«Ja ŭpieršyniu ŭ žyćci ŭbačyŭ pistalet kala svajoj hałavy». Biełarusa abrabavali ŭ Buenas-Ajresie
«Nas źbivali pasiarod biełaha dnia, a pobač sabraŭsia natoŭp raziavak. Dziaŭčynki hadoŭ 7-8 hladzieli i ŭśmichalisia. Voś takaja zabaŭka dla dziaciej!» — minčuka Paŭła Dabravolskaha razam ź siabram abrabavali ŭ Buenas-Ajresie. Pra zdareńnie jon raskazaŭ u sacsietkach.
U 2022 hodzie Pavieł adpraviŭsia ŭ dvuchhadovaje kruhaśvietnaje padarožža. Ciapier jon znachodzicca ŭ Arhiencinie.
Mužčyna abjechaŭ Panamu, Ekvador, Pieru, Baliviju — biaźvizavyja krainy, dastupnyja ŭładalniku biełaruskaha pašparta. Dalej z Łacinskaj Amieryki ŭ płanach Brazilija i Vieniesueła.
Paŭłu było cikava pahladzieć na lehiendarnyja truščobnyja rajony.
— Ja nikoli nie bačyŭ mienavita takich rajonaŭ. Bo, naprykład, u Indyi truščoby — heta prosta miesca, dzie ŭ sapraŭdy žachlivych umovach žyvuć biednyja ludzi. Navat u Łacinskaj Amierycy šmat dzie takaja ž historyja. A ŭ Arhiencinie heta rajony bandytaŭ — u niekatoryja kvartały navat palicyja nie ryzykuje zachodzić, — dzialiŭsia jon u sacsietkach.
Cikaŭnaść i śmiełaść padšturchoŭvali Paŭła iści tudy, kudy lepš nie iści.
— Ja miesiac žyŭ u Panamie i huhliŭ «Najbolš niebiaśpiečnyja rajony Panamy» — i potym pa čarzie ich naviedvaŭ. Hetak ža pastupaŭ u Huajakile (Ekvador), u Limie (Pieru).
Pieršy dośvied u Panamie jaho vielmi ŭraziŭ:
— U hetaj krainie šmat hrošaj, siaredni zarobak prykładna na ŭzroŭni Polščy. Chmaračosaŭ chapaje… Tamu było vielmi dziŭna pabačyć zakrytyja terytoryi, kudy nie puskajuć niemiascovych žycharoŭ. Na ŭvachodach stajać błokpasty palicyi. Ale ty kažaš, što idzieš pad svaju adkaznaść, ciabie nie na pieršym, dyk na druhim prapuściać. Tolki ŭ adzin rajon mianie nie prapuskali nijak, ale ž ja znajšoŭ prałazy na spadarožnikavaj karcie i ŭsio roŭna zajšoŭ. Unutry rajonaŭ palicyi ŭvohule niama — jana dziažuryć tolki zvonku, — raskazvaŭ padpisčykam Pavieł.
U Limie, adznačaŭ jon, nijakich błokpastoŭ niama, tamu možna hulać pa truščobach, kolki chočaš. Nidzie jon nie traplaŭ u niejkija niepryjemnyja situacyi. Kaža, što dniom adčuvaŭ siabie całkam biaśpiečna. Pavieł ličyć, što niahledziačy na ŭsie žachi, miescy hetyja davoli fotahieničnyja — i ŭ tym liku pa takuju začaravalnuju karcinku tudy idzieš.
— Kali ja pryjechaŭ u Buenas-Ajres, to zrazumieŭ, što tut truščoby — heta zusim inšy śviet. U pieršy taki rajon ja trapiŭ raptoŭna, kali išoŭ z vakzała ŭ svoj hatel. Niejkija chłopcy siadziać la zachodaŭ u vuzkija vulicy, jany litaralna skanujuć ciabie pohladam z noh da hałavy. Vielmi napružanaja atmaśfiera. Ja pastaraŭsia vyjści adtul jak maha chutčej.
