«Ja spytaŭ: «Što, chalera jasnaja, vy abmiarkoŭvali cełych 5 hadzin?»
Prezident ZŠA Donald Tramp, vystupajučy ŭ izrailskim parłamiencie, raskazaŭ niekatoryja padrabiaznaści pra sustreču jaho śpiecpasłańnika Styva Uitkafa z Uładzimiram Pucinym, piša Rerform.
Tramp raskazvaŭ pra ludziej, jakija byli datyčnymi da zaklučeńnia damoŭlenaściaŭ pa pieršaj fazie mirnaha płana pamiž Izrailem i CHAMAS. U vyniku ŭstupiła ŭ siłu spynieńnie ahniu, siońnia byli vyzvaleny 20 izrailskich zakładnikaŭ, jakija zastalisia ŭ žyvych. U svaju čarhu Izrail vyzvaliŭ amal 2 tysiačy paleścinskich źniavolenych.
Prezident ZŠA paraŭnaŭ Uitkafa z Hienry Kisindžaram, jaki «nie dapuskaje ŭciečak». Jon padkreśliŭ, što Uitkaf unios vialiki ŭkład u praces urehulavańnia.
Tramp znoŭ skazaŭ, što spynić vajnu Rasii suprać Ukrainy budzie praściej, čym dasiahnuć spynieńnia ahniu na Blizkim Uschodzie.
«Ja arhanizavaŭ jamu sustreču z prezidentam Pucinym, dumajučy, što heta budzie 15‑chvilinnaja abo 20‑chvilinnaja sustreča. Styŭ paniaćcia nie mieŭ pra Rasiju, nie nadta što viedaŭ pra Pucina, niašmat viedaŭ pra palityku, nie byŭ u joj zacikaŭleny. Jon byŭ sapraŭdy dobry ŭ nieruchomaści, ale ŭ jaho była taja jakaść, jakuju ja šukaŭ, i ja nie bačyŭ jaje ŭ inšych», — skazaŭ Tramp.
Kali Uitkaf sustrakaŭsia z Pucinym, Tramp patelefanavaŭ praz paŭhadziny paśla pačatku sustrečy, raźličvajučy, što jana skončyłasia. Adnak jamu skazali, što jana praciahvajecca.
Toje ž samaje paŭtaryłasia praz hadzinu, dźvie i try hadziny. Praz čatyry hadziny jamu dałažyli, što, mahčyma, Uitkaf chutka vyjdzie.
«I praź piać hadzin jon vyjšaŭ. Ja spytaŭ, pra što, chalera jasnaja, vy razmaŭlali piać hadzin? I jon skazaŭ: pra šmat što cikavaje. My prosta havaryli šmat pra što cikavaje, u tym liku pra toje, navošta jon tudy pryjšoŭ. Ale pra heta nielha havaryć piać hadzin. Možna havaryć pra heta peŭny pieryjad času, i ty viedaješ, što atrymaješ. Ale heta talent. Heta talent, kali ty možaš tak rabić. Bolšaść ludziej, jakich ja b pasłaŭ, pa-pieršaje, ich by nie pryniali, pa-druhoje, kali b i pryniali, sustreča doŭžyłasia b piać chvilin. I voś što adbyvajecca sa Styvam. Jaho ŭsie lubiać. Jaho lubiać z hetaha boku. Jaho lubiać z taho boku. I jon sapraŭdy taki. Jon vydatny pieramoŭščyk, tamu što jon vydatny chłopiec», — skazaŭ Tramp.
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku32
Kamientary