Udar pa dziciačaj balnicy ŭ Kijevie byŭ naniesieny rasijskaj rakietaj. Voś jakija dokazy
Zachodnija i ŭkrainskija analityki abviarhajuć rasijskuju viersiju.
8 lipienia Rasija praviała masiravanuju rakietnuju ataku Ukrainy. Akramia vajennych abjektaŭ, pad udar patrapili i hramadzianskija. U Kijevie rakieta trapiła ŭ najbujniejšuju dziciačuju balnicu horada «Achmatdziet».
Jak paviedamiła Ministerstva ŭnutranych spraŭ Ukrainy, na terytoryi balnicy zahinuli 2 čałavieki, jašče 10 paciarpieli.
Minabarony Rasii zajaviła, što słovy ŭkrainskaha boku pra rakietny ŭdar Rasii pa hramadzianskich abjektach «absalutna nie adpaviadajuć rečaisnaści».
«Šmatlikija apublikavanyja fota i videakadry z Kijeva adnaznačna paćviardžajuć fakt razbureńniaŭ z pryčyny padzieńnia ŭkrainskaj rakiety SPA», — śćviardžaje rasijskaje viedamstva.
Jak havorycca ŭ spravazdačy amierykanskaha Instytuta vyvučeńnia vajny (ISW) za 8 lipienia 2024 hoda, pradstaŭniki rasijskaj ułady i prapahandysty chočuć źniać ź siabie adkaznaść za rakietny ŭdar pa balnicy. Dla hetaha jany raspaŭsiudžvajuć iłžyvyja paviedamleńni ab tym, što «Achmatdziet» źjaŭlajecca vajskovaj balnicaj, a tamu i zakonnaj vajennaj metaj.
U pryvatnaści, rasijski bok robić iłžyvyja zajavy ab tym, što Ukraina vykarystoŭvaje častku abo ŭsiu balnicu dla lačeńnia paranienych ukrainskich sałdat, što Ukraina zachoŭvaje rakiety ŭ balnicy i što ŭ balnicu patrapili ŭkrainskija rakiety supraćpavietranaj abarony, a nie rasijskaja rakieta.
U spravazdačy adznačajecca, što artykuł 19 Ženieŭskaj kanviencyi ab abaronie hramadzianskaha nasielnictva padčas vajny, jakuju padpisała Rasija, abaviazvaje «voraha» zrabić papiaredžańnie pierad tym, jak atakavać balnicu, jakaja nibyta ŭtrymlivaje «škodnuju» vajennuju cel.
Ale nivodnaja rasijskaja krynica nie śćviardžaje, što rasijskija ŭłady zrabili takoje papiaredžańnie, a taksama nie padali dokazaŭ taho, što špital, poŭny chvorych dziaciej, ujaŭlaŭ niepaźbiežnuju pahrozu dla rasijskich vojsk.
Analityki rastłumačyli, što trajektoryja palotu rakiety i bačny turbareaktyŭny ruchavik pad jaje korpusam supadajuć z trajektoryjaj palotu rasijskaj rakiety Ch-101. Paćvierdžańniaŭ tamu, što heta byŭ pierachopnik SPA, niama. Dyj rakieta nie vyhladaje paškodžanaj pierachopnikami SPA.
Bolš detalny analiz pravioŭ aŭtar telehram-kanała «Karty i strełački» Jan Maćviejeŭ.
Jon havoryć, što maštaby razbureńnia na terytoryi balnicy śviedčać ab tym, što heta vynik udaru kryłataj rakiety Ch-101, jakaja moža nieści ad 450 da 800 kiłahramaŭ vybuchoŭki.
Tak u vyniku ŭdaru razburana značnaja častka taksikałahičnaha korpusa balnicy. Akramia taho, vybityja vokny ŭ asnoŭnym budynku. Jość kadry znutry, jakija zafiksavali vielmi surjoznyja paškodžańni. Heta značyć vybuchnaja chvala była vielmi mocnaj. Usio pakazvaje na toje, što vybuchnuła bajavaja častka masaj 500 kiłahram ci navat bolš.
Viersiju ab tym, što na špital upała rakieta, źbitaja ŭkrainskimi SPA, nie paćviardžaje analiz videa. Na kadrach vyrazna vidać, jak rakieta lacić pa pramoj trajektoryi, zachodzić na cel pad vuhłom prykładna ŭ 45 hradusaŭ i prosta pikiruje na cel. Kali b jana była źbitaja, to palot vyhladaŭ by inakš. Rakieta b vilała i kruciłasia.
Ekśpiert źviartaje ŭvahu i na huk palotu rakiety, jaki vielmi padobny da huku, jaki supravadžaje palot Ch-101 z reaktyŭnym ruchavikom.
Niekatoryja rasijskija ekśpierty razhledzieli na videa zienitnuju rakietu — naprykład, ad Patriot ci NASAMS. Ale niekalki faktaraŭ havorać suprać hetaj viersii. U adznačanych rakiet słabaja bajavaja častka (22 i 91 kh). Paškodžańni špitala zanadta vialikija dla takich rakiet.
Suprać hetaj viersii i kadry, na jakich zafiksavana padzieńnie. Zienitnyja rakiety pa ziamli nie bjuć i tak na cel nie zachodziać. Kali b jany padali ci stracili kiravańnie, to ich palot vyhladaŭ by inakš.
Akramia hetaha, zienitnyja rakiety majuć rakietny ruchavik, jaki vypuskaje rakietny strumień i mahutny dymavy śled. Na kadrach videa palotu rakiety hetaha nie bačna naohuł.
Pry hetym zienitnyja rakiety laciać u dva-try razy chutčej za kryłatyja, ich palot naŭrad ci moh być zafiksavany. Staryja rakiety S300, jakija mahli b nanieści padobnyja razbureńni, zaraz dla abarony Kijeva nie vykarystoŭvajucca.
Rasijskija ekśpierty źviartajuć uvahu na fota ź nibyta znojdzienymi ŭ Kijevie askołačnymi elemientami. Heta hatovyja paražalnyja elemienty — mietaličnyja kubiki, jakija prymianiajucca ŭ zienitnych rakietach. Ich jany ličać dokazam taho, što va ŭsim vinavata ŭkrainskaje SPA.
Ekśpiert tłumačyć prysutnaść hetych elemientaŭ na miescy napadu. Pa-pieršaje, ukrainskaje SPA nad Kijevam sapraŭdy pracavała. Pierachapić zmahli mnohija rakiety (30 z 38). Nie vyklučana, što kubiki ad zienitnych rakiet, jakija spracavali, mahli prosta ŭpaści ŭniz.
Druhi varyjant bolš žudasny. Jašče ŭviesnu analityki pisali, što rasijskija inžyniery abstalavali rakietu Ch-101 druhoj bajavoj častkaj, pavialičyŭšy jaje sumarna da 800 kiłahramaŭ za košt pamianšeńnia dalnaści palotu.
I voś u hetaj druhoj bajavoj častcy jakraz byli znojdzieny hatovyja paražajučyja elemienty. Pramych dokazaŭ hetamu ekśpiert nie bačyŭ, što nie vyklučaje vierahodnaści taho, što mienavita takaja rakieta ŭdaryła pa dziciačym špitali.
Kamientary