Daśledavańnie pakazvaje, što papiarovyja kubački taksama škodnyja dla navakolnaha asiarodździa
U apošnija hady mnohija sietki hramadskaha charčavańnia zamianili adnarazovyja kubački z płastyka na papiarovyja, kab paźbiehnuć zabrudžvańnia płastykam i jaho nazapašvańnia na śmietnikach. Ale pavodle apošnich daśledavańniaŭ i papiarovy kubačak, ź jakim my adčuvajem siabie adkaźniej, vychodziačy z kaviarni, taksama nie spryjaje ekałohii i zdaroŭju.
Daśledavańnie, apublikavanaje ŭ žniŭni ŭ časopisie Environmental Pollution, pakazvaje, jak papiarovyja kubački mohuć vyłučać taksičnyja rečyvy ŭ navakolnaje asiarodździe. Heta adbyvajecca tamu, što papiarovyja kubački časta pakryvajucca słojem polimałočnaj kisłaty, inakš viadomaj jak PLA (polylactic acid), jakaja pazicyjanujecca i rekłamujecca jak bijapłastyk ci bijaraskładalnaja alternatyva tradycyjnamu płastyku.
Daśledčyki z Univiersiteta Hioteborha vyrašyli pravieryć uździejańnie jak płastykavych, tak i papiarovych kubačkaŭ na navakolnaje asiarodździe i pratestavali ich na ličynkach mošak. Abodva typy kubkaŭ stavili ŭ vadu ci ŭ asadkavyja parody na termin da čatyroch tydniaŭ, a zatym u akvaryumy z hetymi rečyvami źmiaščali mošak. Zabrudžanyja parody i vadu daśledavali asobna.
U vyniku daśledčyki vyjavili, što prablemy z rostam i zatrymki ŭ raźvićci nasiakomych naziralisia ŭžo paśla adnaho tydnia vyłučeńniaŭ taksičnych rečyvaŭ u testavaje asiarodździe. Ź ciaham času niehatyŭnyja nastupstvy tolki ŭzmacnialisia. Takim čynam była zroblena vysnova, što choć PLA sapraŭdy razburajecca chutčej, čym tradycyjny płastyk na asnovie vykapniovaha paliva, ale jon nie našmat biaśpiečniejšy.
Bijapłastyki nie razburajucca efiektyŭna, kali traplajuć u navakolnaje asiarodździe, u pryvatnaści ŭ vadu, i źmiaščajuć prynamsi stolki ž chimikataŭ, kolki i zvyčajny płastyk, kažuć aŭtary daśledavańnia. Inšyja papiarednija daśledavańni pakazali, što płastykavaje pakryćcio ŭ papiarovych kubačkach taksama moža stvarać mikrapłastyk, jaki traplaje ŭ vadkaść u kubku.
Gizmodo piša pra ekśpierymient 2019 hoda, kali daśledčaja hrupa ź Indyi napoŭniła papiarovyja kubački haračaj vadoj i vyjaviła, što praz 15 chvilin u kubku abjomam 100 mł było kala 25 000 mikračaścic. A pra žachlivaje ŭzdiejańnie na arhanizm žyvych istot mikrapłastyka, jaki moža traplać u samyja roznyja orhany (u tym liku mozh, nyrki i lohkija), my pisali zusim niadaŭna.
Daśledčyki zajavili, što adnym z najlepšych sposabaŭ paźbiehnuć raspaŭsiudžvańnia płastykavych taksinaŭ i mikrapłastyku budzie poŭnaja admova ad adnarazovych pradmietaŭ, jakija masava źjavilisia na rynku paśla Druhoj suśvietnaj vajny. Ludzi zvykli biazdumna kuplać i vykidać samyja roznyja rečy. Ciapier nam treba viarnucca i adyści ad adnarazovaha ładu žyćcia, kažuć navukoŭcy.
Čytajcie taksama:
Mikrapłastyk moža traplać u mozh i vyklikać źmieny ŭ pavodzinach — novaje daśledavańnie
Mikrapłastyk — adna z hałoŭnych pahroz zdaroŭju ŭ XXI stahodździ. Ale navukoŭcy znajšli rašeńnie
Kamientary
dakładna tak. ale jak heta ŭ masie zrabić? jak masie ludziej pryvić ekałahičnaje spažyvańnie, kali jany razbeščany supierspažyvańniem?