Taćciana Chomič raskazała pra stan zdaroŭja Maryi Kaleśnikavaj
«Ja bajusia za jaje žyćcio. Tamu što ŭsiamu jość miaža».
U novym vypusku TOKu suzasnavalnica Asacyjacyi svajakoŭ i byłych palitźniavolenych Taćciana Chomič raskazała pra stan zdaroŭja svajoj siastry Maryi Kaleśnikavaj.
Jak viadoma, u listapadzie 2022 hodzie Maryja Kaleśnikava pieraniesła apieracyju na straŭniku z-za prabadnoj jazvy.
Watch on TikTok
«Jana była ŭ ŠIZA. Pačała siabie drenna adčuvać. Tam było vielmi choładna. Jana nie mahła spać. Paśla hetaha mleła. U jaje pačaŭ baleć žyvot. Niekalki dzion [supracoŭniki] uvohule nijak nie reahavali, pakul nie skončyŭsia termin znachodžańnia ŭ ŠIZA. Dziesiać sutak jana tam adbyła. Heta kaniec listapada, i tam vielmi choładna. I ja z žacham dumaju pra nastupnuju zimu. Tamu što my viedajem, što Mašu ŭsio roŭna pieryjadyčna źmiaščajuć u ŠIZA», — raskazvaje Chomič.
Pa jaje słovach, sama Maša paśla apieracyi raskazvała advakatu, što zhubiła niedzie 15 kiłahramaŭ. «Maša davoli vysokaja — mietr siemdziesiat piać rostam. Vaha narmalnaja — heta 65-70 kiłahram. To-bok jana tady ŭžo zhubiła šmat», — zaŭvažaje Taćciana.
Jak tłumačyć Chomič, strata vahi źviazanaja z tym, što Maryja niekalki tydniaŭ paśla apieracyi nie mahła jeści turemnuju ježu:
«Ja dumaju, što jany sprabavali niejak jaje pakarmić, ale heta było marna. I jana praciahvała hublać vahu. I na toj momant dazvolili zrabić dyjetyčnuju pieradaču — piure ŭsich vidaŭ». I hetaja pieradača, pa słovach Taćciany, była apošniaj.
«My čuli, što šmat z taho, što tam jość, jana nie moža jeści, tamu što ježa dastatkova hrubaja. Jana prostaja, i, kab zrabić jaje kałaryjniejšaj, tudy dadajuć kombitłušč. Jak ja razumieju, tam jość nievialikaja kolkaść miasa, ryby. Ale hetaha niedastatkova nasamreč. I tam toje, što jana jeści nie moža».
Taćciana raskazvaje, što ŭmovy ŭtrymańnia ŭ PKT praduhledžvajuć, što možna patracić adnu ci dźvie bazavyja vieličyni (40-80 biełaruskich rubloŭ) u miesiac na nabyćcio ježy i pradmietaŭ hihijeny.
Ale padrabiaznaściej rodnyja nie viedajuć, bo z Mašaj ź lutaha 2023 hoda niama nijakaj suviazi. Da ich dachodziać tolki ŭryŭki infarmacyi ad tych, chto vyjšaŭ z kałonii ŭ roznyja pieryjady.
Ad byłych viaźniaŭ stała viadoma, što Maryju Kaleśnikavu jak minimum adzin raz advozili ŭ haradskuju balnicu ŭ Homieli. Ale bolš nijakich padrabiaznaściej pra heta.
«Dakładna možna skazać, što ŭtrymańnie ŭ turmie vielmi mocna padarvała jaje zdaroŭje. U jaje raniej nie było prablem z straŭnikam», — zaŭvažaje Chomič.
Žančyna raskazvaje, što nie atrymałasia pravieryć infarmacyju ab tym, što Maša stała važyć 45 kiłahram.
«Ja vielmi spadziajusia, što heta spynicca ŭ bližejšy čas. (…) Ciapier ja bajusia za jaje žyćcio. Tamu što ŭsiamu jość miaža», — havoryć Taćciana.
Jana vielmi chvalujecca za toje, jak na Maryju paŭpłyvaje stan inkamunikada.
«Ja čuła taki kamientaryj niekalki miesiacaŭ nazad, što Maša chutka razvučycca razmaŭlać. (…) Potym, kali byŭ abmien pamiž Rasijaj i Zachadam, u adnym ź intervju Uładzimir Kara-Murza havaryŭ ab tym, što jamu było vielmi składana razmaŭlać. (…)
I tut ja zrazumieła, što heta sapraŭdy vialikaja prablema — što budzie dalej. Heta ŭsio ž taki ŭpłyvaje jašče i na kahnityŭnyja zdolnaści. I ŭmovy ŭtrymańnia ŭ biełaruskich turmach bolš žorstkija, jany ciažejšyja. U rasijskich nie było takoj poŭnaj izalacyi».
«Jana važyć 45 kiłahramaŭ, i heta pry jaje roście ŭ 175». Siastra Maryi Kaleśnikavaj padzialiłasia apošnimi źviestkami pra jaje
«Siońnia hety kašmar možna spynić». Siastra Maryi Kaleśnikavaj zaklikała zabiaśpiečyć palitźniavolenaj nieabchodnaje charčavańnie
Čamu Viktar Babaryka zrabiŭ staŭku na Maryju Kaleśnikavu?
Ciapier čytajuć
«Pucin nie viedaŭ, što heta vyljecca ŭ takuju vajnu». Hałoŭnaje ź intervju Łukašenki17
Kamientary