Jon budzie padtrymlivać Donalda Trampa.
Niezaležny kandydat Robiert Kienedzi-małodšy prypyniŭ svaju pieradvybarčuju kampaniju na pasadu prezidenta ZŠA. Pra heta jon abviaściŭ u piatnicu, vystupajučy pierad žurnalistami ŭ štacie Aryzona.
Kienedzi paviedamiŭ, što nie moža praciahvać svaju kampaniju z-za karupcyi ŭ orhanach ułady, u pryvatnaści Demakratyčnaj partyi, i z-za cenzury, jakoj viadučyja ŚMI padvierhnuli jaho vybarčuju kampaniju. Jon zajaviŭ, što padtrymaje kandydata ad Respublikanskaj partyi Donalda Trampa, paviedamlaje Hołas Amieryki.
Pa słovach Robierta Kienedzi, jon nie spyniaje, a tolki prypyniaje svaju pieradvybarčuju kampaniju. Jon skazaŭ, što jaho imia zastaniecca ŭ vybarčych biuleteniach u mnohich štatach, ale nie ŭ dziesiaci tak zvanych štatach, što «vahajucca».
Kienedzi zajaviŭ, što ŭ takich štatach, jak Aryzona, Nievada i Džordžyja, jon moh by paŭpłyvać na vynik vybaraŭ na karyść demakrataŭ, adnak choča hetaha paźbiehnuć, bo razychodzicca z demakratami pa mnohich ideałahičnych pazicyjach.
«Šmat miesiacaŭ tamu ja paabiacaŭ amierykanskamu narodu, što vyjdu z honki, kali stanu spojleram, — nahadaŭ Robiert Kienedzi-małodšy svaim vybarščykam. — Spojler — heta kandydat, jaki źmienić vynik vybaraŭ, ale sam nie maje šancaŭ pieramahčy. U maim sercy ja bolš nie vieru, što ŭ mianie jość realny šaniec pieramahčy na vybarach, z-za bieśpierapynnaj, sistemnaj cenzury, jakoj mianie padviarhajuć ŚMI. Tak što ja nie mahu z čystym sumleńniem kazać siabram svajoj vybarčaj kamandy i vałancioram praciahvać dzień i noč pracavać, abo prasić u sponsaraŭ, kab jany praciahvali davać mnie hrošy. Ja nie mahu im ščyra skazać, što ŭ mianie jość realny šlach u Bieły dom».
Spačatku Kienedzi bałatavaŭsia jak demakrat, ale, ź jahonych słoŭ, kiraŭnictva Demakratyčnaj partyi staviła pieraškody jahonaj pieradvybarnaj kampanii, bo jon pajšoŭ suprać ich hałoŭnaha kandydata — Džo Bajdena. Tady Kienedzi vyrašyŭ iści jak «niezaležny». Za toje, kab jaho imia trapiła ŭ vybarčyja biuleteni, jamu davodziłasia zmahacca ŭ kožnym štacie. U Ńju-Jorku sud jamu ŭ hetym admoviŭ.
Kienedzi sabraŭ kala miljona podpisaŭ vybarščykaŭ i zaručyŭsia padtrymkaj 5% adsotkaŭ nasielnictva. Jaho palityčnyja pohlady pryciahvali i levych, i pravych: jon byŭ suprać dapamohi Ukrainie, ale za padtrymku Izraila; suprać zabaronaŭ na aborty, ale za achovu paŭdniovych miežaŭ krainy ad prytoku imihrantaŭ.
Pavodle jaho ŭłasnych słoŭ, dla jaho ideałahična samymi važnymi źjaŭlajucca try pazicyi: prablemy sa svabodaj słova ŭ ZŠA; vajna va Ukrainie; chraničnyja zachvorvańni i atłuścieńnie ŭ dziaciej, raspaŭsiudžvańniu jakich spryjaju finansavyja intaresy bujnych farmaceŭtyčnych karparacyj i karparacyj charčovaj pramysłovaści. Kienedzi ličyć, što pa hetych pytańniach pazicyi Donalda Trampa jamu bližej, čym pazicyi demakrataŭ.
Prezidenckija vybary ŭ ZŠA projduć 5 listapada. Supierniki — vice-prezident Kamała Charys i 45-y prezident ZŠA Donald Tramp.
Kamientary