Pieramožcaj konkursu «Mis Japonija» stała całkam etničnaja ŭkrainka. I heta vyklikała haračuju dyskusiju ŭ krainie
Adnyja zajavili, što pieramoha Karaliny źjaŭlajecca «znakam času», inšyja kateharyčna stajali na tym, što «mis Japonija» pavinna vyhladać pa-inšamu.
Pieramožcaj konkursu «Mis Japonija» 2024 hoda stała ŭradženka ŭkrainskaha Ciarnopala Karalina Siina. Pryčym jana stała nie tolki pieršaj pieramožcaj konkursu, jakaja naradziłasia za miežami Japonii, ale i samaj starejšaj (26 hadoŭ), piša Bi-bi-si.
Atrymlivajučy karonu i płačučy ad radaści, Karalina na biezdakornaj japonskaj movie skazała, što ŭsio, što adbyvajecca «padobna na son».
«Z taho momantu, jak ja pačuła svajo imia, Ja nie pierastaju płakać. Mnie davodziłasia pieraadolvać barjery, kali mianie nie ŭsprymali jak japonku, tamu ja poŭnaja padziaki za toje, što na hetym konkursie mianie japonkaj pryznali», — padzialiłasia jana z hledačami.
Karalina naradziłasia ŭ Ciarnopali ŭ 1998 hodzie ŭ samaj zvyčajnaj ukrainskaj siamji. Ale potym jaje maci vyjšła zamuž za japonca, i jany pierajechali ŭ Nahoja, kali dziaŭčyncy było ŭsiaho piać hadoŭ. Jana davoli chutka zahavaryła na movie svajoj novaj krainy, adčuŭšy siabie japonkaj «jak u razmovach, tak i ŭ dumkach», ale, stalejučy, stała sa škadavańniem zaŭvažać, što ŭsie bačać: jana vyhladaje nie tak, jak miascovyja dziaŭčaty.
Karalina padała zajavu na konkurs «Mis Japonija» paśla atrymańnia hramadzianstva krainy ŭ 2022 hodzie. Pavodle jaje słoŭ, jana zrabiła heta dla taho, kab «stvaryć hramadstva, u jakim pra ludziej nie sudzili b pa ich źniešnaści».
Jak by tam ni było, ale toj fakt, što Karalina — pieršaja nie japonka, jakaja stała «Mis Japonija», padliŭ aleju ŭ ahoń sprečak pra toje, što ž usio-taki aznačaje być japoncam.
U toj čas jak častka zajaviła, što jaje pieramoha źjaŭlajecca «znakam času», inšyja kateharyčna stajali na tym, što «mis Japonija» pavinna vyhladać pa-inšamu.
Kali ŭ 2015 hodzie pradstaŭnicaj Japonii na konkursie «Mis Suśviet» stała Aryjana Majamota, čyjoj maci była japonka, a baćkam — afraamierykaniec, heta taksama vyklikała nieadnaznačnuju reakcyju siarod karystalnikaŭ sacsietak.
20-hadovaja Aryjana atrymała tysiačy vinšavańniaŭ, ale i niamała krytyčnych zaŭvah z boku tych, chto ličyŭ, što jana «niedastatkova padobnaja na japonku».
Ale ŭ žyłach Karaliny Siina, niahledziačy na jaje bliskučaje viedańnie movy i kultury, naohuł nie ciače ni kropli japonskaj kryvi.
U adnym z pastoŭ u Ch mienavita hety fakt i stavicca joj u vinu: «hetaja asoba, jakuju vybrali Mis Japonijaj, naohuł da Japonii nie maje dačynieńnia. Jana na 100% ukrainka. Zrazumiejcie mianie pravilna, jana — vielmi pryhožaja, ale konkurs nazyvajecca «Mis Japonija». Dzie tut japonskaść?»
«Kali b jana była chacia b napałovu [japonkaj], to heta, viadoma, prablemaj by nie było. Ale etnična jana na 0% japonka i navat naradziłasia nie ŭ Japonii», — padkreślivajecca ŭ inšym kamientary.
Pry hetym byli i tyja, chto paličyŭ, što pieramoha Karaliny źjaŭlajecca «dyskryminacyjaj japonskaj źniešnaści»: «Mnie zdajecca, što heta niapravilna, kali samaj pryhožaj japonkaj nazyvajuć dziaŭčynu ź jeŭrapiejskaj źniešnaściu», — abviaščaŭ adzin z kamientaroŭ.
Jašče adzin punkt hledžańnia — vybar ukrainskaj madeli byŭ palityčnym rašeńniem.
«Kali b jana naradziłasia ruskaj, to nikoli b nie pieramahła. Ni najmienšych šancaŭ u jaje b nie było. Heta — vielmi sumny dzień dla Japonii», — napisaŭ adzin čałaviek.
Ale hałoŭny arhanizatar konkursu «Mis Japonija hran-pry» Aj Vada skazała Bi-bi-si, što sudździ prysudzili pieramohu Karalinie, tamu što jana jaje zasłužyła. «Jana razmaŭlaje i piša na pryhožaj i pravilnaj japonskaj movie, — skazała Vada. — Jana bolš japonka, čym my»»
Sama Karalina paśla atrymańnia japonskaha hramadzianstva napisała ŭ Instagram, što, choć i «nie padobnaja na japonku», ale jaje mientalitet «staŭ japonskim», bo jana vyrasła ŭ hetaj krainie.
Siina — 56-ja pieramožca konkursu «Mis Japonija». Heta najstarejšy konkurs pryhažości ŭ krainie, jaki prachodzić z 1950 hoda. Jaho ŭ svoj čas zasnavała japonskaja hazieta «Jemiury simbun» dla adboru pasłoŭ dobraj voli dla pajezdki ŭ Złučanyja Štaty, kab vykazać padziaku za humanitarnuju dapamohu, jakuju ZŠA akazvali dzieciam, usio jašče niedajadali paśla zakančeńnia Druhoj suśvietnaj vajny.
Karona pieramožcy była ŭskładziena na hałavu Fudzika Jamamota. Paźniej jana stała adnoj ź viadučych aktorak Japonii i z 1952 pa 1963 hod źniałasia bolš čym u 100 filmach, u tym liku ŭ «Kolerach śviata Chihan» režysiora Jasidzura Odzu, za jaki atrymała pryz za najlepšuju žanočuju rolu. Jana ličyłasia adnoj z samych pryhožych žančyn Japonii, jakaja ŭvasablała čysta japonski ideał.
Byłaja deputatka Maryja Vasilevič sabrałasia zamuž FOTA12
Kamientary