Pucinu patrebnyja nie mirnyja pieramovy, a faktyčnaja kapitulacyja Ukrainy — ISW
Jon upeŭnieny ŭ svajoj acency taho, što Rasija moža damahčysia pieramohi, miarkujuć analityki.
Uładzimir Pucin admoviŭsia ad udziełu Rasii ŭ lubych značnych pieramovach pa pahadnieńni ab spynieńni ahniu, zatoje jamu patrebna faktyčnaja kapitulacyja Ukrainy, havorycca ŭ analizie Mižnarodnaha instytuta vyvučeńnia vajny (ISW).
Pucin prakamientavaŭ pierśpiektyvy spynieńnia ahniu va Ukrainie i mahčymaść pieramovaŭ na samicie Šanchajskaj arhanizacyi supracoŭnictva (ŠAS) u Astanie 4 lipienia, piša UNIAN.
«Zamiest taho, kab prajavić typovuju dla jaho prytvornuju cikavaść da takich pieramovaŭ, jon prama adchiliŭ luby praces pieramovaŭ ab spynieńni ahniu… Pucin taksama adkinuŭ Viarchoŭnuju Radu jak mahčymy kantaktny punkt dla pieramovaŭ, choć raniej zajaŭlaŭ, što hety orhan źjaŭlajecca adzinaj lehitymnaj ukrainskaj strukturaj, ź jakoj Rasija moža vieści pieramovy. Ciapier Pucin nazvaŭ usie ŭkrainskija kiroŭnyja instytuty nielehitymnymi abo nieprydatnymi dla pieramovaŭ i adchiliŭ ideju ŭdziełu ŭ pieramovach trecich bakoŭ, faktyčna adkinuŭšy luby realistyčny praces dla značnych pieramovaŭ pa pahadnieńni ab spynieńni ahniu», — piša ISW.
Zatoje, adznačajuć analityki, Pucin padkreśliŭ svajo patrabavańnie «demilitaryzacyi» Ukrainy jak asnoŭnaj umovy dla ŭsiakaha pahadnieńnia ab spynieńni ahniu, patrabujučy, kab Ukraina pahadziłasia na niezvarotnuju «demilitaryzacyju».
Pucin śćviardžaŭ, što Rasija nia moža dazvolić ukrainskim vajskoŭcam skarystacca spynieńniem ahniu dla adnaŭleńnia svaich sił, nie zhadvajučy pra toje, što sami rasijskija siły amal napeŭna skarystajucca patencyjnym spynieńniem ahniu mienavita takim čynam.
Analityki ISW upeŭnienyja, što Rasija skarystajecca pieradyškaj paśla spynieńnia ahniu dla adnaŭleńnia i pašyreńnia svaich sił i dalejšaj mabilizacyi svajoj abaronna-pramysłovaj bazy dla budučaj ahresii, nakiravanaj na źniščeńnie Ukrainy.
«Admova Pucina ad luboha pahadnieńnia ab spynieńni ahniu, jaki nie praduhledžvaje kapitulacyi Ukrainy, taksama śviedčyć ab tym, što jon upeŭnieny ŭ svajoj acency taho, što Rasija moža damahčysia pieramohi, praciahvajučy paŭzučaje prasoŭvańnie va Ukrainie, pierasiliŭšy padtrymki Ukrainy z boku Zachadu i vyjhraŭšy vajnu na źniasileńnie suprać ukrainskich sił», — havorycca ŭ analizie ISW.
U Astanie Pucin, u pryvatnaści, adchiliŭ ideju prezidenta Ukrainy Uładzimira Zialenskaha ab pieramovach praz pasiarednika. Rasijski kiraŭnik miarkuje, što pasiarednikam nie chopić paŭnamoctvaŭ, kab padpisvać nieabchodnyja dakumienty.
Akramia taho, jon zajaviŭ, što ŭsurjoz stavicca da namieru kandydata ŭ prezidenty ZŠA Donalda Trampa zaviaršyć vajnu va Ukrainie.
Favarytka Łukašenki i Čyža — što pryniesła himnastcy Ksienii Sankovič blizkaść z palityčnymi elitami?6
Kamientary