«Hetaje «vynachodnictva» hadoŭ 20 na składzie pralažała!» Što pakazvali Łukašenku na naradzie pa mikraelektronicy
Ciaham hadziny kiraŭnictva krainy razvažała pra nanatechnałohii, ale pry hetym razhladała schiemy, zapajanyja na aby-jakija pravady, spalenyja kandensatary i raźlity pa płatach prypoj…
Siońnia Alaksandru Łukašenku demanstravali pieradavyja ajčynnyja napracoŭki ŭ śfiery mikraelektroniki — hetamu navat pryśviacili śpiecyjalnuju naradu. Vizualny materyjał kalejdaskopam mianiaŭsia pierad aficyjnymi asobami. Tady jak tłumačeńni, pierasypanyja terminałohijaj, pavinny byli zapeŭnić, što sankcyi ŭ śfiery vysokich technałohij krainie abyjakavyja.
Adnak varta było bolš detalova razhledzieć skrynšoty «praryŭnych napracovak», jak ludziej, źviazanych z hetaj halinoj, nakryła isteryka.
«Dastatkova hlanuć na fota płaty ź niekalkimi kandensatarami, kab schapicca za hałavu. Jaki devajs nie zhadaj, jana tudy ni ŭ piać, ni ŭ dziesiać. Navat kali heta makiet peŭnaj pryłady, to prykładny sens elemientu-navatvoru i tudy nie prydumać»,
— adznačajuć surazmoŭcy, daśviedčanyja ŭ śfiery mikraelektroniki.
I dadajuć, što padobnyja płaty raspracoŭvalisia ŭ lepšym vypadku napačatku stahodździa, dzieści ŭ 2003-m. Moža, mienavita tamu jaje stan siońnia taki bieznadziejny: funkcyjanału niama, schiema zapajanaja na aby-jakija pravady, kandensatary spalenyja, a pa samoj płacie ŭsiudy raźlity prypoj…
«Ludzi kpiać, maŭlaŭ, niešta padobnaje rabili apošnim razam u šostym kłasie. I, viedajecie, heta niedaloka ad iściny. Jak minimum pa časie. Bo kali ŭvažliva pryhladziecca da fota, lohka pabačyć numar mikraschiemy, jaki napisany asadkaj.
U sučasnaści ž identyfikacyja zusim inšaja jak pa technałohii, tak i pa afarmleńni, — raspaviadajuć surazmoŭcy. — Takoje adčuvańnie, što dadzienaje «vynachodnictva» niekali daŭno dla kahości indyvidualna raspracavali, ale patreby jano tak i nie zajmieła. Z-za čaho 20 hadoŭ na składzie i pralažała».
Darečy, krytyku prafiesijanałaŭ vyklikali nie tolki drobiazi, ale i sama sutnaść narady razam z farmatam praviadzieńnia. Bo niedaśviedčanamu čałavieku niuansy mikraelektroniki nie patłumačyć. Tym bolš na prykładach niejkich surjoznych raspracovak.
«Maksimum, što ty možaš atrymać, — estetyčnaje zadavalnieńnie ad koleraŭ dy form, — adnahałosna śćviardžajuć daśviedčanyja ludzi. — Kali b nie fota z dyjodnymi mikrasborkami, jakija ŭžo proćmu hod «Intehrał» vyrablaje, to ŭvieś stend možna było b nazvać «pastanovaj», a naradu — «pierformansam».
Nie dadaje vistoŭ palityčnym śćvierdžańniam i realnaja vaha biełaruskaj pradukcyi na suśvietnym rynku. Słova «kankurentazdolnaść» vyklikaje sumnyja ŭśmieški.
«Viedajecie miem «usio vielmi drenna»? Voś heta pra ajčynnuju mikraelektroniku. Zapytajcie ŭ praktykaŭ, chto minimum hadoŭ 15 pracuje ŭ śfiery, kolki razoŭ za hety čas jany sustrakalisia ź biełaruskaj «načynkaj» u devajsach? Daj boh, kab chacia b adnojčy takoje spatkańnie adbyłosia!»
Surazmoŭcy tłumačać: naładzić vytvorčaść usioj vysokadakładnaj pradukcyi ŭ adnoj krainie niemahčyma. Tamu amierykanskija napracoŭki navat unutry adnaho korpusa susiedničajuć z kitajskimi, a akalaje ich jaki-niebudź karejski elemient.
«My ž z razvałam ułasnych vytvorčaściaŭ — na «Intehrale» pałova cachoŭ užo nie adpaviadaje pryznačeńniam — adstali ad suśvietu. Navat kali abjadnać vysiłki z Rasijaj, stać ź lidarami vytvorčaści ŭ adzin šerah nie ŭdasca. Chutčej vierniemsia ŭ časy, kali na kitajskija manitory kleili etykietki «Intehrała».
A što da sankcyj u śfiery mikraelektroniki — ci adčuvajucca jany? Bo Łukašenka ŭśled za Pucinym namiakaje: kali niečaha chapać nie budzie, padhledzim dy «pazyčym» na Zachadzie albo Uschodzie.
«Bravada dyj tolki! — nastojvajuć surazmoŭcy. — Siońnia navat idei skraści niemažliva. Tyja ž kitajcy zaraz supyniajuć adhruzku ŭłasnaj vytvorčaści na terytoryju Rasii dy Biełarusi, bo ŭ asnovie ich technałohij lažać zapatentavanyja amierykanskija idei. I kali narušyć praviły na karyść našaj dziaržavy, možna samim vielmi mocna paciarpieć.
Mikraelektronika — śfiera, dzie zaviazanyja intaresy vielmi mnohich krain. I ryzykavać vytvorčaściu, prybytkam albo rynkami nichto naŭprost nie budzie. Tym bolš kali partnior usio jašče padpisvaje płaty asadkaj».
Pamior dzied Koli Łukašenki — były viazień HUŁAHa, asudžany za dapamohu «banderaŭcam»2
Kamientary