Alaksiej Janukievič: BNF pavinien vyjści ź cieniaŭ kaalicyj

5 vieraśnia ŭ pałacy kultury MTZ projdzie źjezd Partyi BNF. Na im budzie abranaje novaje kiraŭnictva arhanizacyi. Ciapierašni staršynia Lavon Barščeŭski nieadnarazova zajaŭlaŭ, što bolš nie budzie bałatavacca na kiroŭnyja pasady.

Hety źjezd Partyi BNF moža stać adnym z najbolšych u historyi. Na mierapryjemstva traplajuć partyjcy pa kvocie adzin ad dvuch, jakija prysutničajuć na rehijanalnych schodach. Užo siońnia naličvajecca 350 delehataŭ, za bližejšyja dni kolkaść moža jašče krychu ŭzraści.

Pra svaje ambicyi bałatavacca na pasadu staršyni zajavili dva namieśniki Barščeŭskaha — Alaksiej Janukievič i Viktar Ivaškievič. Nie vyklučanaje vyłučeńnie i namieśnika treciaha — Vincuka Viačorki.

Napiaredadni źjezdu Alaksiej Janukievič parazmaŭlaŭ z žurnalistami. Na jahonuju dumku, hety źjezd moža stać jašče bolš revalucyjnym, čym u 1999 hodzie, kali na miesca Zianona Paźniaka byŭ abrany Vincuk Viačorka.

Janukievič padkreślivaje, što zachavańnie siońniašniaha status‑kvo raŭnaznačnaje kancu Partyi. «BNF patrebnyja kardynalnyja pieramieny», — kaža A.Janukievič.

Siarod pryjarytetnych zadač Alaksiej Janukievič nazyvaje bolšuju samastojnaść BNF. «My pavinny vyjści ź cieniaŭ roznych kaalicyj. Nie pracavać pavodle tych scenaraŭ, jakija pišucca nie nami. BNF doŭhi čas vykarystoŭvajuć u jakaści «ciahavaj siły» ŭ niepatrebnych prajektach», — kaža A.Janukievič.

Palityk bačyć budučyniu BNF u nacyjanalna‑demakratyčnaj kaalicyi, razam z BCHD, Rucham «Za svabodu», KCHP‑BNF, «Maładym frontam», «Pravym aljansam». «ADS faktyčna ŭžo adyhraŭ svaju rolu», — kaža namieśnik staršyni Partyi BNF.

U toj ža čas Janukievič ličyć niasvoječasovym vyłučeńnie frontaŭskaha kandydata ŭžo na vieraśnioŭskim źjeździe. Na jahonuju dumku, pakul bolš važna skancentravacca na źmianieńni ŭ vybarčaje zakanadaŭstva, i ŭžo tady prymać rašeńnie ab udziele. «My ž nie viedajem pravił hulni», — kaža jon.

Siarod astatnich važnych punktaŭ svajoj prahramy Janukievič nazyvaje viartańnie Partyi BNF realnaha ŭpłyvu ŭnutry hramadstva, padrychtoŭka novych lideraŭ, a taksama spynieńnie čystak unutry arhanizacyi i stvareńnie pazityŭnaj atmaśfiery.

Janukievič pakul nie nazyvaje ludziej, jakich jon budzie prapanoŭvać na pasady namieśnikaŭ. Razam z tym, jon prapanoŭvaje źmienšyć kolkaść namieśnikaŭ z čatyroch da dvuch-troch.

«Ja vysoka aceńvaju svaje šancy na pieramohu. Kali prysutničaŭ na partyjnych schodach, zrazumieŭ, što našy aktyvisty chočuć źmienaŭ», — havoryć A.Janukievič.

• 0
• 0
• 0
• 0
• 0
• 0
• 0
• 0