Ałžyrskaja baksiorka, jakaja padvierhnułasia ckavańniu, padała pazoŭ na Džoan Roŭlinh i Iłana Maska
Donald Tramp, mahčyma, taksama stanie fihurantam rasśledavańnia.
![](http://nashaniva.com/img/w840d4webp1/photos/z_2024_08/iman_khelif_ap240803-6hrzo.jpg.webp)
Piśmieńnica Džoan Roŭlinh i biznesoviec Iłan Mask stali fihurantami kryminalnaha pazovu suprać sacsietki X z boku alimpijskaj čempijonki ŭ boksie z Ałžyra Iman Chielif, pra heta Variety paviedamiŭ advakat dziaŭčyny Nabil Budzi.
Pa słovach advakata dziaŭčyny, jaho padabaronnaja sutyknułasia z «aktami ciažkaha kibierbulinhu». Skarha padadzienaja ŭ centr baraćby z raspalvańniem nianaviści ŭ internecie pry prakuratury Paryža. Choć u skarzie zhadvajucca kankretnyja imiony, paśla rasśledavańnia da spravy mohuć być pryciahnutyja ŭsie, kaho abvinavačvańnie paličyć patrebnym.
Budzi dadaŭ, što kandydat u prezidenty ZŠA Donald Tramp taksama stanie fihurantam rasśledavańnia.
«Tramp napisaŭ paviedamleńnie, tak što niezaležna ad taho, ci budzie jon nazvany ŭ našym pazovie ci nie, jon niepaźbiežna budzie razhledžany ŭ ramkach sudovaha pieraśledu», — dadaŭ jon.
Jakija mienavita paviedamleńni ŭ X stali pradmietam razboru, nie paviedamlajecca. Adnak padčas Alimpijady Roŭlinh apisała adzin z bajoŭ Chielif jak «vidovišča, u jakim mužčyna źbivaje žančynu na paciechu publicy». Mask ža padtrymaŭ mierkavańnie amierykanskaj płyŭčychi Rajli Hiejns ab tym, što vystup Chielif u žanočaj častcy alimpijskaha turniru pa boksie niedapuščalny.
«Mužčynam nie miesca ŭ žanočym sporcie. Davajcie zrobim heta trendam», — napisała Hiejns na svajoj staroncy ŭ sacyjalnych sietkach, dadaŭšy chešteh z padtrymkaj Andžeły Karyni, jakaja admoviłasia bicca z Chielif. «Absalutna», — napisaŭ Mask.
Chielif nazvała pieramohu na Hulniach adkazam na kampaniju suprać jaje. Dziaŭčyna zavajavała załaty miedal u vahavoj katehoryi da 66 kh.
Ałžyrskaja spartsmienka była adnoj z dyskvalifikavanych u minułym hodzie na čempijanacie śvietu Mižnarodnaj asacyjacyjaj boksa (IBA). Kiraŭnik IBA pradstaŭnik Rasii Umar Kramloŭ zajaviŭ, što ŭ adchilenych spartsmienak hienietyčnyja testy nibyta vyjavili mužčynski nabor chramasom XY.
Adnak Mižnarodny alimpijski kamitet dapuściŭ Chielif da ŭdziełu ŭ hulniach u Paryžy. Dyrektar MAK pa kamunikacyjach Mark Adams, tłumačačy pazicyju arhanizacyi, padkreśliŭ, što hiendarny test Chielif nie byŭ zakonnym. Jon adznačyŭ, što ŭ pracesie ŭziaćcia ŭzoraŭ była masa parušeńniaŭ, «pačynajučy z samoj kancepcyi i zakančvajučy tym, jak infarmacyju pra ich raspaŭsiudzili na publicy».
Iman Chielif naradziłasia žančynaj i zapisana ŭ pašparcie jak žančyna. U Ałžyry, pry hetym, kateharyčna zabaronieny apieracyi pa źmienie połu.
Pa słovach Chielif, paśla skandału ź jaje ŭdziełam u Alimpijskich hulniach jaje trenier zabaraniŭ joj karystacca sacyjalnymi sietkami i čytać naviny.
«Daj Boh, kab hety kryzis zaviaršyŭsia załatym miedalom. Heta budzie najlepšym adkazam. Paśla šumichi ŭ ŚMI i paśla pieramohi była sumieś radaści i sumu. Sapraŭdy kažučy, zusim nialohka prachodzić praz takoje. Heta niešta, što topča čałaviečuju hodnaść», — kazała spartoŭka ŭ intervju.
Kamientary
Chramasomy nie tyja? Dyk heta ad pryrody. Naturalnaja pieravaha. Davajcie ŭ baskietboł nie dapuskać usich vyšejšych za 180 sm rostam. Bo ŭ ich pieravaha nad bolš nizkimi. A to moža jašče śpiecyjalna nohi i ruki naroščvajuć..