Biełaruski kryminalnik z zabaronaj na ŭjezd u Rasiju łamanuŭsia na front. Ale na miažy jaho aryštavali i znoŭ pasadzili
Mikałaj Žuraŭski znoŭ sieŭ. Zatoje zastaŭsia žyvy!
Hramadzianina Biełarusi Mikałaja Žuraŭskaha prysudzili ŭ Rasii da 9 miesiacaŭ kałonii strohaha režymu. Jaho abvinavacili ŭ niezakonnym pierasiačeńni miažy. Nie dapamahli navat jaho tłumačeńni — Žuraŭski davodziŭ, što prabiraŭsia ŭ Rasiju, kab zapisacca dobraachvotnikam na front.
Biełarus maje doŭhuju kryminalnuju historyju ŭ Rasii. Žuraŭski niadaŭna siadzieŭ paŭtara hoda za kradziažy. Kali vyzvaliŭsia, to jaho departavali.
Praŭda, Žuraŭski admaŭlaŭsia padpisvacca pad zabaronaj na viartańnie ŭ Rasiju, ale ad hetaha zabarona, naturalna, nie źnikła.
Tym nie mienš, pažyŭšy paŭtara hoda ŭ Biełarusi, Žuraŭski vyrašyŭ jechać u Rasiju. Pavodle jaho słoŭ, kab zapisacca na front.
Jon dajechaŭ na spadarožnaj hruzavoj mašynie da biełaruska-rasijskaj miažy ŭ rajonie Nieviela i adtul pieššu rušyŭ uzdoŭž čyhunačnaha pałatna, spadziejučysia nieprykmietna prajści mima pahraničnaha pasta. Zaduma nie spracavała: spracavała sihnalizacyja, i ŭžo praź niekalki hadzin pahraničniki FSB zatrymali jaho prosta na čyhunačnych šlachach ź biełaruskim paśviedčańniem asoby i vajennym biletam pry sabie.
Žuraŭski nie straciŭ nadzieju pajści na vajnu i paźniej — ź SIZA źviartaŭsia ŭ punkt adboru na vajskovuju słužbu ŭ Pskoŭskaj vobłaści, adnak jamu admovili: zakon nie dazvalaje zaklučać kantrakt z zamiežnikami, suprać jakich užo viadziecca kryminalnaja sprava.
Sud pryznačyŭ Žuraŭskamu realny termin — 9 miesiacaŭ u kałonii strohaha režymu.
Paśla prysudu jon moh znoŭ pasprabavać pajści na front. Zrešty, u śpisie zahinułych biełarusa pakul niama.
Ciapier čytajuć
Na Afonie adšukali try nieviadomyja raniej asobniki Astrožskaj Biblii. Dla jaje stvareńnia drukar Ivan Fiodaraŭ, vychadziec ź Biełarusi, vykarystoŭvaŭ teksty Skaryny55
Kamientary