U krasaviku 2022 hoda hramadzianka Ukrainy Luboŭ Šapavałava (tak, jak daviedałasia «Naša Niva», zavuć žančynu) źviarnułasia va ŭpraŭleńnie pa hramadzianstvie i mihracyi adnaho ź biełaruskich abłvykankamaŭ z prośbaj ab statusie biežanca, dadatkovaj abaronie abo prytułku ŭ Biełarusi.
U studzieni 2023 hoda Departamient pa mihracyi daŭ joj dadatkovuju abaronu na adzin hod, ale admoviŭ u biežanstvie z-za adsutnaści padstaŭ. Žančyna vyrašyła asprečyć admovu ŭ sudzie.
Z sudovaha dakumienta viadoma, što žančyna naradziłasia va Ukrainie (miarkujučy pa ŭsim, u Zaparožskaj vobłaści), ale pa nacyjanalnaści — ruskaja. Jana vyjšła na piensiju, u jaje dźvie dački: adna žyvie ŭ Polščy, druhaja — va Ukrainie.
U Biełaruś žančyna pryjechała «tranzitam praz terytoryju RF». Kali mienavita, nieviadoma, hetyja danyja ŭ rašeńni suda zašyfravanyja, ale pa kantekście dakumienta možna zrabić vysnovu, što heta zdaryłasia paśla pačatku poŭnamaštabnaj vajny.
Ab abaronie ŭ Biełarusi Luboŭ Šapavałava paprasiła, bo «nie žadaje viartacca» va Ukrainu «ŭ suviazi z aściarohami za svajo žyćcio z pryčyny ŭzbrojenaha kanfliktu, jaki tam adbyvajecca».
Pry zapaŭnieńni ankiety i padčas sumoŭja jana nie zhadvała, što baicca pieraśledaŭ va Ukrainie pa prykmiecie nacyjanalnaści, havorycca ŭ rašeńni.
«Ruskija składajuć 17,3 % nasielnictva U.. Infarmacyi ab pieraśledach ruskich pa nacyjanalnaści va U., u tym liku paśla pačatku «śpiecyjalnaj vajennaj apieracyi» R.F. suprać U., u ahulnadastupnych i dakładnych krynicach niama.
Ab adsutnaści pieraśledaŭ pa nacyjanalnaj prykmiecie śviedčyć taksama toje, što siastra zajaŭnika pražyvaje va U. i nie padviarhajecca jakim-niebudź pieraśledam abo dyskryminacyi», — napisana ŭ sudovym dakumiencie.
U rašeńni ŭkazana, što ŭ skarzie Luboŭ pryvodziła dovady ab adnosinach ukraincaŭ da Rasii i jaje hramadzian, jakija pražyvajuć tam, a nie da ruskich, jakija žyvuć va Ukrainie.
Sud pryvodzić statystyku, što 60% nasielnictva Ukrainy vyznajuć pravasłaŭje, jak i sama Šapavałava. Infarmacyi ab pieraśledzie pravasłaŭnych va Ukrainie «ŭ ahulnadastupnych i dakładnych krynicach niama», havorycca ŭ rašeńni. Akramia taho, sud ustanaviŭ, što žančyna nikoli nie padviarhałasia pieraśledu abo dyskryminacyi z boku ŭkrainskich uładaŭ.
Status uciekača ŭ Biełarusi dajecca zamiežniku, jaki moža «stać achviaraj pieraśledu ŭ dziaržavie hramadzianskaj prynaležnaści pa prykmiecie rasy, vieravyznańnia, hramadzianstva, nacyjanalnaj prynaležnaści, prynaležnaści da peŭnaj sacyjalnaj hrupy abo palityčnych pierakanańniaŭ, jaki nie moža ci nie žadaje ŭ siłu takich aściaroh karystacca abaronaju hetaj dziaržavy».
A dadatkovuju abaronu mohuć atrymać tyja zamiežniki, u jakich niama padstaŭ dla statusu biežanca, ale jość «abhruntavanyja aściarohi sutyknucca pry viartańni ŭ dziaržavu hramadzianskaj prynaležnaści z pahrozaj śmiarotnaha pakarańnia, katavańniaŭ i inšych žorstkich, biesčałaviečnych ci prynižajučych hodnaść vidaŭ abychodžańnia i pakarańnia abo z pahrozaj, jakaja ŭźnikła z pryčyny hvałtu va ŭmovach uzbrojenaha kanfliktu mižnarodnaha ci niemižnarodnaha charaktaru».
Sud pryjšoŭ da vysnovy ab pravamiernaści dziejańniaŭ departamienta — «ździejśnienyja ŭ adpaviednaści ź dziejučym zakanadaŭstvam, z ulikam infarmacyi ab Ukrainie, u miežach pradstaŭlenych paŭnamoctvaŭ» – i pakinuŭ u sile rašeńnie ab admovie ŭ biežanstvie.
Raniej biełaruski sud admoviŭ dać status uciekačoŭ łatvijskaj siamji, jakaja raskazvała prapahandzie pra harotnaje žyćcio na Zachadzie. Sud taksama rašyŭ, što ŭ Łatvii im «ničoha nie pahražaje».
Čytajcie taksama:
Špakoŭski pahražaje rasijskamu «Kommiersantu» błakiroŭkaj na terytoryi Biełarusi
