Kryminalny sud Tajłanda treci raz padoŭžyŭ termin zatrymańnia pad vartaj ekipaža samalota Ił‑76.
Kryminalny sud Tajłanda 6 studzienia treci raz padoŭžyŭ na 12 dzion termin zatrymańnia pad vartaj ekipaža samalota Ił‑76, zatrymanaha ŭ śniežni ŭ Banhkoku z hruzam nielehalnaj zbroi.
Ahienctva Frans Pres sa spasyłkaj na pradstaŭnika śledstva majora Minhmontry Siryponha paviedamlaje, što termin źniavoleńnia pradoŭžany da 18 studzienia. «My zajavili sudu, što palicyi nieabchodna bolš času dla apytańnia jašče niekalkich śviedak, pravierki pašpartoŭ padazravanych, i sud pryniaŭ heta da ŭvahi», — skazaŭ jon. Pavodle jaho słoŭ,
sud admoviŭ u chadajnictvie boku abarony ab vyzvaleńni členaŭ ekipaža Ił‑76 pad załoh.
***
Jak raniej paviedamlałasia, samalot Ił‑76, zarehistravany ŭ Hruzii, amal z 40 tonami zbroi, u tym liku ručnymi hranatamiotami i pieranosnymi zienitna‑rakietnymi kompleksami, vyvaz jakich z KNDR zabaronieny rašeńniem Savieta biaśpieki AAN, byŭ zatrymany 11 śniežnia ŭ Banhkoku, dzie pryziamliŭsia dla dazapraŭki.
U składzie ekipaža byli čatyry hramadzianiny Kazachstana i hramadzianin Biełarusi Michaił Pietuchoŭ, jaki pracavaŭ bortinžynieram.
Pavodle tajskich zakonaŭ, lotčykam pahražaje pažyćciovaje turemnaje źniavoleńnie. Akramia taho, im mohuć być pradjaŭleny abvinavačańni ŭ nielehalnym zachoŭvańni vybuchovych rečyvaŭ, za što praduhledžvajecca pakarańnie ad dvuch hadoŭ pazbaŭleńnia voli da śmiarotnaj kary. Členy ekipaža śćviardžajuć, što nie viedali pra charaktar hruzu, a pieravozili abstalavańnie dla bureńnia naftavych śvidravin.
14 śniežnia kryminalny sud Banhkoka pastanaviŭ uziać pad vartu ekipaž samalota Ił‑76 i pradoŭžyŭ termin zatrymańnia na 12 dzion. Lotčyki znachodziacca ŭ banhkokskaj centralnaj turmie Kłonh Prom. Pavodle tajskich zakonaŭ, śledstva moža doŭžycca da 84 dzion ź pieryjadyčnym, raz u 12 dzion, pradaŭžeńniem miery strymańnia.
22 śniežnia premjer‑ministr Tajłanda Apchisit Viečačyva zajaviŭ, što rasśledavańnie pa spravie ab zatrymańni ŭ Banhkoku samalota Ił‑76 zavieršycca na nastupnym tydni, jaho vyniki buduć pradstaŭleny ŭ AAN.
U MZS Biełarusi praviarajuć infarmacyju ab novym padaŭžeńni terminu ŭtrymańnia pad vartaj biełaruskaha hramadzianina ŭ Tajłandzie.
Kamientary