Sud nad hramadskaj aktyvistkaj ź Vierchniadźvinska Valancinaj Bołbat adbyŭsia 10 maja, sudovaje pasiadžeńnie viała sudździa Vierchniadźvinskaha suda Ludmiła Kavalenka.
Valancinu Bołbat sudzili pa dvuch artykułach — č. 2 art. 19.11 KaAP (raspaŭsiudžvańnie, vyrab, zachoŭvańnie, pieravozka infarmacyjnaj pradukcyi, jakaja źmiaščaje zakliki da ekstremisckaj dziejnaści abo jakaja prapahanduje takuju dziejnaść) i č. 1 art. 24.34 (parušeńnie paradku praviadzieńnia schodu, mitynhu, vuličnaha šeścia, demanstracyi, pikietavańnia, inšaha masavaha mierapryjemstva).
Heta ŭžo piaty sud nad hramadskaj aktyvistkaj ź Vierchniadźvinska, jakuju zatrymali ŭ kancy krasavika.
Pierad hetym Valancina Bołbat napisała ŭ fejsbuku:
«Siabry maje, vandravańni pa pakutach praciahvajucca — zatrymańnie, lakarnia, čarhovyja dva pratakoły pa sumna viadomych artykułach: č. 1. art. 24.34 i č. 2. art. 19.11. Čakaju suda. Zastalisia pazyki jašče ź minułych štrafaŭ, jakich u mianie było 130 bazavych, i apłata ŭtrymańnia ŭ CIPie Navapołacka. U banku chacieła ŭziać kredyt, admovili.
Nie dumała, što amal u 70 hod svajho žyćcia mahu akazacca ŭ takoj situacyi. Stolki zrabiŭšy dla rajona, dla chvorych dzietak, šmatdzietnych siemjaŭ. Pra maju hramadskuju pracu i pracu maich kaleh možna pisać knihu. A pišucca milicejskija pratakoły. Hetyja paŭhoda stali krytyčnymi i dla zdaroŭja. Horka… Adčuvaju siabie jak na ćvintary kala carkvy».
Ahulnaja suma štrafaŭ, prysudžanych hramadskaj aktyvistcy, užo składaje bolš za 4 tysiačy rubloŭ, piša «Viciebskaja viasna», dajučy rekvizity, pa jakich možna dapamahčy žančynie materyjalna.
«Biełarusy buduć cichieńka dumać svajo. A vada kamień točyć, dyj Łukašenka fizična nie viečny». Hłyboki manałoh byłoha mytnika Alesia Jurkojcia6
Kamientary