Raps, jaki vyvozicca z akupavanych ukrainskich terytoryj, pierapracoŭvajuć u Biełarusi

Žurnalisty-rasśledavalniki dakazali, što ekspartam nasieńnia rapsu z Chiersonščyny zajmajucca kampanii, źviazanyja z asiarodździem čačenskaha lidara Ramzana Kadyrava, partyjaj «Adzinaja Rasija» i ich partniorami ŭ Biełarusi. Pra detali hetaha biznesu im raskazali niepasrednyja ŭdzielniki rapsavych ździełak.

Ukrainskija chakiery z supolnaści KibOrg pieradali žurnalistam BRC danyja rasijskaj Fiederalnaj dziaržaŭnaj infarmacyjnaj sistemy «Zierno», kudy pavodle rasijskaha zakanadaŭstva tavaravytvorcy abaviazany ŭnosić źviestki ab ździełkach.

Ź ich vynikaje, što ŭsiaho tavarasupravadžalnych dakumientaŭ aformili na 4,9 tysiačy ton rapsu. Heta pastaŭki ŭ Biełaruś, jakija zarehistravanyja na aficyjnym sajcie Ministerstva sielskaj haspadarki Rasii abo zhadvalisia pry znosinach z pradstaŭnikami kampanij-eksparcioraŭ.

Pavodle źviestak BRC, paśla pačatku poŭnamaštabnaj vajny i akupacyi Chiersonščyny rasijanie zmusili da supracoŭnictva kiraŭnika i suzasnavalnika miascovaha paśpiachovaha ŭ vyroščvańni rapsu TAA «Śvitanak» Siarhieja Maksimienku.

Hetaja haspadarka pradavała nasieńnie rapsu rasijskamu TAA «Torhtriejd». Usiaho ŭ 2023 hodzie hetaja kampanija vyviezła 113 partyj nasieńnia azimaha rapsu ahulnaj vahoj 2,6 tys. ton, bolšaja častka jakich pryznačałasia dla pastavak pa istotna nižejšych za rynkavyja ceny biełaruskamu AAT «Novajelnianski mižrajahrazab».

Źviazacca ź fiermieram Siarhiejem Maksimienkam BRC nie ŭdałosia, ale zatoje ichni žurnalist pahavaryŭ z dyrektaram TAA «Torhtriejd» Vadzimam Alaksiejevym. Toj paćvierdziŭ, što asnoŭnyja abjomy nasieńnia słaniečnika i rapsu jahonaja firma sapraŭdy biare z akupavanych ukrainskich terytoryj, prytym raskazaŭ i pra niekatoryja asablivaści biznesu, źviazanyja ź nieabchodnaściu atrymlivać propuski i davać chabary.

Na pytańnie pra rynki, na jakija kampanija pracuje, Alaksiejeŭ adkazaŭ: «U mianie — Respublika Biełaruś».

«Torhtriejd» — kampanija, zarehistravanaja ŭ 2022 hodzie ŭ Hroznym, farmalna vałodaje joj 77-hadovaja Roza Achmiedaŭna Małajeva. Ale na telefonnyja zvanki na paznačany nibyta jaje numar adkazvaje Tamierłan Bierykchanaŭ, jaki pradstaŭlajecca «haspadarom niepasredna ŭsiaho hetaha, i Biełarusi ŭ tym liku». Udałosia vyśvietlić, što Bierykchanaŭ blizka znajomy z čačenskim biznesmienam i palitykam Zurabam Isajevym, jaki, u svaju čarhu, blizki da Ramzana Kadyrava. 

Na pytańnie, kamu ŭ Biełarusi pastaŭlaje raps kampanija «Torhtriejd», Tamierłan Bierykchanaŭ adkazaŭ: «U Biełarusi my viaziem da siabie na pradpryjemstva. My viaziem nie dla prodažu-pieraprodažu. My viaziem da siabie na pradpryjemstva…, naš zavod, «Tryjał Ekśpiert».

Adras vytvorčaści aleju, paznačany na sajcie TAA «Tryjał Ekśpiert», supadaje ź jurydyčnym adrasam AAT «Novajelnianski mižrajahrazab « (Dziatłaŭski rajon, pasiołak Navajelnia, Čapajeva 21). Na momant vychadu materyjału apošniaje znachodziłasia ŭ pracedury bankructva.

