«Napeŭna, usio prapłačana». Dalnabojniki stajać na polska-biełaruskaj miažy bolš za tydzień
Na miažy Polščy i Biełarusi z polskaha boku vystrailisia šmatkiłamietrovyja čerhi fur. Pavodle infarmacyi krynicy vydańnia Mostmedia.io, niekatoryja fury stajać u čarzie ŭžo dziasiatyja sutki. Kiroŭcy źviazvajuć heta z tym, što asobnyja aŭtamabili na «lipavych» padstavach pierasiakajuć miažu ŭ pryjarytetnym paradku.
Adzin z dalnabojnikaŭ raskazaŭ Mostmedia.io, što za vosiem dzion prasunuŭsia ŭsiaho na 20 kiłamietraŭ: kali zajazdžaŭ u kalejku, da miažy było kala 42 kiłamietraŭ, a ciapier — prykładna 22. Dla jaho takaja situacyja biesprecedentnaja. Raniej 40 kiłamietraŭ jon prachodziŭ maksimum za čatyry dni.
«Navat nie viedajem, kudy pisać i prasić, kab nie ździekavalisia z nas», — emacyjna raskazvaje jon.
Pavodle infarmacyi surazmoŭcy, pamiežny i mytny kantrol z boku Polščy pracuje ŭ zvyčajnym režymie. Usia prablema ŭ aŭtamabilach, jakija prajazdžajuć biez čarhi. Jon kaža, što heta fury na numarach LLB i LLU — heta numary Lubartaŭskaha i Łukaŭskaha pavietaŭ Lublinskaha vajavodstva. Polskaja palicyja prapuskaje ich, a inšych dalnabojnikaŭ, jakija sprabujuć abjechać čarhu, štrafujuć.
«Napeŭna, usio prapłačana. Jak pa-inšamu?» — miarkuje jon.
«Jeduć nibyta da siabie na bazu, a adtul abjazdžajuć kalejku»
Inšy surazmoŭca, znajomy ź situacyjaj na miažy, paćviardžaje: kiroŭcy, jakija nie prabivajucca napierad u abychod, stajać kala tydnia.
«Numary LLB jeduć jak by da siabie na bazu. Ich prapuskaje palicyja ŭ Miendzyžacy. A ŭžo adtul jany sprabujuć abjazdžać kalejku dalej — nibyta jeduć na agencja celna, jakaja raźmieščana pierad samaj miažoj. Ich tam taksama prapuskajuć biez čarhi».
U łukaŭskich pieravozčykaŭ (numary LLU) taksama jość farmalnyja padstavy prajazdžać biez čarhi, bo tam jość ułasnaść transpartnaj kampanii, aŭtamabili jakoj zarehistravanyja ŭ tym rehijonie.
«Kala Kukuryk jany vykupili ziamlu i zrabili tam svaju bazu. Fury na numarach LLU nibyta viartajucca na svaju bazu, a nasamreč jeduć na miažu, zamytnivajucca i jeduć u Biełaruś», — śćviardžaje krynica Mostmedia.io.
Akramia taho, pa-za čarhoj jeduć pieravozčyki, u jakich jość adpaviednyja dakumienty (naprykład, pra toje, što ichni hruz chutka psujecca). Šmat kamu, pa słovach udzielnika hetaj haliny, atrymlivajecca zrabić takija ž, ale «lipavyja» dakumienty.
«Frachty ciapier vyraśli na 50%. Tamu kiroŭcy hatovyja płacić i štrafy za toje, što abjazdžajuć kalejku. Kamu płaciać nie pasutačna, a ad frachtu, toj ryzykuje. Umudrajucca abjechać kalejku», — kaža surazmoŭca.
Jon viedaje niekalkich kiroŭcaŭ, jakija za tydzień užo dva razy pierasiekli miažu, ale zhadžajecca, što inšyja ŭvieś hety čas stajać u čarzie.
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj34
Kamientary