Tajamnicy «doma baleryn» u Minsku, dzie kvatery kaštujuć bolš za $100 tysiač
«Domam baleryn» nazyvajuć dom №5, što pa vulicy Ałaizy Paškievič u stalicy. Nievialiki čatyrochpaviarchovy dom staŭ manumientalnym fonam Vialikaha teatra, piša «Kamsamolskaja praŭda».
Kvatery kaštujuć bolš za 100 tysiač dalaraŭ
U hetym domie ŭsiaho tolki 27 kvater, i tamu ŭ prodažy jany byvajuć nie časta. U minułym hodzie vystaŭlali 5-pakajovuju kvateru, byłuju kamunałku, ahulnaj płoščaj bolš za 100 kv.m. Jana kaštavała kala 185 tysiač dalaraŭ pa kursie.
Ciapier u prodažy dvuchpakajovyja kvatery. Adna ź ich amal 58 kv. m ahulnaj płoščy (žyłaja — 45, 5 kv.m.). Haścioŭnia i kuchnia sumieščanyja, a ŭ vannaj jość akno. U kvatery zrobleny dobry ramont, jaje košt — 570 tysiač rubloŭ (kala 180 tysiač dalaraŭ).
Jašče adna dvuchpakajoŭka z vydatnym ramontam płoščaj 56,3 kv.m. (žyłaja — 40,8 kv. m.) vystaŭlenaja za 399 tysiač rubloŭ (kala 126 tysiač dalaraŭ).
Na miescy doma byŭ Trajecki rynak
Na tym miescy, dzie staić dom i teatr, jašče ŭ 1920-ja byŭ burlivy Trajecki rynak. Ale bazar tam začynili i pačali budaŭnictva sučasnych budynkaŭ: žyłych damoŭ, a potym i Vialikaha teatra, jaki stvorany pa prajekcie architektara Iosifa Łanhbarda.
Ciapierašni dom №5 spačatku pabudavali na 12 kvater, a ŭ 1935-m prybudavali treci padjezd. Teatr tady jašče tolki ŭzvodzili, a adkryli jaho ŭ 1939-m.
Padčas vajny dom byŭ častkova razburany. Ale jaho nie źnieśli, bo žyllovaje pytańnie stajała vielmi vostra, a adnavili ŭžo ŭ styli savieckaha nieakłasicyzmu, jaki tady byŭ u modzie. Dom byŭ zdadzieny dla rabotnikaŭ Vialikaha teatra.
Z-za deficytu čyhunu ŭ domie doŭhi čas nie było vannaŭ. Až da 70-ch hadoŭ žychary byli vymušanyja chadzić u łaźniu. Ułasnyja vannyja pakoi žychary stali ŭzvodzić zamiest piečak na kuchniach. Pakolki ŭłaśnikam davodziłasia rabić vybar pamiž paŭnavartasnym sanvuzłom i jomistaj kuchniaj, apošnija ŭ mnohich kvaterach atrymalisia zusim nievialikimi.
Basia Karpiłava vystupała na scenie z žyvoj kazoj
U domie žyli mnohija znakamityja artysty, jakim hledačy apładziravali na śpiektaklach Vialikaha teatra.
Baleryna Basia Karpiłava (dziavočaje proźvišča Rozienbłat) da vajny słužyła ŭ Maskoŭskim muzyčnym teatra im. K. S. Stanisłaŭskaha i Uł. I. Niemiroviča-Dančanki, a padčas vajny vystupała ŭ składzie frantavych bryhad. Paśla pieramohi pryniała zaprašeńnie pierajechać u Minsk. U 1949 hodzie Basia vyjšła zamuž za Viktara Karpiłava — biełaruskaha telerežysiora. Na scenie Vialikaha teatra Basia Karpiłava tancavała ŭsie viadučyja partyi ŭ repiertuary.
Cikava, što adrazu paśla vyzvaleńnia Minska artysty žyli ŭ teatry. I Basia ź siamjoj taksama. A adzin z susiednich pakojaŭ byŭ pieradadzieny kazie. Reč u tym, što ŭ balecie «Eśmieralda» hałoŭnaja hierainia ŭ adnym z epizodaŭ vychodzić na scenu z kazoj.
U plejadzie zorak, jakija prybyli ŭ teatr paśla vyzvaleńnia Biełarusi, była i baleryna Nina Mładzinskaja. Dziaŭčyna z dvaranskaj siamji da revalucyi skončyła Pietrahradskaje chareahrafičnaje vučylišča, vučyłasia ŭ vialikich, tych, kaho nazyvajuć zasnavalnikami ruskaha baleta.
U Minsk Nina pryjechała, kali joj było ŭžo 42 hady, ale jašče 10 hadoŭ vystupała na scenie.
Zasłužanaja artystka BSSR vykonvała viadučyja partyi, a paśla zvalnieńnia z teatra stała vykładčycaj, jakuju vučni ŭspaminajuć z udziačnaściu.
Žyŭ u hetym domie i lehiendarny Siamion Drečyn, narodny artyst BSSR. Jon naradziŭsia ŭ 1915-m i pracavaŭ u teatry z dnia jaho zasnavańnia. Drečyn — pieršy viadučy tancoŭščyk Vialikaha teatra. Jon prajšoŭ šlach ad majstra sceny da baletmajstra.
Skandał na abłasnoj alimpijadzie pa niamieckaj movie. Dyrektar škoły, dzie vučycca pieramožca, adkazaŭ chiejtaram25
Kamientary