U Adzinym dziaržaŭnym rehistry jurydyčnych asob i indyvidualnych pradprymalnikaŭ ułaśnikam kampanii «Tryjał Ekśpiert» prapisany nie Tamierłan Bierykchanaŭ, a dvoje biełarusaŭ: eks-hruzčyk Alaksiej Bahucki i były namieśnik dyrektara pa budaŭnictvie ŭ «Jeŭrahandli» Ihar Jakubovič.

Ale kali žurnalistka BRC patelefanavała Jakuboviču, kab nibyta zaprasić jaho na kanfierencyju, toj adkazaŭ, što intaresy kampanii «moža pradstavić» Tamierłan Bierykchanaŭ. U jaho taksama ŭdałosia daviedacca, što «Tryjał Ekśpiert», akramia prodažy aleju ŭ Biełarusi, ekspartuje jaho ŭ inšyja krainy, u pryvatnaści ŭ Izrail i ŭ Małajziju.

Inšaja firma, źviazanaja z pastaŭkaj rapsu z akupavanaj Ukrainy ŭ Biełaruś — zarehistravanaje ŭ 2023 hodzie maskoŭskaje TAA «Ahrotriejd», hienieralnym dyrektaram jakoha źjaŭlajecca Anton Cichamiraŭ, jaki sam pachodzić z Kryma i byŭ paśpiachovym biznesmienam va Ukrainie, ale paśla anieksii paŭvostrava staŭ aktyŭna supracoŭničać z akupacyjnaj administracyjaj, budučy ŭ tym liku i kiraŭnikom jałcinskaha adździaleńnia partyi «Adzinaja Rasija».

TAA «Ahratrejd» fihuruje ŭ dakumientach na 30 pastavak nasieńnia rapsu ahulnym abjomam 671,8 tys. ton dla «Navabielickaha kambinata chlebapraduktaŭ» i TAA «Ahrapradukt». Adno ź miescaŭ pachodžańnia pradukcyi — miascovaść u akupavanaj Chiersonskaj vobłaści.

Žurnalist BRC źviazaŭsia z Antonam Cichamiravym, pradstaviŭšysia čynoŭnikam z Chiersonskaj vobłaści, kab pahavaryć pra pastaŭki zbožža z akupavanaj terytoryi ŭ Biełaruś. Ale toj skazaŭ, što ŭ jaho i tak usio idzie vielmi dobra.

Siarod pastaŭščykoŭ sielhaspradukcyi ŭ danych sistemy «Zierno» fihuruje jašče adna kampanija, jakaja zajmałasia vyvazam rapsu z akupavanych terytoryj Ukrainy ŭ Biełaruś — TAA «Viales-Ahra».

Usiaho ŭdałosia znajści 53 partyi zbožža rapsu ahulnaj vahoj 1171 tona, jakija pryznačalisia dla biełaruskich pradpryjemstvaŭ TAA «Ahrapradukt» i ZAT «Abłrapsahraservis». Kiraŭnikom i adzinym zasnavalnikam «Viales-Ahra» ličycca hramadzianin Kyrhyzstana Siarhiej Vierchašynski.

Z samim «Viales-Ahra» źviazacca žurnalistam nie ŭdałosia, ale dyrektar «Torhtriejd» Vadzim Alaksiejeŭ, kali pra hetu firmu pry im zhadali, nie staŭ piarečyć, kali rasśledavalnik nazvaŭ pracu «Viales-Ahra» «dziejnaściu zvyčajnych pierakupaŭ».

Raps z Chiersonščyny ŭ Biełaruś vyvozili nie tolki kampanii, ale i indyvidualnyja pradprymalniki. U 2023 hodzie IP Łukjančanka Alaksiej Jurjevič z Barnauła pavinien byŭ pastavić dzieviać partyj nasieńnia hetaj kultury ahulnaj vahoj 289,3 tony filijału Biełaruskaha AAT «Homielchlebapradukt» «Navabielicki KCHP». Usie partyi sfarmavanyja ŭ krasaviku 2023 hoda ŭ pasiołku Navatroickaje Chiersonskaj vobłaści. Nivodzin ź dziesiaci źviazanych ź imieniem Łukjančanki telefonnych numaroŭ nie byŭ dziejnym.

• 1
• 0
• 0
• 1
• 0
• 0
• 6
• 0