Biełarusy ŭ tyktoku chvalacca tym, jakija sałodkija padarunki im dali dla dziaciej na pracy. Ale nie ŭsim paščaściła atrymać dobry nabor cukierak. Adna z supracoŭnic dziciačaha sadka ŭ Śvietłahorsku raspaviała, što jaje dziciaci prafkam padaryŭ dźvie tannyja šakaładki Alpen Gold.
Błohierka źniała raspakoŭku padarunka ad prafkama — ale videa pad navahodniuju muzyku atrymałasia vielmi karotkim. Bo ŭ maleńkim pakieciku navat i pakazać nie było čaho. «Navahodni padarunak dzieciam!!! Rabotnikam dziciačaha sada h. Śvietłahorska!!! DZIAKUJ PRAFKAMU!!!» − miarkujučy pa kolkaści kličnikaŭ u podpisie da rolika, padarunak žančynu chutčej abraziŭ, čym paradavaŭ.
Za dva dni videa nabrała amal paŭmiljona prahladaŭ i vyklikała aktyŭnuju dyskusiju. Kaniešnie, znajšlisia tyja, chto pačaŭ pisać, što treba radavacca tamu, što dali choć niešta. «Što nie tak? Čaho vy čakali?» — pacikaviłasia adna z kamientatarak. Atrymaŭšy adkaz ad aŭtarki videa: «Padarunak u skrynačcy, chacia b 500 hram», — jana, zdajecca, pakryŭdziłasia i napisała: «Chacia b? Mahli b ničoha nie padaryć».
Inšyja aburalisia, što za hod pieraličvajuć u prafkam členskimi ŭznosami našmat bolšuju sumu, čym košt dźviuch šakaładak.
«Nam na Novy hod nie daryli padarunki. Arhumientam było toje, što źbirajuć na pucioŭku dla ŭsiaho kalektyvu na ekskursiju. Spojler: nikudy my nie pajechali i padarunkaŭ niama», − paskardziłasia jašče adna kamientatarka.
Źjavilisia ŭ kamientaryjach i tyja, chto sam pracuje ŭ prafkamie. Adna žančyna prapanavała błohiercy zaniać miesca staršyni prafkama i ŭ nastupnym hodzie padaryć kožnamu supracoŭniku pa «Fierary». «Sama z hetym sutykałasia. Pakul vypłaciš na naradžeńnie, na jubilej, na pachavańnie, hrošaj zusim nie zastajecca, a jašče pakinuć na 23 Lutaha i 8 Sakavika taksama treba», − dadała jana.
Jašče adna supracoŭnica prafkama taksama paskardziłasia: «Ja staršynia, dapłaty za heta nie atrymlivaju. Z pamahatych tolki skarbnik, usio astatniaje sama. Dastała žudasna. Ciapier da Novaha hoda davali siertyfikaty na 300 rubloŭ, heta nie ličačy cukierak dzieciam i biletaŭ, i to niekatoryja aburalisia, što možna było i ŭ inšuju kramu, heta nie padabajecca».
Niechta paraiŭ błohiercy vyjści z prafkama, ale jana adkazała, što heta niemahčyma. Inšyja kamientatary pačali dzialicca ŭłasnym dośviedam:
«Mahčyma, ale hetamu buduć pieraškadžać i pahražać zvalnieńniem», «Ja paśla pieršaha hoda pracy ŭ dziciačym sadku vyjšła z prafsajuza. Z cukierak byli praktyčna ŭsie ledziašy, jašče i na pakiet fasovačny treba było zdać», «Na kantrakcie nie mocna vyjdzieš, kali chočaš pracavać. Načalnika pakarajuć. Unioski iduć 60% na patreby prafsajuza, 40% u rajkam prafsajuza», «U nas jak tolki vyjdzieš, adrazu pazbaŭlaješsia ŭsich premij i nadbavak».
Čytajcie taksama:
Kaŭbasy, syry, hrašovyja siertyfikaty. Što pakłali rabotnikam zavodaŭ u navahodnija padarunki
Rolu «najlepšych ludziej horada» na sustrečy z Łukašenkam u Vietcy vykonvaŭ prafsajuzny aktyŭ
Minčuki rasčaravanyja salutam na Dzień horada — šmat kamientaroŭ5
Kamientary