Siarhiej Piatruchin raskazaŭ, jak u SIZA jaho sprabavali pieravieści ŭ «nizki status». Daviałosia ŭskryvać vieny
Aŭtar jutub-kanała «Narodny reparcior» Siarhiej Piatruchin u novym vypusku TOK apisaŭ situacyju, z-za jakoj jamu daviałosia ŭskryć sabie vieny.
Piatruchin zhadvaje, što kali išoŭ sudovy praces nad im, jon pisaŭ šmat skarhaŭ i chadajnictvaŭ. Mahčyma, heta pasłužyła nahodaj dla pieravodu jaho ŭ inšuju kamieru.
«My spuskajemsia na pieršy pavierch. Zavodziać mianie ŭ kamieru. I heta prosta žach. Prachodu niama. Usio brudnaje. Ścieny ciomna-zialonyja. Usio ŭ nikacinie. Śviatła niama. Stoli karyčnievyja. Padłoha brydkaja. Ja prosta ŭ šoku ad interjerčyka.
I tam dva takich čeła. Kali ja z adnym pačaŭ razmaŭlać, to paznaŭ. Jon z nami jechaŭ pa etapie, kazaŭ, što psichična chvory, były afhaniec. A druhi byŭ taki, što ja spačatku padumaŭ, što heta niejkaja śpitaja žančyna (zrazumieła, što takoha nie moža być). Tak jon drenna vyhladaŭ. I taki ŭ jaho hałasok.
Ja spytaŭ «Chłopcy, vy daŭno tut?» Jany kažuć, što hadzinu tamu ich pryviali siudy. Ja pačynaju razumieć».
Jak zhadvaje Piatruchin, u chodzie znajomstva vyśvietliłasia, što afhaniec abvinavačvaŭsia ŭ chulihanstvie, a druhi mužčyna siadzieŭ pa artykule za seksualnuju suviaź ź niapoŭnahadovaj.
«Nizki sacyjalny status» viaźniam nadaje administracyja, u kryminalnym asiarodździ takich aryštantaŭ nazyvajuć «pieŭniami». Hetyja ludzi zajmajucca pryborkaju, myjuć tualet, vynosiać śmiećcie. Pieradusim u takim pałažeńni akazvajucca viaźni, asudžanyja za seksualnyja złačynstvy. Ale kali niechta ščylna kamunikuje ź imi, moža «pieraniać» status.
«Ja vyrašyŭ, što treba ŭskryvacca. Pahrukaŭsia adrazu ŭ dźviery. Mianie vyvieli, spytali, što takoje. Ja kažu: «A čaho heta vy mianie pasadzili ź niejkim niezrazumiełym čałaviekam. Ja ź im nie budu siadzieć». Mnie kažuć: «Piatruchin, ty nie ŭ hateli. Ty budzieš siadzieć tam, dzie my skažam».
Pa słovach mužčyny, tady jon udakładniŭ, ci nie syšoŭ turemny doktar. Jamu adkazali, što doktar na miescy.
«Ja zajšoŭ u kamieru. Uziaŭ stanok dla haleńnia (tam vydajuć takija tannyja sinieńkija). Ja ž nikoli nie rezaŭsia. Čyk. Chiba małavata. «Małavata», — kaža chulihan. Ja druhi raz, treci. Jany adrazu stali hrukać u dźviery. Mianie ad ich zabrali. Zašyli. Dali 20 dzion karcaru».
Hladzicie całkam:
Jaŭhien Dudkin patłumačyŭ, čamu staŭ sakretnym ahientam KDB12
Kamientary