Пуціну патрэбныя не мірныя перамовы, а фактычная капітуляцыя Украіны — ISW
Ён упэўнены ў сваёй ацэнцы таго, што Расія можа дамагчыся перамогі, мяркуюць аналітыкі.
Уладзімір Пуцін адмовіўся ад удзелу Расіі ў любых значных перамовах па пагадненні аб спыненні агню, затое яму патрэбна фактычная капітуляцыя Украіны, гаворыцца ў аналізе Міжнароднага інстытута вывучэння вайны (ISW).
Пуцін пракаментаваў перспектывы спынення агню ва Украіне і магчымасць перамоваў на саміце Шанхайскай арганізацыі супрацоўніцтва (ШАС) у Астане 4 ліпеня, піша УНІАН.
«Замест таго, каб праявіць тыповую для яго прытворную цікавасць да такіх перамоваў, ён прама адхіліў любы працэс перамоваў аб спыненні агню… Пуцін таксама адкінуў Вярхоўную Раду як магчымы кантактны пункт для перамоваў, хоць раней заяўляў, што гэты орган з'яўляецца адзінай легітымнай украінскай структурай, з якой Расія можа весці перамовы. Цяпер Пуцін назваў усе ўкраінскія кіроўныя інстытуты нелегітымнымі або непрыдатнымі для перамоваў і адхіліў ідэю ўдзелу ў перамовах трэціх бакоў, фактычна адкінуўшы любы рэалістычны працэс для значных перамоваў па пагадненні аб спыненні агню», — піша ISW.
Затое, адзначаюць аналітыкі, Пуцін падкрэсліў сваё патрабаванне «дэмілітарызацыі» Украіны як асноўнай умовы для ўсякага пагаднення аб спыненні агню, патрабуючы, каб Украіна пагадзілася на незваротную «дэмілітарызацыю».
Пуцін сцвярджаў, што Расія ня можа дазволіць украінскім вайскоўцам скарыстацца спыненнем агню для аднаўлення сваіх сіл, не згадваючы пра тое, што самі расійскія сілы амаль напэўна скарыстаюцца патэнцыйным спыненнем агню менавіта такім чынам.
Аналітыкі ISW упэўненыя, што Расія скарыстаецца перадышкай пасля спынення агню для аднаўлення і пашырэння сваіх сіл і далейшай мабілізацыі сваёй абаронна-прамысловай базы для будучай агрэсіі, накіраванай на знішчэнне Украіны.
«Адмова Пуціна ад любога пагаднення аб спыненні агню, які не прадугледжвае капітуляцыі Украіны, таксама сведчыць аб тым, што ён упэўнены ў сваёй ацэнцы таго, што Расія можа дамагчыся перамогі, працягваючы паўзучае прасоўванне ва Украіне, перасіліўшы падтрымкі Украіны з боку Захаду і выйграўшы вайну на знясіленне супраць украінскіх сіл», — гаворыцца ў аналізе ISW.
У Астане Пуцін, у прыватнасці, адхіліў ідэю прэзідэнта Украіны Уладзіміра Зяленскага аб перамовах праз пасярэдніка. Расійскі кіраўнік мяркуе, што пасярэднікам не хопіць паўнамоцтваў, каб падпісваць неабходныя дакументы.
Акрамя таго, ён заявіў, што ўсур'ёз ставіцца да намеру кандыдата ў прэзідэнты ЗША Дональда Трампа завяршыць вайну ва Украіне.
Каментары