Što prapanavać Łukašenku za palitviaźniaŭ? Sprečka Stryžaka z Chomič

Temaj novaha vypusku jutub-kanała «Mnie taksama nie padabajecca» staŭ los palitviaźniaŭ. Asablivaja sprečka razharełasia pamiž kiraŭnikom «Bajsoła» Andrejem Stryžakom i Taćcianaj Chomič, siastroj Maryi Kaleśnikavaj.

Ci patrebna nam dapamoha rasijskich libierałaŭ u vyzvaleńni palitviaźniaŭ

Padčas dyskusii Taćciana Chomič adznačyła jak pazityŭny fakt toje, što da pytańnia vyzvaleńnia biełaruskich palitviaźniaŭ dałučylisia rasijskija libieralnyja koły.

«Nam patrebna lubaja dapamoha. I kali jany zmohuć stać hołasam, danieści hetuju infarmacyju ŭ vyšejšych palityčnych kołach mižnarodnym partnioram, to heta vydatna», — adznačyła žančyna.

Z takoj pazicyjaj kateharyčna nie pahadziŭsia Andrej Stryžak. 

«Zaraz rasijski naratyŭ moža padyści da hetaha takim čynam, što «voś my jak drennaja vialikaja Rasija narabili spraŭ i my za heta adkaznyja, a ciapier my jak nie mienš vialikaja i impierskaja dobraja Rasija budziem dapamahać voś hetym niaščasnym biełarusam, jany ž sami nie spraviacca».

U hetym jon bačyć «čarhovuju infarmacyjnuju kampaniju, jakaja nakiravana chutčej dla taho, kab palepšyć svaje ŭłasnyja pazicyi, adciahnuć uvahu ad niejkich čysta rasijskich prablem, źviazanych, naprykład, z vajnoj, i pasprabavać pahulać na poli biełaruskich palitviaźniaŭ».

Addaŭšy rasijanam pytańnie vyzvaleńnia biełaruskich palitviaźniaŭ, ličyć Stryžak, my «viartajemsia ŭ naratyŭ, što ruskija buduć adkazvać za ŭsio, što adbyvajecca ŭ našym rehijonie».

«Jany dziejničajuć va ŭłasnych intaresach. Voś takoje majo dakładnaje pierakanańnie», — padkreśliŭ kiraŭnik «Bajsoła».

Što možna prapanavać Łukašenku ŭ abmien na vyzvaleńnie palitviaźniaŭ

Padčas dyskusii Andrej Stryžak adznačyŭ, što biełaruskija demakratyčnyja siły nie mohuć ničoha prapanavać Łukašenku ŭ abmien na vyzvaleńnie palitviaźniaŭ.

Takija razmovy Taćciana Chomič nazvała niekanstruktyŭnymi. Jana źviarnuła ŭvahu, što pobač z sankcyjami jość i inšyja pytańni, vyrašeńnie jakich moža paŭpłyvać na situacyju z palitviaźniami.

«Ja havaryła pra punkty propusku albo adnaŭleńnie złučeńnia. Kali heta (zakryćcio miežaŭ — NN) było zroblena ŭ 2020 hodzie praz kavid, čamu zaraz heta jašče aktualna? (…) Kali my možam dabicca pry hetym vyzvaleńnia ludziej i jašče palapšeńnia situacyi dla biełarusaŭ unutry, ja tolki za».

Viadučaja pieradačy Ženia Suhak zhadała «miechanizm imidžavych ustupak»:

«Chtości patelefanavaŭ Łukašenku, chtości sustreŭsia z Łukašenkam. Dla jaho taksama važna chacia b častkovaje pryznańnie jaho lehitymnaści na Zachadzie. Nie abaviazkova ŭvieś piroh addavać. Časam navat chopić niejkaha tvitu ŭ jaho padtrymku, ci zhadki, ci pryjezdu Ryžankova na jakoje-niebudź mierapryjemstva ŭ Jeŭropie».

Taćciana Chomič zaŭvažyła, što čuła ad adnaho dypłamata, što «zvanki, niejkija sustrečy, razmovy — heta faktyčna pavietra». Takija dziejańni ničoha nie kaštujuć, i, «mahčyma, u vačach zachodnich palitykaŭ heta nie budzie lehitymizacyjaj» Łukašenki. U toj ža čas takija kroki mohuć dapamahčy vyzvaleńniu.

Jašče adnu mahčymaść Chomič bačyć va ŭklučeńni biełaruskich palitviaźniaŭ u śpisy dla abmienu pamiž Rasijaj i Zachadam.

Siastra Kaleśnikavaj adznačaje, što jaje šmathadovy vopyt kamunikacyi ź mižnarodnymi partniorami, dypłamatami, arhanizacyjami pakazaŭ, što asnoŭnaja prablema — u palityčnaj voli Zachadu prapanavać štości Łukašenku. Ciapier, kali jon pačaŭ vypuskać palitviaźniaŭ, jakraz spryjalny momant dla demakratyčnych siłaŭ prabudzić hetu volu, miarkuje jana.

Ci možna havaryć z Łukašenkam

Andrej Stryžak ličyć, što vyzvaleńnie Łukašenkam častki palitviaźniaŭ nie pavinna paŭpłyvać na stratehiju demakratyčnych sił, bo «ŭłada nie stała ni kryšačku lehitymniejšaj, ni humańniejšaj ci dabrejšaj, albo śviatlejšaj ad taho, što jana prosta adnaŭlaje status-kvo dla niespraviadliva asudžanych ludziej, u jakich adabrali hady žyćcia».

«Stratehija zastajecca raniejšaj — vitańnie taho, što ludzi vychodziać na svabodu, ale pastajannaje nahadvańnie ab tym, što situacyja stratehična nie źmianiłasia».

Kiraŭnik «Bajsoła» nie pahadziŭsia ź mierkavańniem ab tym, što ničoha nie kaštuje zvanok Łukašenku ci pazityŭny tvit pra jaho:

«Jon kaštuje. Kaštuje dla tych ludziej, dla jakich pazicyja pryncypaŭ źjaŭlajecca kaštoŭnaj, dla jakich pryncyp nie supracoŭničać, nie ŭzajemadziejničać z terarystam, jaki zachapiŭ całkam uładu, źjaŭlajecca niečym značnym. Pieramovy ŭ hetaj situacyi mohuć iści ŭ tym vypadku, kali Łukašenka admaŭlajecca ad svaich praktyk. (…)

Maja pazicyja tut budzie dakładnaj i paśladoŭnaj — pieramovy mahčymy tady, kali Łukašenka budzie hatovy da ich. Pakul jon da ich nie hatovy», — padkreśliŭ Stryžak.

Jon vykazaŭsia, što adzinaje, čaho dakładna choča Łukašenka, heta kapitulacyi svaich apanientaŭ, bolš vyraznych sihnałaŭ niama.

«Jon žadaje źniavahi, jon žadaje poŭnaha padparadkavańnia ŭsich, u tym liku i tych, chto vyjechaŭ za miažu. (…)

Pryjazdžajcie, kajciesia, paŭzicie na kaleniach, i tady ja padumaju, daruju vam. Voś hety miesiedž hučyć ad jaho vielmi vyrazna, kali my havorym pra sihnały. Usie astatnija sihnały ad jaho hučać u mnohich, mnie zdajecca, prosta ŭ hałovach, a nie ad jaho samoha», —

emacyjna vykazaŭsia kiraŭnik «Bajsoła».

• 16
• 1
• 2
• 2
• 0
• 0
• 0
• 0