Hienierał Kryvanos: Ukrainie varta nanosić udary pa aeradromach u Biełarusi, jakija vykarystoŭvajucca ŭ vajennych metach

— Jak vy ličycie, ci treba Ukrainie ŭžyvać zbroju pa aeradromach u Biełarusi, adkul uźlatajuć samaloty, jakija abstrelvajuć našy harady?

— Pytańni dypłamatyčnaha i vajennaha kirunku. Ja jak vajskoviec mahu adkazać: ja b źniščyŭ techniku na biełaruskich aeradromach, tamu što jany nie biełaruskija — hetyja aeradromy całkam addadzienyja rasijanam, piersanał tam rasijski, achoŭvajuć hetyja aeradromy rasijanie i pierymietr 5 kiłamietraŭ vakoł aeradroma ŭžo rasijski — nivodnaha biełarusa, ni vajskoŭca, ni cyvilnaha. My budziem źniščać na terytoryi Biełarusi niepasredna rasijskija bazy, jakija źjaŭlajucca rasijskaj terytoryjaj. Davajcie tak dypłamatyčna pabudujem adkaz.

— Adnosna Biełarusi — ciapier mnohija zaniepakojenyja tym, što adtul moža adbycca ŭvarvańnie abo rasijska-biełaruskija dyviersijna-raźviedvalnyja hrupy mohuć zajści. Z adnaho boku, jość razumieńnie, što na hety momant tam niama stolki sił i techniki, z druhoha boku, unutry krainy da hetaha scenaryja rychtujucca. Jak vy aceńvajecie imaviernaść taho, što ź Biełarusi moža być uvarvańnie naziemnaje?

— Jak dastatkova vysokuju. Ja ŭžo nieadnarazova kazaŭ, što za apošnija 20 hadoŭ rasijska-ŭkrainskich adnosin — i bajavych, i cyvilnych, i ŭ mirny čas — rasijanie štohod pravodzili biahučyja stratehičnyja vučeńni, i pieršym pytańniem była treniroŭka pierakidvańnia asabovaha składu i techniki na vialikija adlehłaści. Tamu naraścić svaje resursy na lubym učastku rasijska-ŭkrainskaj vajny jany mohuć, i toje, jak chutka jany pierakinuli techniku z Kijeŭskaj, Čarnihaŭskaj, Sumskaj abłaściej u rajon Danbasa, pakazała, što jany ŭmiejuć heta rabić. Nie treba niedaaceńvać voraha. Treba razumna hladzieć i razumieć jaho słabyja i mocnyja baki. Rasijanie zdolnyja ŭviazacca spačatku ŭ pamiežnyja bai ŭzdoŭž ukrainska-biełaruskaj miažy — nahadaju, heta 1086 km, vialiki ŭčastak. I im hetyja bai patrebnyja, kab adciahnuć častku našych sił i srodkaŭ, jakija ciapier na ŭschodzie Ukrainy, abo kab raściahnuć našy reziervy i niedzie naroščvać namahańni. Čym bolš jany nas raściahvajuć, tym bolš u ich pieravahi za košt kolkasnaj pieravahi ŭ technicy, asabliva što da artyleryi.

— Ale ja pravilna razumieju, što pierš čym pačniecca niejkaja aktyŭnaść na miažy ź Biełaruśsiu, naša raźviedka pavinna ŭbačyć, što rasijanie pierakidvajuć u toj rajon techniku z taho ž Danbasa, naprykład?

— Nie. Technika ŭžo tam znachodzicca, roŭna jak i častka siłaŭ i srodkaŭ, jakija byli pierakinutyja tudy nievialikimi hrupami ŭžo daŭno. U ich jość siły i srodki, jakija dazvolać pačynać bajavyja dziejańni na ŭkrainska-biełaruskaj miažy, nie čakajučy bujnych padmacavańniaŭ. Tam jość kamu napadać na nas.

Plus mabilizacyjnyja zbory, jakija pačalisia va ŭzbrojenych siłach Respubliki Biełaruś z červienia, taksama dazvalajuć vykarystoŭvać ich patencyjał. Nahadaju, što mabilizacyjny patencyjał Respubliki Biełaruś — heta 340 tysiač, plus sami ŭzbrojenyja siły 56 tysiač. Heta praktyčna 400 tysiač vojskaŭ. Suchaputny kampanient, viadoma, značna mienšy, ale miž tym u ich jość čym vajavać suprać nas. Pytańnie ŭ maralnym duchu. Tyja, chto słužać niepasredna va ŭzbrojenych siłach — kadravyja, vielmi dobra pramytyja prapahandaj i biełaruskaj, i rasijskaj na karyść Rasii. Tyja, chto pryzvany z reziervu i chto časta byvaŭ na terytoryi našaj krainy, razumiejuć niepatrebnaść hetaj vajny dla biełaruskaha naroda, i mnohija ź ich, kali pačnucca bajavyja dziejańni, chutčej, buduć zdavacca ŭ naš pałon. Ale nie treba rassłablacca, treba rychtavacca da vajny, i kožny nasieleny punkt uzdoŭž miažy na vialikuju hłybiniu pavinien mieć svaje inžyniernyja zbudavańni — doty, dzoty, blindažy, minnyja pali. Ja pra heta papiaredžvaŭ jašče z krasavika. Heta robicca, ale mnie chaciełasia b, kab u vialikich abjomach.

— Heta značyć, vy ličycie hety scenaryj faktyčna niepaźbiežnym?

— 98%, što ŭsio ž taki pamiežny kanflikt budzie. Ci razraściecca jon u pramuju ahresiju — budzie zaležać ad paśpiachovaści dziejańniaŭ našych vojskaŭ. Kali my adrazu dadzim adpor i nabjom mordu akupantam, jany adkociacca nazad.

— Pad pahrozaj ciapier usie vobłaści, jakija miažujuć ź Biełaruśsiu?

— Nu, heta pytańnie takoje tvorčaje. Raźviedčyk zaŭsiody adkazvaje: vierahodnym charaktaram dziejańniaŭ sapiernika moža być… Dyk voś i ja kažu: moža być, a moža i nie być. U pieršuju čarhu, heta kirunak Koviela, tamu što adna z mahutnych bryhad moža napadać z Bresta na Kovielskim kirunku, inšyja padraździaleńni — na terytoryju Rovienskaj, Žytomirskaj i Kijeŭskaj abłaściej, plus Čarnihaŭskaja, dzie moža adnavicca nastup na Čarnihaŭ i bai ŭ rajonie horada.

• 34
• 4
• 1
• 2
• 6
• 13