Ministerstva achovy zdaroŭja zaklikaje žycharoŭ Biełarusi ŭ pieryjad rostu zachvorvańnia na hryp nasić zaścierahalnyja maski. Pra važnaść hetaj prafiłaktyčnaj miery zajaviŭ pieršy namieśnik ministra achovy zdaroŭja Robiert Časnojć 30 kastryčnika na pres‑kanfierencyi ŭ Minsku.
Pavodle jaho słoŭ, vykarystańnie zaścierahalnaj maski ŭ pieryjad uzdymu zachvorvańnia na hryp — vielmi važnaja prafiłaktyčnaja miera, i biełarusam treba pryvykać da jaje.
Jak zaznačyŭ načalnik adździeła hihijeny, epidemijałohii i prafiłaktyki Ministerstva achovy zdaroŭja Juryj Fiodaraŭ, najvažniejšaj prafiłaktyčnaj mieraj źjaŭlajecca vakcynacyja suprać hrypu. Sioleta za košt srodkaŭ respublikanskaha biudžetu było raskuplena 866 tys. doz vakcyn suprać hrypu, što na 178 tys. bolš, čym u 2008‑m. Aprača taho, dadatkova vakcyna zakuplajecca sa srodkaŭ miascovych biudžetaŭ i arhanizacyj.
Sioleta ad hrypu płanujecca pryščapić 1 młn. 66 tys. žycharoŭ Biełarusi — 12‑13% ad usiaho nasielnictva. Heta ŭzrovień pryščeplenaści suprać hrypu, rekamiendavany Suśvietnaj arhanizacyjaj achovy zdaroŭja, zaznačyŭ Fiodaraŭ. Biaspłatna buduć pryščeplivacca ludzi, u jakich zachvorvańnie na hryp moža vyklikać ciažkija nastupstvy: dzieci ad 6 miesiacaŭ da 3 hadoŭ, dzieci z 3 hadoŭ, darosłyja z chraničnymi zachvorvańniami i inš. Aprača taho, biaspłatnyja pryščepki atrymajuć tyja, chto padviarhajecca vysokaj ryzycy zarazicca hrypam: rabotniki lačebnych arhanizacyj, ustanoŭ adukacyi i h.d.
U pieryjad rostu zachvorvańnia na hryp i VRVI miedyki rekamiendujuć paźbiahać miescaŭ masavaha zboru ludziej, ciesnych kantaktaŭ z asobaj, jakaja zachvareła, a taksama padtrymlivać zdarovy ład žyćcia.
Pry pieršych simptomach hrypu nieabchodna terminova źviarnucca da ŭrača.
Kamientary