«Heta prysud rasijskaj SPA». Błohiery adreahavali na čarhovuju ataku aeradroma ŭ hłybini Rasii

«Fakt taho, što praz usiu centralnuju častku terytoryi krainy, abstalavanaj ešałanavanaj SPA, vielizarnaj kolkaściu hramadzianskich i vajskovych radyjałakacyjnych stancyj, bieśpieraškodna pralataje varožy dron, jaki źniščajecca tolki na padlocie da celi, vyhladaje vielmi dziŭnym i maksimalna dyskredytuje rasijskija siły SPA. Z druhoha boku, imaviernaść taho, što drony zapuskajucca dyviersijnymi hrupami adniekul z Pavołža, taksama ŭjaŭlajecca vielmi niadobraj», — piša «Tłumačyć Readovka».

Kanał «Čorny pałkoŭnik» V. Ałkśnis» źviartaje ŭvahu na toje, što aeradrom u Enhielsie — adna z baz rasijskaj jadziernaj tryjady i, jak jon ličyć, zhodna z rasijskim zakanadaŭstvam, takaja ataka «zjaŭlajecca padstavaj dla prymianieńnia Rasijskaj Fiederacyjaj jadziernaj zbroi». Ale, kanstatuje kanał, jaki naležyć byłomu rasijskamu palityku, pałkoŭniku avijacyi Viktaru Ałkśnisu, «vidavočna, nijakaj reakcyi prezidenta RF, jak i paśla papiaredniaj ataki na hety aeradrom 5 śniežnia, nie budzie».

Jon sumniajecca i ŭ aficyjnaj viersii padziej ad Minabarony RF.

«Miarkujučy pa videa ŭdaru, padzieńnie abłomkaŭ BPŁA vyklikać vybuch takoj mahutnaści nie moža. Padobna da vybuchu bojezaradaŭ mahutnaściu niekalki socień kiłahramaŭ traciłu i paražeńnie niejkaha bujnoha abjekta.

Niekatoryja krynicy śćviardžajuć, što ŭdar byŭ naniesieny pa kamandnym punkcie aeradroma. Ale što moža rabić na kamandnym punkcie aeradroma a pałovie na druhuju nočy techničny skład? Tym bolš u noč ź niadzieli na paniadziełak? Chutčej za ŭsio, techničny skład znachodziŭsia na stajancy samalotaŭ i zajmaŭsia padrychtoŭkaj samalotaŭ da palotaŭ. I mienavita pa stajancy samalotaŭ, padobna, byŭ naniesieny ŭdar. Ale ŭdar takoj mahutnaści pa stajancy samalotaŭ niepaźbiežna pavinien byŭ pryvieści nie tolki da hibieli techničnaha składu, ale i pa mienšaj miery nanieści miechaničnyja paškodžańni samalotam», — piša jon.

Kanał «Vajenny infarmatar» kanstatuje, što ataki aeradroma stratehičnaj avijacyi, «mabyć, stali normaj».

«Čarhovy raz reaktyŭny bieśpiłotnik bieśpieraškodna pieraadoleŭ bolš za 500 kiłamietraŭ ad miažy i byŭ źbity tolki nad samim aeradromam. Čarhovy raz praciŭnik nanosić udar nie ŭ vypadkovy momant, a napiaredadni padrychtoŭki stratehičnaj avijacyi da vyletaŭ», — piša kanał.

Jaho aŭtary, jak i astatnija, psujuć SPA śviata, vinavaciačy ŭ nieprafiesijanaliźmie.

«Vielmi cikava, a što źbirajucca rabić vajskoŭcy ŭ vypadku palotu da aeradroma, naprykład, niekalkich małaprykmietnych kryłatych rakiet la samaj ziamli? Kali vielizarny reaktyŭny bieśpiłotnik, jaki nie maje srodkaŭ źnižeńnia ciepłavoj i radyjołakacyjnaj prykmietnaści, vyjaŭlajecca i paražajecca tolki nad hałovami piłotaŭ na aeradromie.

Heta prysud sistemie radyjołakacyjnaha pakryćcia i ešałanavańnia srodkaŭ SPA, a taksama pakazalny ŭrok amataram malavać pryhožyja roŭnyja kruhi «zony zabarony dostupu» (A2/AD) uzdoŭž rasijskich miežaŭ i rabić vyhlad, što ŭsio ŭ paradku».

Kanał prychodzić da vysnovy: adzinaje, što ciapier abaraniaje rasijskuju stratehičnuju avijacyju (i mnohija inšyja abjekty) ad bolš dziejsnych udaraŭ praciŭnika, heta «nie mahutnaja sistema SPA i miechanizmy adkazu na ŭdar, a niežadańnie ZŠA pavyšać eskałacyju kanfliktu i vydavać USU sučasnyja małaprykmietnyja rakiety vialikaj dalokaści».

Kanał uzhadvaje, što ŭ 1987 za historyju z palotam Macijasa Rusta «svaje pasty straciła praktyčna ŭsio kiraŭnictva Savieckaj Armii».

Ihar Hirkin na svaim kanale adkryta ździekujecca z rasijskaj armii. «Nu voś usio i vyśvietliłasia! Nasupierak šypieńniu zamiežnych ahientaŭ i złaśliŭcaŭ, MY ZNOŬ PIERAMAHLI! Nad avijabazaj stratehičnych bambavikoŭ u Enhielsie źbity ŭdarny bieśpiłotnik voraha. Ni adzin varožy aparat nie viarnuŭsia na svaju bazu! Chiba nie pośpiech? — kuražycca jon. — Ź nieciarpieńniem budu čakać uznaharodžańnia aficeraŭ SPA, jakija atrymali takuju važnuju i takuju patrebnuju ŭ pačatku 11-ha miesiaca SVA pieramohu. Jana budzie śviedčańniem taho, što i ŭ hłybokim tyle našy vajskoŭcy mohuć ździajśniać podźvihi, demanstrujučy cudy prafiesijanalizmu, u čym niesumniennaja zasłuha (u tym liku) i kiraŭnictva MA RF».

«Da pačatku biahučaj vajny našy SPA padyšli hatovymi da minułaj kałanijalnaj vajny», — prychodzić Hirkin da vysnovy.

«Troje zahinułych. U hłybokim tyle, za sotni kiłamietraŭ ad linii frontu. I nie treba iluzij — Kijeŭ nie spynicca, pry pieršaj ža mahčymaści ŭdaryć i pa Maskvie», — piša ŭ svaim kanale karespandent Andrej Miadźviedzieŭ.

• 146
• 32
• 5
• 4
• 11
• 11