Padarvaŭ siabie, kab vorahu nie dastałasia radyjostancyja: u Lvovie raźvitalisia z Hierojem Ukrainy
Ihar Daško zahinuŭ u krasaviku 2022 hoda, ale cieła addali tolki ciapier.
U Lvovie raźvitalisia z Hierojem Ukrainy, aficeram-pamiežnikam Iharam Daško, jaki ŭ krasaviku 2022 hoda padarvaŭ siabie ŭ zabłakavanym rasiejcami Maryupali, kab vorahu nie dastałasia radyjostancyja.
21 červienia ŭ harnizonnym chramie Śviatych apostałaŭ Piatra i Paŭła ŭ Lvovie padčas panichidy ŭšanavali pamiać Hieroja i praviali haradskuju cyrymoniju raźvitańnia z voinam.
Cieła zahinułaha hod tamu voina addali ziamli tolki ciapier, bo praciahvaŭsia praces viartańnia cieła, praviadzieńnia adpaviednych ekśpiertyz, u tym liku DNK-ekśpiertyzy. Čyn pachavańnia staŭ mahčymym pa vynikach hetaj praciahłaj pracy, jak piša «Ukrainskaja praŭda».
Raźvitacca z pabracimam pryjšli pradstaŭniki administracyi Dziaržaŭnaj pamiežnaj słužby Ukrainy, kalehi i piersanał Zachodniaha rehijanalnaha ŭpraŭleńnia, 1-ha pamiežnaha atrada i 23-ha atrada marskoj achovy, haradžanie.
Ihara Daško pachavali na Marsavym poli.
Za asabistuju mužnaść i hieraizm, prajaŭlenyja ŭ abaronie dziaržaŭnaha suvierenitetu i terytaryjalnaj cełasnaści Ukrainy, samaaddanaje słužeńnie ŭkrainskamu narodu ŭ krasaviku 2022 hoda prezident Uładzimir Zialenski prysvoiŭ Daško zvańnie Hieroj Ukrainy (paśmiarotna). Taksama aficeru paśmiarotna prysvoili voinskaje zvańnie «pałkoŭnik». U jahony honar nazvali vulicu ŭ Lvovie.
Kamientary