Kampanii ŭsio čaściej šukajuć supracoŭnikaŭ-«apaviadalnikaŭ»

Novaja haračaja vakansija — «apaviadalnik» (storyteller) — u karparatyŭnaj Amierycy nasamreč źjaŭlajecca adnoj z najstarejšych prafiesij u historyi. Adnak, kali vy ŭjaŭlajecie sabie ramantyčnyja pasiadziełki la vohnišča i zachaplalnyja bajki, to pamylajeciesia. U realijach sučasnaha biznesu ŭmieńnie raskazvać historyi — heta prahmatyčny i žorstki instrumient.

Kampanii pa-roznamu traktujuć hety termin. Dla adnych «apaviadalnik» — heta prosta bolš pryhožaja i hučnaja nazva dla mieniedžara pa suviaziach sa ŚMI. Dla inšych — heta zusim novaja rola: śpiecyjalist, jaki stvaraje błohi, padkasty, razbory kiejsaŭ i inšy kantent, kab pryciahnuć uvahu klijentaŭ i inviestaraŭ.

Naprykład, Google niadaŭna šukaŭ mieniedžara ŭ kamandu dla stvareńnia klijenckich historyj u kamandu Google Cloud. Adzin z artykułaŭ, apublikavanych hetym padraździaleńniem u biahučym hodzie, raskazvaŭ pra toje, jak štučny intelekt dapamahaje stvarać interaktyŭny šopinh u bujnoj handlovaj sietcy.

Microsoft pajšoŭ jašče dalej i šukaje dyrektara ŭ adździeł kibierbiaśpieki, jaki budzie adkazvać za naratyŭ i stvareńnie historyj. Ad kandydata patrabujecca być univiersalnym sałdatam: adnačasova technołaham pa kibierbiaśpiecy, kamunikataram i markietołaham.

A papularny dadatak dla praduktyŭnaści Notion uvohule abjadnaŭ pijarščykaŭ, smmščykaŭ i mieniedžaraŭ pa pracy z błohierami ŭ adnu vialikuju kamandu z 10 čałaviek, jakaja zajmajecca vyklučna «napisańniem historyj».

Jak adznačajuć aŭtary artykuła, hrošy ŭ hetaj nišy kruciacca niemałyja. Technałahičnaja kampanija Vanta, jakaja zajmajecca prahramnym zabieśpiačeńniem, niadaŭna adkryła vakansiju kiraŭnika hetaha napramku z zarobkam da 274 000 dalaraŭ na hod.

Čamu ŭsie raptam stali apaviadalnikami?

Moda na hučnyja pasady ŭ technałohijach užo była: šmat chto pamiataje časy «nindzia-raspracoŭščykaŭ», «zorak SEO» i «ličbavych prarokaŭ». Ciapier, piša WSJ, u topie słova «apaviadalnik». I heta vyklikaje razdražnieńnie ŭ častki ludziej tvorčaj śfiery.

Vydańnie cytuje słovy dyzajniera Stefana Zahmajstera:

«Ludzi, jakija sapraŭdy raskazvajuć historyi — ramanisty i kinarežysiory — nie nazyvajuć siabie apaviadalnikami. Heta robiać tyja, chto imi nie źjaŭlajecca».

Ale statystyka pakazvaje: termin sapraŭdy zachoplivaje karparatyŭnuju Amieryku. Kolkaść vakansij na LinkedIn z vykarystańniem terminaŭ, što abaznačajuć «stvaralnika historyj», za hod padvoiłasia.

Kiraŭniki kampanij vykarystoŭvali hety termin u svaich spravazdačach pierad inviestarami 469 razoŭ u hetym hodzie (dla paraŭnańnia: u 2015 hodzie takich zhadak było ŭsiaho 147).

WSJ tłumačyć hety ŭsplosk fundamientalnymi źmienami ŭ miedyjałandšafcie. Kampanii dziesiacihodździami spadziavalisia na biaspłatnaje pablisici praz tradycyjnyja ŚMI, ale hety kanał zvuziŭsia: u ZŠA, pavodle apošnich nacyjanalnych acenak, u prafiesii «analityki navin, reparciory i žurnalisty» zastałosia krychu bolš za 49 tysiač čałaviek — značna mienš, čym u 2000 hodzie.

Drukavanaja presa taksama asłabła: nakłady haziet z 2005‑ha ŭpali prykładna na 70%, a naviedvalnaść sajtaŭ sta najbujniejšych vydańniaŭ u siarednim skaraciłasia bolš čym na 40% za apošnija čatyry hady.

Zatoje ŭ karparacyj źjavilisia ŭłasnyja mahutnyja kanały: sacsietki, YouTube, ułasnyja miedyja i rassyłki. Kampanii sami stanoviacca vydaviectvami, i im patrebnyja ŭłasnyja aŭtary.

Faktar štučnaha intelektu

Styŭ Chirš, kiraŭnik kamunikacyjnaha ahienctva ŭ Ńju-Jorku, adznačaje jašče adnu važnuju pryčynu papularnaści žyvych apaviadalnikaŭ: stomlenaść ad štučnaha intelektu.

«Hienieratyŭny štučny intelekt stvaraje stolki infarmacyjnaha śmiećcia, što heta sparadžaje niedavier. Hienieralnyja dyrektary razumiejuć: siońnia vyjhrajuć tyja brendy, jakija vyhladajuć najbolš aŭtentyčnymi, čałaviečnymi i blizkimi da ludziej. Im patrebnaja stratehija kantentu, a nie prosta suchi pres-reliz», — tłumačyć Chirš.

Mienavita tamu na hetyja pasady časta najmajuć byłych žurnalistaŭ. Jak adznačaje vydańnie, kali fintech-kampanija Chime adkryła vakansiju dyrektara pa karparatyŭnych siužetach, bolšaść z 500 kandydataŭ składali mienavita vychadcy z tradycyjnych ŚMI. Jany ŭmiejuć šukać sapraŭdnyja žyćciovyja historyi, a nie prosta pisać rekłamnyja łozunhi.

Jak tłumačyć dyrektarka pa karparatyŭnych kamunikacyjach Dženifier Kupierman z Chime, takija terminy, jak «redaktar», zanadta abmiažoŭvajuć.

«Stvarać historyi možna roznymi sposabami — praz sacyjalnyja sietki, padkasty, publičnyja vystupleńni kiraŭnikoŭ ci navat arhanizacyju iventaŭ», — ličyć jana.

Jak adznačaje aŭtar artykuła, tendencyja zakranuła navat niekamiercyjny siektar. Nacyjanalnaja fiederacyja dzikich indyčak (NWTF) niadaŭna pačała šukać užo treciaha štatnaha «apaviadalnika». U arhanizacyi ličać, što takaja nazva pasady dapamahaje znajści najlepšyja talenty — ludziej, jakija chočuć adčuvać siabie nieadjemnaj častkaj ahulnaj historyi, a nie prosta kapirajtarami.

• 0
• 0
• 0
• 2
• 0
• 0
• 0
• 0