Załužny: Budzie novy nastup na Kijeŭ. Nie vyklučana, što ź Biełarusi
Pa słovach hałoŭnakamandujučaha Uzbrojenych sił Ukrainy Valeryja Załužnaha, rasijanie rychtujuć kala 200 tysiač novych sałdat, i kiraŭnik USU nie sumniajecca, što jany znoŭ pojduć na Kijeŭ. Novy nastup, u tym liku z terytoryi Biełarusi, chutčej za ŭsio, mahčymy viasnoj, paviedamlaje «Ukrainskaja praŭda».
«Rasijskaja mabilizacyja spracavała. Heta niapraŭda, što ich prablemy nastolki žudasnyja, što hetyja ludzi nie buduć vajavać. Jany buduć vajavać. Car kaža im iści vajavać, i jany iduć vajavać. Ja vyvučaŭ historyju dźviuch čačenskich vojnaŭ — usio było hetak ža. Mahčyma, u ich nie tak dobra z ryštunkam, ale jany ŭsio roŭna ŭjaŭlajuć dla nas prablemu. Pavodle našych acenak, u ich jość rezierv u 1,2—1,5 młn čałaviek… Rasijanie rychtujuć kala 200 tysiač novych sałdat. Ja nie sumniavajusia, što jany znoŭ pojduć na Kijeŭ», — skazaŭ Załužny.
Pa słovach hienierała, u pryvatnaści, užo ŭ studzieni, ale, chutčej za ŭsio, viasnoj, RF moža pačać vialiki nastup z Danbasa na ŭschodzie, z poŭdnia ci navat ź Biełarusi.
Rasijskija vojski buduć imknucca adcisnuć ukrainskija siły i navat mohuć ažyćciavić druhuju sprobu ŭziać Kijeŭ.
Załužny razam z Uładzimiram Zialenskim i kamandujučym Suchaputnymi vojskami hienierałam Alaksandram Syrskim papiaredzili pra niekalki krytyčnych miesiacaŭ napieradzie.
Hałoŭnakamandujučy USU ŭpeŭnieny, što rasijanie jak i padčas Druhoj suśvietnaj vajny, dzieści za Urałam rychtujuć novyja resursy.
«Bojeprypasy rychtujucca, nie vielmi dobryja, ale ŭsio ž. Heta nie buduć tyja resursy, jakija mahli b być za dva hady pieramirja. Heta budzie paršyva, i bajavy patencyjał budzie vielmi i vielmi nizkim, navat kali jon nabiare jašče miljon čałaviek u vojska, kab kidacca trupami, jak heta rabiŭ Žukaŭ, heta ŭsio roŭna nie pryniasie žadanaha vyniku».
Zachodnija krynicy paviedamlajuć, što kamandujučy rasijskimi vojskami hienierał Siarhiej Suravikin zaŭsiody razhladaŭ kanflikt z Ukrainaj jak šmathadovy.
Hienierały Uładzimira Pucina ŭparta praciahvajuć padrychtoŭku i razhortvańnie niadaŭna mabilizavanych vojskaŭ i pieraasnaščeńnie pramysłovaści, kab dapamahčy vajskoŭcam — u tym liku, jak kažuć ukrainskija kamandziry, šlacham vytvorčaści artyleryjskich snaradaŭ.
Załužny taksama kaža, što zamarožvańnie vajny paŭtaryła b pamyłku troch hadoŭ, jakija papiaredničali ŭvarvańniu 24 lutaha 2022 hoda: «Za hety čas Pucin biaskonca razmaŭlaŭ ź lidarami Zachadu, jakija paturali jamu, u toj ža čas rychtujučy vojska da ŭvarvańnia».
Kamientary