ABSIE znajšła pazityŭ va ŭkazie ab rehulavańni internetu

Dakumient užo nakiravany biełaruskim uładam. U im pieraličanyja jak stanoŭčyja, tak i admoŭnyja momanty ŭkaza z punktu hledžańnia mižnarodnych ekśpiertaŭ u halinie svabody vykazvańnia.

Pra heta havorycca ŭ Rehularnaj spravazdačy, jakuju Pradstaŭnik pa svabodzie ŚMI ABSIE Mikłaš Charašci padrychtavaŭ dla Pastajannaj Rady Arhanizacyi pa biaśpiecy i supracoŭnictvie ŭ Jeŭropie. Spravazdača pradstaŭlenaja 4 sakavika.

Pavodle analizu ekśpiertaŭ ABSIE, ukaz prezidenta Biełarusi №60 «Ab zachadach pa ŭdaskanaleńni vykarystańnia nacyjanalnaha siehmientu sietki Internet», padpisany 1 lutaha 2010 hoda, utrymlivaje šerah stanoŭčych momantaŭ,

— infarmacyja ab orhanach ułady i inšych dziaržaŭnych ustanovach budzie bolš dastupnaja hramadzianam (u tym liku žurnalistam), pakolki pałažeńni ŭkaza praduhledžvajuć adkaznaść hetych ustanoŭ za raźmiaščeńnie infarmacyi pra svaju dziejnaść na ich sajtach;

— aŭtarskaje prava ŭ Internecie budzie abaronienaje;

— pravajdery Internet-pasłuh buduć prachodzić dziaržaŭnuju rehistracyju pavodle zajaŭnaha pryncypu;

— pravajdery Internet-pasłuh nie buduć adkazvać za infarmacyju, raźmieščanuju ŭ Internecie.

«Što tyčycca hetych spryjalnych pałažeńniaŭ ukaza, mnohaje budzie zaležyć ad taho, jak jany buduć prymianiacca, — havorycca ŭ spravazdačy. — Pravavy instrumient, jaki budzie prymianiacca, pavinien vyklučać niebiaśpieku abmiežavańnia svabody Internetu ŭ Biełarusi».

Hałoŭnyja padstavy dla zaniepakojenaści, jakuju vykazali ekśpierty ABSIE, tyčacca nastupnych pałažeńniaŭ ukaza:

— Ukaz abaviazvaje ŭładalnikaŭ i administrataraŭ internet-kłubaŭ i internet-kaviarniaŭ pravodzić identyfikacyju ich naviedvalnikaŭ, zachoŭvać hetyja zapisy i asabistyja dadzienyja karystalnikaŭ. Hetkaje ž praviła prymianiajecca da techničnych srodkaŭ karystalnikaŭ Internet-pasłuh, jakija vykarystoŭvajucca dziela padklučeńnia da Internetu.

— Niezrazumieła, chto i jak budzie vyznačać sutnaść infarmacyi, u dačynieńni da jakoj budzie atrymany zapyt na abmiežavańnie dostupu. Vyznačeńnie typaŭ škodnaj infarmacyi pavodle biełaruskaha zakanadaŭstva dazvalaje pravavuju dvuchsensoŭnaść katehoryj.

— U vypadku niemahčymaści vykanańnia zahadu adpaviednaha orhana pa vypraŭleńni parušeńniaŭ ci pierapynieńni akazańnia Internet-pasłuh, adkaznaść za źmiest pierachodzić na pravajderaŭ Internet-pasłuh, ŭładalnikaŭ i administrataraŭ punktaŭ kalektyŭnaha karystańnia Internetam.

— Pieralik infarmacyi, jakaja musić być raźmieščanaj na veb-sajtach orhanaŭ ułady i inšych dziaržaŭnych ustanovaŭ, vielmi abmiežavany.

— Ukaz patrabuje, kab u materyjałach ŚMI, jakija raspaŭsiudžvajucca praź Internet, utrymlivalisia hipierspasyłki na pieršakrynicu infarmacyi. Heta źjaŭlajecca dadatkovym patrabavańniem da redakcyj, jakoje nie moža być vykanana ŭ vypadku, kali pieršakrynicaj nie źjaŭlajecca krynica ŭ Internecie.

Prymajučy da ŭvahi vyšejadznačanaje i toj fakt, što kankretnyja praviły prymianieńnia pałažeńniaŭ ukaza buduć raspracavanyja da 1 traŭnia, ekśpiert ABSIE vykazaŭ šerah rekamiendacyj, jakija adpaviadajuć abaviazalnictvam ABSIE ŭ halinie svabody ŚMI. Voś pieralik hetych rekamiendacyj:

— admianić abaviazkovuju identyfikacyju karystalnikaŭ Internet-pasłuh i ich techničnych srodkaŭ padklučeńnia da Internetu;

— rastłumačyć značeńnie i praceduru ŭviadzieńnia abmiežavańniaŭ i zabaronaŭ na raspaŭsiud zabaronienaj infarmacyi;

— rastłumačyć śfiery adkaznaści pravajderaŭ Internet-pasłuh u vypadku niemahčymaści vykanańnia zahadu adpaviednaha orhana pa vypraŭleńni parušeńniaŭ ci pierapynieńni akazańnia Internet-pasłuh;

— razhledzieć mahčymaść patrabavańnia da orhanaŭ ułady i inšych dziaržaŭnych ustanovaŭ publikavać infarmacyju nie tolki ab ich dziejnaści, ale i ab vynikach hetaj dziejnaści;

— admianić patrabavańnie ŭklučać hipierspasyłki na pieršakrynicu infarmacyi ŭ materyjałach ŚMI, jakija raspaŭsiudžvajucca praź Internet.

«Ja spadziajusia, što hetyja prapanovy buduć uličanyja pry dalejšaj raspracoŭcy zakanadaŭstva, jakoje tyčycca Internetu ŭ Biełarusi, — adznačyŭ Mikłaš Charašci. — Moj ofis praciahnie dapamahać Biełarusi ŭ refarmavańni zakanadaŭstva ab srodkach masavaj infarmacyi. My hatovyja razam ź biełaruskimi ŭładami arhanizavać kruhły stoł pa pytańniach zakanadaŭstva ŭ halinie Internet».

• 0
• 0
• 0
• 0
• 0
• 0
• 0
• 0