Žycharam Miadzielščyny, jakija katavali ziemlaka raspalenym prasam, dali niemały termin
Straści razharelisia z-za carskaj maniety.
2 vieraśnia sud Miadzielskaha rajona razhledzieŭ kryminalnuju spravu da dvuch žycharoŭ vioski Brusy, piša Kraj.by.
Pra abstaviny kryminalnaj spravy raspavioŭ namieśnik prakurora Miadzielskaha rajona Andrej Havieta.
— Uviečary 15 maja abvinavačanyja vypivali. Padčas razmovy adzin raskazaŭ, što pakul byŭ na pracy ŭ Minsku, chtości razabraŭ jahonyja vadzianyja pompy. Jany vykazali zdahadku, što da hetaha moža być datyčny ich adnaviaskoviec. Paśla mužčyny ŭspomnili, što ŭ taho viaskoŭca jość załataja manieta 10 rubloŭ 1899 hoda vypusku. Raśpivajučy śpirtnoje, jany vyrašyli zabrać manietu, kab pradać za 2000 rubloŭ.
Abvinavačanyja pryjšli dadomu da paciarpiełaha. Mužčyna ŭ toj viečar byŭ u stanie ałkaholnaha apjanieńnia i navat spaŭ. Niahledziačy na heta, jaho pabudzili i pradjavili pretenzii nakont pompaŭ. Kali mužčyna zajaviŭ, što nie datyčny da kradziažu, stali patrabavać ad jaho addać załatuju manietu.
— Pieršyja dvoje mužčynaŭ nanieśli adnaviaskoŭcu siem udaraŭ rukami pa tułavie i pa hałavie, a taksama dva ŭdary draŭlanaj pałkaj. Paciarpieły nie pryznavaŭsia, dzie znachodzicca załataja manieta.
Tady jany, vyjaviŭšy ŭ domie pras, uklučyli jaho ŭ razietku. Adzin z mužčyn ahaliŭ cieła paciarpiełaha i trymaŭ. Druhi zrabiŭ nie mienš za 10 kantaktaŭ pavierchniaj raspalenaha prasa z tvaram i žyvatom. Tym nie mienš paciarpieły tak ničoha i nie paviedamiŭ adnaviaskoŭcam pra manietu, — raspavioŭ Andrej Havieta.
U vyniku mužčyna atrymaŭ termičnyja apioki tvaru, hrudnoj kletki i piaredniaj brušnoj ścienki roznaj stupieni płoščaj 8% ad usioj pavierchni cieła. Taksama ŭ paciarpiełaha była zafiksavanyja hiematoma ślizistaj abałonki ŭ ščočnaj vobłaści sprava, rany ŭ pajaśničnaj vobłaści, siniaki na levym plačy, usio heta paciahnuła rasstrojstva zdaroŭja na čatyry miesiacy.
U sudovym pasiadžeńni abodva žychary Miadzielskaha rajona pryznali svaju vinu ŭ poŭnym abjomie.
Sud Miadzielskaha rajona pryznaŭ mužčyn vinavatymi ŭ ździajśnieńni złačynstva, praduhledžanaha častkaj druhoj artykuła 207 Kryminalnaha kodeksa Respubliki Biełaruś, i pryznačyŭ kožnamu ź ich pakarańnie ŭ vyhladzie pazbaŭleńnia voli na termin 8 hadoŭ z adbyvańniem pakarańnia ŭ papraŭčaj kałonii ŭzmocnienaha režymu sa štrafam 100 bazavych vieličyń (4000 rubloŭ).
Kamientary