Tamu kali Pavieł vyrašyŭ śpiecyjalna schadzić u jašče adzin taki rajon, to staranna padrychtavaŭsia da hetaha: pakinuŭ u numary bankaŭskuju kartku, pieravioŭ akaŭnty ŭ sacyjalnych sietkach na novuju simku i vypisaŭ usie paroli ad ich u natatnik. Kaža, što ŭ hety raz kožnaje fota, kožnaje videa na niekalki siekund rabiŭ ź vialikim stresam — bo reakcyja miascovych mahła być roznaj.
Ale ž niahledziačy na ŭsie aściarohi Pavieł pahulaŭ pa troch kryminalnych rajonach, abyšłosia biez ekscesaŭ. U čaćviorty chłopiec vyrašyŭ pajści z novym siabram — jon jakraz paznajomiŭsia ź inšym minčukom, jaki taksama lubić naviedvać truščoby ŭ roznych krainach.
— Rajon znachodzicca prykładna za 30 chvilin jazdy ad Buenas-Ajresa. Ja daviedaŭsia pra isnavańnie hetaha rajona vypadkova. Jechaŭ na ciahniku da miesca, dzie jość pole dla holfa. I ŭ niejki momant pa ciahniku stała biehać palicyja i papiaredžvać pra niešta. Ludzi chutka začyniali vokny, niechta navat sieŭ na padłohu. Mnie rastłumačyli, što ciapier my jedziem praź niebiaśpiečny rajon i tut moža adbycca roznaje. Kaniečnie, ja adrazu adznačyŭ łakacyju na mapie.
Trapić tudy było davoli składana. Byŭ tolki vielmi vuzki padychod praz čyhunku. Pavieł ź siabram adrazu pabačyli hrupu mužčyn, jakija siadzieli kala ŭvachodu.
— My ŭsio abyšli, ale viartacca treba było cieraz toj ža čyhunačny most. U cełym ničoha nie pradviaščała biady. My ŭbačyli 2-3 chłopcaŭ tam. Ale jak tolki my da ich nablizilisia, nas raptoŭna atačyŭ natoŭp, jaki źjaviŭsia niezrazumieła adkul. Ja ŭpieršyniu ŭ žyćci ŭbačyŭ pistalet pobač sa svajoj hałavoj.
Pabačyŭšy zbroju, biełarus adrazu sam dastaŭ i addaŭ svoj darahi telefon. Zhadaŭ historyju z navin: litaralna niekalki dzion tamu ŭ centry Buenas-Ajresa ŭ anałahičnych abstavinach zabili dziaŭčynu.
— Ale ŭdary ŭsio roŭna pasypalisia. Mahčyma, dziakujučy maim pavodzinam bili mianie nie vielmi mocna i nie vielmi doŭha. Na mnie amal nie zastałosia nijakich śladoŭ, čaho nielha skazać pra majho spadarožnika. Jamu dastałasia našmat bolš — u jaho vielmi mocna raźbity tvar.
Vakoł sabraŭsia natoŭp raziavak. «Dziaŭčynki hadoŭ 7-8 hladzieli i ŭśmichalisia. Voś takaja zabaŭka dla dziaciej!» — aburajecca ŭ sacsietkach Pavieł.
Vyratavaŭ biełarusaŭ ciahnik. Zavadatar bandy spytaŭ, ci buduć chłopcy źviartacca ŭ palicyju. Tyja paabiacali nie rabić hetaha. Tady zavadatar daŭ usim kamandu razychodzicca i dazvoliŭ čužyncam syści.
Pavieł usio ž źviarnuŭsia ŭ palicyju:
— Nie viedaju, što z hetaha atrymajecca. Ale try hadziny raspytvali, niejkuju cikavaść prajaŭlali. Pahladzim, što budzie.
Łukašenka ŭpieršyniu źjaviŭsia na publicy razam z mamaj Koli26
Kamientary