Maršrutki i taksi pastaviać pad poŭny kantrol siłavikoŭ. Pasažyraŭ buduć zapisvać na videa
Na pravavym forumie Biełarusi vystaŭleny na hramadskaje abmierkavańnie prajekt ukaza Alaksandra Łukašenki «Ab aŭtamabilnych pieravozkach pasažyraŭ», jaki siarod inšaha praduhledžvaje stvareńnie adzinaha dziaržaŭnaha rejestra maršrutak i taksi.
U dakumiencie zafiksujuć źviestki ab pieravozčykach, transpartnych srodkach, kiroŭcach, dyśpietčarach taksi i dyśpietčarach pieravozak pasažyraŭ. Biez uklučeńnia ŭ rejestr kiroŭcy i pieravozčyki pracavać nie zmohuć.
Uklučeńnie ŭ rejestr płanujecca zrabić płatnym. Za ŭniasieńnie infarmacyi pra kiroŭcu daviadziecca zapłacić 1 bazavuju vieličyniu, pra transpartny srodak — 2 bazavyja, pra kampaniju-dyśpietčara — 100 bazavych vieličyń. Za źmianieńnie źviestak u rejestry praduhledžvajecca apłata pamieram ad 0,5 da 1 bazavaj vieličyni.
Taksama dyśpietčary i pieravozčyki buduć abaviazanyja:
- vykarystoŭvać dla pracy tolki prahramy i infarmacyjnyja resursy (u tym liku prahramy dla atrymańnia zamoŭ ad klijentaŭ), raźmieščanyja na biełaruskich siervierach i zarehistravanyja ŭ adpaviednych dziaržaŭnych rehistrach. Vykarystańnie inšych infarmacyjnych sistem zabaraniajecca, u takim vypadku dziejnaść budzie karacca jak niezakonnyja pieravozki. U tym liku nielha karystacca zamiežnymi prahramami i kiroŭcam;
- fiksavać usie zamovy, u tym liku atrymanyja anłajn, i vieści ich ulik, zachoŭvać infarmacyju pra zamovy piać hadoŭ;
- davać siłavikam, a taksama kantralujučym i inšym datyčnym dziaržaŭnym orhanam dostup da infarmacyi ab zamovach i infarmacyi ŭ asabistym kabiniecie pieravozčyka. Hety dostup pavinien być biaspłatnym i dystancyjnym na praciahu 24 hadzin u dzień. Hetyja resursy i bazy źviestak pavinnyja być technična raźmieščanyja na terytoryi Biełarusi;
- ustanavić u sałonach mašyn i aŭtobusaŭ kamiery dla videafiksacyi pracesu pieravozki pasažyraŭ. Zachoŭvać zapisy pieravozčykam na praciahu miesiaca i tolki na resursach, raźmieščanych u Biełarusi.
Čym siońnia zajmajucca niekali viadomyja hieroi ŽŽ? Spojler: mnohija tak i nie zakinuli błohierstva1
Kamientary