Staŭki ŭtylzboru na aŭto pryraŭniajuć da rasijskich. Voś čamu heta kiepskaja navina dla aŭtamabilistaŭ
Urad Biełarusi zaćvierdziŭ novyja staŭki ŭtylizacyjnaha zboru na aŭtamabili, jany pavinny stać kopijaj rasijskich.
![](http://nashaniva.com/img/w840d4webp1/photos/stock/redcars-ubg4z.jpg.webp)
Paŭtarajem za Rasijaj
U Biełarusi vyrašyli pryraŭniać staŭki ŭtylizacyjnaha zboru z tymi, što dziejničajuć u Rasii.
Z apublikavanaj infarmacyi vynikaje, što staŭki musiać stać anałahičnymi tym, jakija dziejničajuć u RF z 1 studzienia 2025 hoda. Tam, u svaju čarhu, z 1 studzienia adbyłosia ich čarhovaje pavyšeńnie ŭ siarednim na 20%. Ale heta jašče nie ŭsio, bo ŭ Rasii ŭtylzbor i dalej budzie raści kožny hod na 10—20% da 2030 hoda.
Novyja mašyny ŭ Rasii z Novaha hoda prybavili ŭ canie ad 1,5 da 5%.
Naturalna, što hetyja źmieny pryviaduć da rostu cen jak na novyja, tak i na patrymanyja aŭto ŭ Biełarusi, a aŭtapierahonny biznes moža amal całkam źniknuć.
Raźličvać utylzbor pa novych staŭkach u Biełarusi pačnuć praz 10 dzion paśla aficyjnaha apublikavańnia dakumienta (pakul jon nie apublikavany).
Taksama z apisanaha možna pryjści da vysnovy, što sami staŭki, jak u nas, tak i ŭ RF, buduć prapisanyja ŭ rasijskich rublach, bo inakš zrabić ich całkam adnolkavymi niemahčyma, pakolki kurs niestabilny. Darečy, z momantu źjaŭleńnia ŭtylzboru z 1 sakavika 2014 hoda i da 4 lutaha 2016-ha staŭki ŭ Biełarusi byli zafiksavanyja ŭ rasijskich rublach.
![](http://nashaniva.com/img/w732d4webp1/photos/stock/many_bel-1321-59337.jpg.webp)
Jak heta zakranie fizičnych asob?
Ciapier jak u Biełarusi, tak i ŭ Rasii dla fizičnych i jurydyčnych asob dziejničajuć roznyja staŭki ŭtylzboru na lehkavyja aŭto.
U Biełarusi ich dźvie:
- 545 rubloŭ (kala $160) — za lehkaviki, z momantu vypusku jakich nie prajšło try hady;
- 817 rubloŭ (kala $240) — dla mašyn, starejšych za try hady.
U RF staŭki dla fizasob mienšyja, čym u nas:
- 3400 rasijskich rubloŭ (kala $34) — dla lehkavych aŭto ŭzrostam da 3 hadoŭ;
- 5200 rasijskich rubloŭ (kala $52) — dla aŭto, starejšych za try hady.
Takim čynam, moža atrymacca, što ŭ vypadku poŭnaha kapiravańnia rasijskich norm, utylzbor dla fizičnych asob stanie navat mienšym. Ale jość važny niuans.
![](http://nashaniva.com/img/w732d4webp1/photos/stock/geely_minsk_salon-4979-pov3u.jpg.webp)
Hod biez mahčymaści prodažu
Reč u tym, što pryviedzienyja vyšej ličby ŭ 34—52 dalary — heta lhotnyja staŭki ŭtylzboru. Skarystacca lhotaj u RF možna nie čaściej, čym raz na hod. I samaje važnaje, što takoje aŭto nie musić być pradadziena raniej čym praz 12 miesiacaŭ z momantu mytnaha afarmleńnia ŭ RF.
Kali ŭłaśnik, apłaciŭšy lhotny ŭtylzbor, zachoča pradać mašynu raniej, to jon musić dapłacić roźnicu pamiž kamiercyjnaj staŭkaj, jakuju płaciać jurasoby, i tym, što jon zapłaciŭ pa lhocie.
A heta, u svaju čarhu, minimum 180 tysiač rasijskich rubloŭ (kala 1800 dalaraŭ), i toje pry ŭmovie, što heta budzie aŭto, maładziejšaje za try hady z abjomam ruchavika da 1 litra.
Za aŭto z abjomam ruchavika 1—2 litry pry prodažy raniej, čym praz 12 miesiacaŭ rasijaninu daviadziecca zapłacić užo 667 tysiač (kala 6700 dalaraŭ ZŠA).
Taksama varta adznačyć, što pry imparcie fizičnaj asobaj aŭto z abjomam ruchavika bolš za 3 litry lhotny ŭtylzbor uvohule nie praduhledžany. A kamiercyjnaja staŭka składaje kala 21 500 dalaraŭ.
Dla aŭtamabilaŭ, starejšych za 3 hady, staŭki jašče vyšejšyja. Naprykład, dla mašyn z abjomam ruchavika ad 2,0 da 3,0 ł utylizacyjny zbor składaje 2 839 000 rubloŭ (kala $28 400).
U Biełarusi ž pa biahučych praviłach staŭki ŭtylzboru dla fizičnych asob nie majuć pryviazki da abjomu ruchavika.
![](http://nashaniva.com/img/w732d4webp1/photos/stock/photo_2024-08-19_17-50-29-mklq9.jpg.webp)
Byvajcie, pierahonščyki i aŭto ź vialikim abjomam
Atrymlivajecca, što kali Biełaruś całkam skapiravała rasijskija normy, to ŭ našaj krainie nie tolki vyrastuć ceny na novyja aŭto ŭ dyleraŭ, ale i na patrymanyja, pakolki pradavać śviežapryhnanyja aŭto budzie faktyčna nielha, pakul nie projdzie 12 miesiacaŭ z momantu razmytnieńnia ŭ Biełarusi.
Heta, u svaju čarhu, dabje aŭtapierahonny biznes, jaki paśla źmienaŭ u naličeńni ŭtylzboru ŭ Rasii i tak pieražyvaje nie samyja lepšyja časy.
A aŭtamabili z abjomam bolš za 3 litry ź vialikaj vierahodnaściu naohuł bolš nie buduć pastupać u Biełaruś.
Kamientary
Budiet rośsijsko-kitajskij saraj na kolosach, biez zapčastiej, bieź siervisa, no po cienie priemialnoho jevropiejca ili japonca, amierikanca s zapčastiami i siervisom.