhi i stali canić toje, što jany majuć!»
Adnak, jak vyśvietliła «Biuro», «ideały», jakija Kazak publična tranślavała ŭ svajoj sacyjalnaj sietcy, palarna razychodziacca ź jaje sapraŭdnymi pierakanańniami. Niahledziačy na hučnyja słovy pra «luboŭ da radzimy» i nianaviść da «hniłych zachodnich kaštoŭnaściaŭ», Alena Kazak viadzie nievierahodna raskošnaje žyćcio, u tym liku i ŭ krainach Jeŭrasajuza.
Najlepšyja siabry dziaŭčat — heta bryljanty
«Biuro» atrymała dostup da asabistaha fotaarchiva Aleny Kazak i daviedałasia mnostva ekskluziŭnych padrabiaznaściaŭ pra ład žyćcia doktarki Łukašenki.
U Biełarusi Alena Kazak jeździć na premijalnym BMW X5 u kuzavie G05. Prybliznaja cana hetaha aŭto — kala 60 tysiač dalaraŭ.
Akramia darahich spartkaraŭ u śfieru intaresaŭ asabistaj lekarki Łukašenki ŭvachodziać luksavyja adzieńnie i aksesuary. Voś, naprykład, jana ŭ restaranie Bergamo ŭ sukiency ad aŭstralijskaha luksavaha brenda Zimmermann.
Cana bieź źnižki — kala tysiačy jeŭra.
Dapaŭniaje vobraz załaty branzalet Van Cleef & Arpels ź pierłamutram koštam 5,3 tysiačy jeŭra.
A jašče nie tak daŭno ŭ asabistaj doktarki Łukašenki źjaviłasia novaje chobi — holf.
Na novaśpiečanaj halfistcy — z vyhladu davoli niakidki spartovy aŭtfit, ale dapaŭniaje jaho duet ź piarścionku i zavušnic ad Cartier — razam amal na 8 tysiač jeŭra.
Taksama na levym zapiaści možna zaŭvažyć hadzińnik, vielmi padobny na madel Panthère de Cartier amal na 33 tysiačy jeŭra.
Na inšaj fotasiesii Kazak my razhledzieli hadzińnik, jaki pa architektury nahadvaje madel Royal Oak ad premijalnaha šviejcarskaha hadzińnikavaha brenda Audemars Piguet.
Cana — 27,5 tysiačy jeŭra.
I tak Alena Kazak vyhladaje nie tolki ŭ Biełarusi, ale i na zamiežnych łakšary-kurortach.
Jeŭratryp
U žniŭni 2026 hoda Kazak adpačyvała ź siabroŭkami na Błakitnym Bierazie — u Kanach.
Na plačy ŭ jaje možna zaŭvažyć torbačku Hermès Constance, cana ŭ buciku — prykładna 8,5 tysiačy jeŭra.
Na tvary — akulary Cartier za 1200 jeŭra.
U ton torbačcy — šłapaki za 635 jeŭra.
Zamiest topa doktarka Łukašenki paviazała šaŭkovuju chustku ad francuzskaha modnaha doma Celine za 490 jeŭra.
Na rukach u asabistaj lekarki Łukašenki možna razhledzieć dźvie darahija juvielirnyja azdoby. Branzalet Van Cleef & Arpels za 7,1 tysiačy jeŭra.
I Cartier koštam 8,1 tysiačy jeŭra.
Miarkujučy pa ŭsim, na čas adpačynku Alena Kazak spyniłasia ŭ lehiendarnym hateli Carlton Cannes.
Košt samaha niedarahoha numara ŭ vysoki siezon składaje prykładna 1,5—1,8 tysiačy jeŭra za noč.
A voś jana sioleta ŭ traŭni hulaje pa Paryžy z ultraluksavaj torbačkaj Birkin ad francuzskaha brenda Hermès. Cana takoj z bucika — prykładna 11 tysiač jeŭra.
Tut jana ŭ paryžskim restaranie vyhulvaje jašče adnu torbačku ad Hermès — Kelly. Cana ŭ buciku — kala 10 tysiač jeŭra.
Birkin i Kelly ad Hermès — heta raskošny maksimum u śviecie mody. Kab stać ščaślivaj uładalnicaj takich ekskluziŭnych torbačak, pakupnicy spačatku treba naładzić adnosiny z brendam — zrabić pakupki na sumu, jakaja zvyčajna ŭ 1‑2 razy pieravyšaje košt samoj torby. Tolki sfarmavaŭšy łajalny profil i davier kansultanta, klijentka moža raźličvać na zapavietnuju prapanovu kupić kultavuju madel Hermès.
U chajłajts profilu Aleny Kazak my taksama znajšli jašče adno zajmalnaje fota, na jakim jana vychodzić z hatela The Ritz Paris.
Košt nočy ŭ hetym hateli vahajecca ad 2 da 3 tysiač jeŭra ŭ zaležnaści ad siezona — i heta samy biudžetny varyjant. Adnak my nie možam śćviardžać, što padčas padarožža ŭ Paryž biznes-łedzi žyła mienavita tam.
U červieni Kazak była ŭ adpačynku na Maldyvach.
Navahodnija śviaty 2026 hoda Kazak praviała ŭ kampanii byłoj favarytki Łukašenki Aliny Roskač u Sočy — dziaŭčaty katalisia na łyžach na elitnym kurorcie «Krasnaja Palana».
U vieraśni 2025 hoda jana razam ź siabroŭkaj była na kanikułach na Francuzskaj Ryŭjery — u Kanach.
Impieryja pryhažości i zdaroŭja
Na čym ža asabistaja lekarka Łukašenki zmahła zarabić na ŭsiu hetuju raskošu?
Niadaŭna rasśledavalniki raskazvali, što Alena Kazak stała novaj uładalnicaj sietki aptek «Lihmaton». Da Kazak kampanija naležała nabližanym da Łukašenki biznesoŭcam — Paŭłu Tapuzidzisu i Viktaru Piatroviču.
Heta nie adziny biznes asabistaj doktarki Łukašenki. Taksama jana vałodaje firmaj «Mantpart» (klinika estetyčnaj miedycyny Antiage Slinic). Hety aktyŭ Kazak pierajšoŭ ad chakieista Paŭła Biełaha i inšaj lekarki Łukašenki — Śviatłany Kanašenki.
Akramia taho, ciapier Alena Kazak adnaasobna vałodaje firmaj «Amalem», jakaja zajmajecca prodažam kaśmietałahičnaha abstalavańnia.
Ciapier čytajuć
Jak asabistaja doktarka Łukašenki vučyć biełarusaŭ canić radzimu, a sama skuplaje luks i adpačyvaje na Błakitnym Bierazie ŠMAT FOTA39
Jak asabistaja doktarka Łukašenki vučyć biełarusaŭ canić radzimu, a sama skuplaje luks i adpačyvaje na Błakitnym Bierazie ŠMAT FOTA
Na Afonie adšukali try nieviadomyja raniej asobniki Astrožskaj Biblii. Dla jaje stvareńnia drukar Ivan Fiodaraŭ, vychadziec ź Biełarusi, vykarystoŭvaŭ teksty Skaryny44
Kamientary