CHAMAS adpuściŭ jašče dvuch izrailcian. Siarod ich — baćka rudych chłopčykaŭ, jakija stali simvałam trahiedyi 7 kastryčnika
U adkaz Izrail pavinien vyzvalić 180 paleścinskich źniavolenych, piša Bi-bi-si.
Heta ŭžo čaćviorty abmien z momantu, kali pieramirje ŭstupiła ŭ siłu 19 studzienia. Napiaredadni CHAMAS pieradaŭ Izrailu imiony troch zakładnikaŭ, usie jany — mirnyja žychary.
Jak paviedamiŭ CACHAŁ, užo vyzvaleny i pieradadzieny Izrailu:
54-hadovy Ofir Kalderon — jaho zachapili ŭ kibucy Nir-Oz razam z dvuma dziećmi (dzieci ŭžo byli vyzvalenyja raniej);
35-hadovy Jarden Bibas, jakoha zachapili razam z žonkaj Šyry i dvuma dziećmi — čatyrochhadovym Aryelem i dziesiacimiesiačnym Kfiram (ich uzrost na momant vykradańnia).
Kfir Bibas staŭ samym maleńkim zakładnikam CHAMAS. Pa darozie ŭ Hazu siamju razłučyli, i Jarden Bibas utrymlivaŭsia asobna ciaham paŭtara hoda.
Taksama čakajecca vyzvaleńnie 65-hadovaha Kita Sihieła, jaki maje hramadzianstva ZŠA i Izraila. Jon byŭ zachopleny razam z žonkaj Avivaj u kibucy Kfar-Aza. Avivu vyzvalili jašče ŭ listapadzie 2023 hoda.
Pavodle Reuters, u ramkach hetaha abmienu Izrail pavinien vyzvalić 182 palestynskich źniavolenych i zatrymanych.
Rudavałosyja chłopčyki Aryel i Kfir Bibas stali simvałami baraćby za vyzvaleńnie zakładnikaŭ u Izraili i va ŭsim śviecie. Ich fatahrafii zapoŭnili sacyjalnyja sietki i pieršyja pałosy haziet.
U 2023 hodzie CHAMAS zajaviŭ, što dzieci i ich maci zabityja, ale izrailskaja vajennaja raźviedka nie paćvierdziła hetuju infarmacyju.
18 studzienia 2024 hoda tysiačy ludziej u roznych haradach Izraila vyjšli z aranžavymi pavietranymi šarami, kab adznačyć pieršy dzień narodzinaŭ Kfira. Kali chłopčyk jašče žyvy, to dva hady jamu taksama spoŭniłasia ŭ pałonie.
U sieradu izrailskija ŚMI paviedamili, što ŭłady Izraila zapatrabavali ad CHAMAS raźjaśnieńniaŭ nakont losu siamji Bibas.
Kali Aryel i Kfir jašče žyvyja, to jany zastajucca apošnimi dziećmi-zakładnikami ŭ Hazie.
Jany pavinny byli być vyzvalenyja jašče ŭ listapadzie 2023 hoda ŭ ramkach šaścidzionnaha pieramirja, abo ŭ pieršaj hrupie vyzvalenych paśla katarskaha pahadnieńnia ŭ studzieni 2024 hoda.
Kali ž jany sapraŭdy zahinuli, heta moža stać mahutnym arhumientam dla tych, chto patrabuje ad Izraila nie spyniać apieracyju ŭ Hazie da poŭnaha źniščeńnia CHAMAS.
Takija patrabavańni hučać jak siarod izrailskaha nasielnictva, tak i ŭradavych kołaŭ.
Dzied chłopčykaŭ, Eli Bibas, napiaredadni vyzvaleńnia svajho syna Jardena skazaŭ:
«Ja starajusia nie zahraznuć u płyni čutak, supiarečlivych navin i paŭpraŭdy. Ja prosta čakaju».
Kamientary