Skład adboračnych hrup na Čempijanat Jeŭropy pa futbole

U Varšavie prajšło losavańnie adboračnych hrup da čempijanatu Jeŭropy pa futbole, jaki projdzie ŭ Polščy i va Ukrainie.

Usie zbornyja – 51 družyna – byli raźbityja na dzieviać adboračnych hrup: šeść hrup źmiaščajuć pa šeść zbornych i try hrupy – pa piać zbornych.

Adboračnyja matčy projduć ź vieraśnia 2010 pa kastryčnik 2011 hoda. Matčy projduć u suboty i aŭtorki. Jak viadoma, z supiernikami kožnaja zbornaja hulaje dvojčy: doma i na vyjeździe.

Zbornaja Biełarusi, pasiejanaja ŭ 4-m košyku, trapiła ŭ hrupu «D» sa zbornymi Francyi (1-y košyk), Rumynii (2-i košyk), Bośnii (3-i), Ałbanii (5-y) i Luksiemburha (6-y).

***

Skład usich hrup:

A – Hiermanija, Turcyja, Aŭstryja, Bielhija, Kazachstan, Azierbajdžan.

B – Rasija, Słavakija, Irłandyja, Makiedonija, Armienija, Andora.

S – Italija, Sierbija, Paŭnočnaja Irłandyja, Słavienija, Estonija, Farery.

D – Francyja, Rumynija, Bośnija, Biełaruś, Ałbanija, Luksiemburh.

Je – Hałandyja, Šviecyja, Finlandyja, Vienhryja, Małdova, San-Maryna.

F – Charvatyja, Hrecyja, Izrail, Łatvija, Hruzija, Malta.

G – Anhlija, Šviejcaryja, Bałharyja, Uels, Čarnahoryja.

H – Partuhalija, Danija, Narviehija, Kipr, Isłandyja.

I – Ispanija, Čechija, Šatłandyja, Litva, Lichtenštejn.

***

Čempijanat Jeŭropy pa futbole projdzie z 8 červienia pa 1 lipienia 2012 h. u Polščy i va Ukrainie, u nastupnych haradach: Varšava, Hdańsk, Poznań, Urocłaŭ – Kijeŭ, Danieck, Charkaŭ, Lvoŭ.

Napramuju ŭ finalnuju stadyju, u jakoj voźmuć udzieł 16 kamandaŭ (zbornyja Polščy i Ukrainy trapili tudy aŭtamatyčna, jak haspadyni turniru), vychodziać 10 zbornych: pieramožcy hrup, a taksama najlepšaja z kamandaŭ, što zojmuć druhija miescy (9+1).

Astatnija čatyry vakantnyja pucioŭki razyhrajuć u stykavych matčach vosiem zbornych, što zaniali ŭ svaich hrupach 2-ja miescy.

***

Treba zaznačyć, što ŭ adboračnych turnirach da čempijanatu Jeŭropy zbornaja Biełarusi vystupaje horaj, čym u adbory da čempijanatu śvietu.

Na adbory da Jeŭra-1996 našyja finišavali 4-mi z šaści kamandaŭ, na adzin punkt, darečy, abahnaŭšy Luksiemburh (11 punktaŭ suprać 10). 12 kastryčnika 1994 h. doma ŭ Luksiemburha vyjhrali – 2:0, 11 kastryčnika 1995 h. u haściach zhulali ŭničyju – 0:0.

Na adbory da Jeŭra-2000 i Jeŭra-2004 biełarusy naohuł zajmali apošniaje, 5-je miesca, nabraŭšy ŭ 10 hulniach pa 3 bały.

A voś supiernikami ŭ adboračnaj hrupie da čempijanatu Jeŭropy 2008 byli adno try ciapierašnija supierniki pa ciapierašniaj hrupie – Rumynija, Ałbanija, Luksiemburh.

Z ałbancami doma zhulali ŭničyju – 2:2 (2 vieraśnia 2006), u haściach vyjhrali – 4:2 (17.11.2007), Z rumynami dvojčy prajhrali, u haściach 1:3 (7.10.2006), doma – 1:3 (8.09.2007), U Luksiemburha ŭ haściach vyjhrali 2:1 (24 sakavika 2007), a doma, u Homieli, 13 kastryčnika 2007 h. atrymali hučnuju aplavuchu, prajhraŭšy 0:1.

U vyniku biełarusy finišavali 4-mi z 13 bałami. Rumynija –29 bałaŭ, Hałandyja – 26, Bałharyja - 25, Biełaruś – 13, Ałbanija – 11, Słavienija – 11, Luksiemburh – 3.

Sa zbornymi Bośnii i Francyi biełarusy nikoli nie hulali.

Bośnija, darečy, dajšła da stykavych matčach čempijanatu śvietu 2010 h. (dzie prajhrała Partuhalii), a Francyja "vyjhrała" ŭ niebiassprečnych stykach u Irłandyi (ruka i afsajd Anry).

U adboračnym turniry da čempijanatu śvietu 2010 zbornaja Biełarusi zaniała 4-je miesca,

prapuścišy napierad Anhliju, Ukrainu, Charvatyju i apiaredziŭšy Kazachstan i Andoru.

***

Heta budzie apošni čempijanat, u jakim voźmuć udzieł 16 kamandaŭ, z 2016 hoda ŭ finalnaj stadyi budzie ŭdzielničać 24 zbornyja, amal 50% kantynientalnych zbornych. Taksama, vidać, heta budzie apošni čempijanat, jaki pravodziać dźvie krainy razam. Nahadajem, upieršyniu taki čempijanat byŭ praviedzieny ŭ 2000 h. (Bielhija, Niderłandy), u 2008 h. čempijanat Jeŭropy prajšoŭ u Aŭstryi i Šviejcaryi.

Hałoŭny trenier biełaruskaj zbornaj Biernd Štanhie, jašče pierad samim losavańniem zajaviŭ, što niezaležna ad składu hrupy zadača-maksimum vyjści na čempijanat, zadača-minimum – trapić u stykavyja matčy. H.zn. zaniać 2-je miesca ŭ hrupie.

• 0
• 0
• 0
• 0
• 0
• 0
• 0
• 0