Rasijskaje Minpracy raskryła maštaby mahčymych strat na vajnie va Ukrainie
Ministerstva pracy i sacyjalnaj abarony Rasii zamoviła amal miljon paśviedčańniaŭ dla vieteranaŭ bajavych dziejańniaŭ i svajakoŭ zahinułych vieteranaŭ vojnaŭ i invalidaŭ. Taki tendar vyjavili na partale dziaržzakupak. Hetyja ličby mohuć uskosna śviedčyć ab prykładnych maštabach strat u rasijskich vojskach, jakija ŭdzielničajuć u bajach va Ukrainie, piša vydańnie «Viorstka».
Pavodle materyjałaŭ tendara, rasijskaje Minpracy zamoviła 757 305 paśviedčańniaŭ vieterana bajavych dziejańniaŭ i 230 000 paśviedčańniaŭ dla «členaŭ siamji zahinułaha (pamierłaha) invalida vajny, udzielnika Vialikaj Ajčynnaj vajny i vieterana bajavych dziejańniaŭ».
U dakumientacyi paznačana, što 600 tysiač addrukavanych paśviedčańniaŭ udzielnikaŭ bajavych dziejańniaŭ raźmiarkujuć u Minabarony, 86 805 — u Ministerstva sacyjalnaj abarony, 60 tysiač — u MUS, 10 tysiač — u Rashvardyju, 500 — u Minbud.
Što tyčycca paśviedčańniaŭ dla členaŭ siamji zahinułych, to 200 tysiač raźmiarkujuć u Minabarony, jašče 30 tysiač — u Minsacabarony.
U pieralik tych, kamu naležać paśviedčańni «člena siamji zahinułaha (pamierłaha) invalida vajny, udzielnika Vialikaj Ajčynnaj vajny i vieterana bajavych dziejańniaŭ», z červienia hetaha hoda ŭ Rasii ŭklučajucca nie tolki svajaki sałdat rehularnaj armii, ale i zahinułych na vajnie dobraachvotnikaŭ.
Raniej, u traŭni 2023 hoda, viedamstva zaklučyła dziaržkantrakt koštam 14 młn rubloŭ na druk dakumientaŭ, siarod jakich taksama byli 95 907 paśviedčańniaŭ vieteranaŭ bajavych dziejańniaŭ i 23 716 dla členaŭ siemjaŭ zahinułych.
Letaś maštaby druku paśviedčańniaŭ byli značna mienšyja. Uletku 2022 hoda Minpracy zamaŭlaŭ druk 82 840 błankaŭ paśviedčańniaŭ vieteranaŭ bajavych dziejańniaŭ i 5 777 paśviedčańniaŭ dla členaŭ siamji zahinułaha.
Usiaho ž za čas vajny Minpracy ŭžo zamoviła ŭ ahulnym liku 936 052 paśviedčańniaŭ dla vieteranaŭ bajavych dziejańniaŭ.
Kamientary