Čat biełarusaŭ u Hdańsku, chutčej za ŭsio, akazaŭsia pad kantrolem siłavikoŭ
Kantrol nad čatam «Biełarusy ŭ Hdańsku» pierachapili siłaviki, da takoj vysnovy pryjšoŭ uładalnik čata paśla razmovy z adnym z administrataraŭ.
Dziaŭčyna ŭvieś hety čas znachodziłasia ŭ Biełarusi, ale apošnim časam pačała pavodzić siabie dziŭna i nietypova reahavać. Pra heta stała viadoma Jeŭraradyjo.
Uładalnika naściarožyła, što «niekatory čas tamu byŭ pryznačany dadatkovy admin — z takim ža imiem Jaŭhienija», ale sama Jaŭhienija pry hetym ničoha kaleham nie skazała, chacia aktyŭna kamunicyravała pa inšych roznych pytańniach. Zatym 7 studzienia znoŭ biez papiaredžańnia pravy na čat byli pieradadzieny treciamu akaŭntu. Adkaz «heta moj druhi akaŭnt» naściarožyŭ, tamu što heta byŭ užo treci.
«A potym kamunikacyja z čałaviekam pryviała da razumieńnia, što sa mnoj razmaŭlaje chutčej za ŭsio mužyk — łajki nie stavić, frazy kštałtu «nu jak sam-ta» i h.d.», — zaznačaje ŭładalnik čata. Źjavilisia i inšyja niecharakternyja frazy i reakcyi.
Ale hałoŭnaje, «jana, jakaja pastajanna siadzić u Telegram, stanaviłasia anłajn prykładna raz u dźvie hadziny. Naprykład, 17.00—17.20 pa Minsku. Potym 19.00—19.20 pa Minsku. I tak da hadziny nočy pa Minsku. Tendencyja była vielmi dakładnaj i možna było mierkavać — dziažurać», — zaznačaje ŭładalnik.
Akramia taho źjaviłasia infarmacyja, što ŭ administratara «Biełarusaŭ u Hdańsku» prajšoŭ pieratrus.
Uładalnik pryniaŭ rašeńnie stvaryć novy čat. Paśla hetaha ŭ starym źjaviŭsia zaklik «nie vieścisia na ŭkidvańni», pakinuć unutranyja supiarečnaści sa starym suadminam «v iźbie» i praciahnuć razmovy tut.
Adznačym, što čat «Biełarusy ŭ Hdańsku» mieŭ kala 5 tysiač udzielnikaŭ i byŭ najbujniejšaj placoŭkaj dla znosin biełarusaŭ u Trujmiasta (haradskoj ahłamieracyi na poŭnačy Polščy, jakaja składajecca z Hdańska, Sopata i Hdyni, a taksama niekalkich nievialikich haradoŭ i pradmieściaŭ).
Tur anansuje, što Łukašenku napišuć na vybarach bolš za 90%6
Kamientary