«Naša Niva – Sovietskaja Biełoruśsija»

Z rapartu aperatyŭnaha ahienta 0375 (licenzija na aryšt za łajanku) u Kamitet De Be:

25 žniŭnia, vykonvajučy zadańnie, intehryravaŭsia ŭ natoŭp na Banhałory. Kab uvajści ŭ kantakt z destruktyŭnymi elementami, u adpaviednaści ź instrukcyjami, hučna jenčyŭ: «Padymi mianie pa-nad ziamloju» i «Piatroŭna, padaj vady!». U vyniku paznajomiŭsia z padazronymi asobami, jakija niešta kazali pra sotuju hadavinu niejkaj «Našaj Nivy». Pakolki instrukcyjaŭ aryštoŭvać apazycyjaneraŭ za kalekcyjanavańnie starych aŭtamabilnych marak, prynamsi «Nivy», nie było, nikoha nie pavinciŭ. Prašu na budučyniu infarmavać, ci padpadaje hetaja praktyka pad artykuły Administracyjnaha kodeksu.

Ahient 0375

Z paviedamleńnia kiraŭnictva Kamitetu De Be ŭ administracyju kiravańnia prezydentam:

Infarmujem, što nacyjanalistyčnymi kołami planujeca šyrokaje śviatkavańnie stohadovaha jubileju hazety «Naša Niva», jakoje budzie mieć šyroki rezanans u hramadztvie. Prapanujem preventyŭna aryštavać kalektyŭ redakcyi na toj padstavie, što ŭ ramkach śviatkavańnia admarozki planujuć raspaŭsiudzić nakład hazety, staronki jakoha buduć pramočanyja jadam kurare (trochlitrovy słoik z atrutaj padkiniem na redakcyjnuju kuchniu). Akramia taho, u dzień jubileju žurnalisty planujuć zachapić vakzał, poštu i telehraf, a taksama uzarvać dźvie škoły z rasiejskamoŭnym navučańniem.

Staršynia Kamitetu De Be

Vypis z pratakołu pasiedžańnia idealahičnaha departamentu administracyi:

Słuchali temu «Stahodździe «Našaj Nivy». Tav.A infarmavaŭ ab tym, jakuju pahrozu niasie pravakacyja našaniŭcaŭ. Tav.B prapanavaŭ zabaranić «Našu Nivu» i adnačasova zarehistravać paralelnaje vydańnie z toj samaj nazvaj. Takim čynam, usie laŭry historyi «NN» pierapaduć dziaržavie.

Tav.V, spasyłajučysia na brak času, prapanavaŭ puścić vutku, što zakonnym naščadkam «NN» jość adno ź isnych ciapier aficyjnych vydańniaŭ. Jon arhumentvaŭ prapanovu nastupnymi słovami: «Kali my ŭsie tut zhodnyja z tym, što Skaryna žyŭ u Piciery, to davieści toje, što «Fizkulturnik Biełarusi» pačaŭ vydavacca ŭ 1906 h., budzie raz plunuć. Schod padtrymaŭ prapanovu tav.S.

Kiraŭniku dziaržavy prapanavany śpis vydańniaŭ, jakija mohuć vykanać funkcyju «sapraŭdnaha naščadka «NN». Śpis hazetaŭ dadajecca: «Pieriechodnyj vozrast», «Sojuz» – dadatak da «SB», «Płanieta», «Traktarabudaŭnik».

Z rezalucyi kiraŭnika:

Zahadvaju šyroka adśviatkavać stahodździe «NN», jakaja siońnia vychodzić pad nazvaj dadatak da «Saŭbiełki» «Sojuz». Pryznačyć navukovuju kamisiju z staršyniom – akademikam K.

Ź dziońnika Aliny K.:

Darahi dziońnik, siońnia tata pryjšoŭ dachaty niejki dziŭny. Uvieś viečar piŭ i kryčeŭ, što jany tam na Marksa kančatkova źjechali z hłuzdu. I što kali tak pojdzie dalej, to jaho prymusiać pisać paemu Bykava. Potym pazvaŭ mianie, kab ja napisała pad dyktoŭku dziŭny tekst.

Ź pieradavicy hazety «Sovietskaja Biełoruśsija»:

Niezvyčajnaje adkryćcio zroblena maładymi archivistami ŭ domie, dzie, jak vyśvietliłasia, kaliści spyniaŭsia adzin z zasnavalnikaŭ «Našaj Nivy» Anton Łuckievič. Jak śviedčyć list, niečakana znojdzieny ŭ antrysolach, nasamreč sapraŭdnaja nazva słavutaj «Našaj Nivy» – «Sojuz» – datatak da «Biełaruś Siehodnia».

U svaim liście da Vacłava Łastoŭskaha Łuckievič piša: «Darahi siabra, jak ty viedaješ, my aktyŭna pracujem nad pieršaj biełaruskaj hazetaj. Na schodzie redakcyi ŭsie adzinadušna padtrymali ideju, što hazeta musić nasić nazvu «Sojuz» – dadatak da hazety «Sovietskaja Biełoruśsija», a siabie, to bok vydaŭcoŭ, nazyvać Savietam ministraŭ Sajuznaj dziaržavy. Adnak u apošni momant dziela kanśpiracyi vyrašyli časova nazyvacca «Naša Niva».

Raznaradka mienskim adziełam BRSM:

Usim rajonnym kiraŭnikam zabiaśpiečyć jaŭku jak minimum pa 5 asobaŭ ad klasy ci hrupy na śviatkavańnie stahodździa «Našaj Nivy». Zbor – Kastryčnickaja płošča. Ahitpradukcyja – transparanty z tekstam «Słava bratam Łuckievičam», «Sojuzu» žyć u viakach!» – vydać pad raśpisku. Tych, chto prasačkuje, abaviazać padpisacca na dva kamplekty hazety «Naša Niva – Sovietskaja Biełoruśsija».

Staršynia mienskaj arhanizacyi BRSM

• 0
• 0
• 0
• 0
• 0
• 0
• 0
• 0