Polski hienierał: Armija Łukašenki nie niasie pahrozy. Pucin pakinuŭ im nieprydatnyja tanki
Hienierał Valdemar Skšypčak, były kamandujučy Suchaputnymi vojskami ŭ Polščy i były namieśnik ministra abarony, dniami zajaviŭ, što polskim uzbrojennym siłam spatrebicca 2-3 hadziny, kab źniščyć biełaruskaje vojska, a biełaruskaje ŭzbrajeńnie nazvaŭ «kučaj mietałałomu».
U kamientary Biełsatu jon patłumačyŭ svaje słovy.
«Kali pačałasia adkrytaja faza rasijskaj ahresii suprać Ukrainy, rasiejcy ŭ pieršaj fazie panieśli vialikija straty ŭ vajskovaja technicy. Najpierš stracili tanki, bajavyja mašyny vajskovaj piachoty. Rasiejcy ŭ 2022 hodzie mieli vialiki deficyt i tankaŭ, i BMP.
I ŭ suviazi z hetym Pucin zabraŭ u armii Biełarusi peŭnuju kolkaść hetych tankaŭ i bajavych mašyn piachoty, a zatym pazbaviŭ biełaruskuju armiju mahčymaści pravodzić jakija zaŭhodna vajskovyja apieracyi. Pakinuli tyja tanki, što paličyli nieprydatnymi. I ciapier Łukašenka za apošnija hady ich adramantavaŭ i vysłaŭ na palihony, kab demanstravać svaju siłu, jakoj niama. A toje, što jeździć pa palihonach, nie niasie nijakaj pahrozy.
Na tych palihonach było bolej biełaruskich hienierałaŭ, čym hetych biełaruskich tankaŭ. U Biełarusi małaja kolkaść techniki i jana nam nie pahražaje», — zajaviŭ Skšypčak.
Jon ličyć, što biełaruskaja armija niasie pahrozu tolki dla svaich hramadzian.
Skšypčak miarkuje, što Pucin i Łukašenka pakul nie advažacca napaści na NATA.
«Ja dumaju, što vialikaj vajny jašče doŭha nie budzie, bo rasijskaja armija prosta nie hatovaja da jaje, jana zahrazła ŭ vajnie va Ukrainie», — patłumačyŭ jon.
I dadaŭ, što pakolki NATA maje pieravahu kolkasnuju i technałahičnuju, to, kali b takaja vajna z Rasijaj pačałasia, jana b pachavała impieryju Pucina.
Što da polskaha vojska, to Skšypčak adznačyŭ, što paśla 2022-ha adbyłasia vialikaja prahrama pieraŭzbrajeńnia. Urad pryznačyŭ 4% ad VUP na padrychtoŭku armii i jaje madernizacyju. Prablemaj zastajecca, jak padrychtavać sałdat.
Ciapier čytajuć
Vylecieła ŭ nieviadomym kirunku śpikierka KR Anžalika Mielnikava25
Kamientary
Ale naŭrad jany tak suprać Polščy papruć. A voś suprać Livy mohuć.