Były pasoł Polščy ŭ Biełarusi — u centry siamiejna-špijonskaha skandału

Što pavinien zrabić dypłamat, kab śpiecsłužby pryznali jaho niazdolnym hodna reprezientavać svaju krainu? U jakim vypadku asabistaje žyćcio moža stać pryčynaj pazbaŭleńnia dostupu da važnaj dziaržaŭnaj infarmacyi? Hetyja pytańni niečakana źmianili žyćcio adnaho z tvorcaŭ biełaruskaj palityki Polščy — byłoha pasła ŭ Biełarusi (1998–2002) i byłoha vice-dyrektara Uschodniaha departamientu polskaha MZS Maryjuša Maškieviča.

Historyja pačałasia jašče tady, kali Maškievič kiravaŭ polskim dypłamatyčnym pradstaŭnictvam u Biełarusi, piša hazieta «Žečpaspolita». Pierajechaŭšy ŭ Minsk razam z žonkaj i čatyrma dziećmi, jon nieŭzabavie kardynalna źmianiŭ svajo žyćcio, u jakim źjaviłasia biełaruska Kaciaryna. U vyniku spadarynia Maškievič ź dziećmi viarnułasia ŭ Varšavu.

U savieckija časy taki rezki pavarot ŭ asabistym žyćci, biezumoŭna, adrazu kaštavaŭ by dypłamatu karjery, kali nie horš. Suviaź dypłamata z zamiežnaj hramadziankaj była vyklučanaja. A tym bolš z hramadziankaj krainy, jakaja znachodzicca ŭ varožych adnosinach z tvajoj. Adnak demakratyja na toje i demakratyja. Spadar Maryjuš viarnuŭsia ŭ Polšču paśla zakančeńnia svajho čatyrochhadovaha terminu i spačatku navat pajšoŭ na pavyšeńnie pa karjernaj leśvicy. Maškievič mieŭ vialiki ŭpłyŭ na farmavańnie biełaruskaj palityki Polščy, a taksama na palityku ES ŭ dačynieńni da našaj krainy.

Mienavita ź inicyjatyvy Maškieviča adbyłasia sustreča ministra zamiežnych spraŭ Polščy Radasłava Sikorskaha ź jaho biełaruskim kaleham Siarhiejem Martynavym u Biełaviežskaj puščy. Paśla čaho Polšča ŭziała kurs na vyvad Biełarusi ź izalacyi. Navat kali dla taho prychodziłasia zapluščvać vočy na razhrom Sajuza palakaŭ i represii suprać biełaruskaj apazicyi.

Tolki praź niekatory čas haziety, radyjo i telebačańnie zhadali imia Maryjuša Maškieviča ŭžo ź inšaj nahody — kontrvyviedka Polščy pazbaviła jaho dostupu da važnaj dziaržaŭnaj infarmacyi. Dla dypłamata takoha ŭzroŭniu heta aznačaje kaniec karjery. Pryčym kaniec biassłaŭny.

Jakimi byli pryčyny hetaha kroku polskich śpiecsłužb? Kampramietujučaja suviaź ź biełaruskaj abo pravał palityki dyjałohu ź biełaruskimi ŭładami?

Kali Maškievič staŭ pratestavać suprać rašeńnia Ahienctva ŭnutranaj biaśpieki (ABW), u haziety trapiła jahonaja siamiejnaja historyja. Akazvajecca, biełaruska, jakuju Maškievič vydavaŭ za svaju žonku, była jahonaj… mačachaj. Pavodle dakumientaŭ, jana zamužam za jahonym baćkam, a jaje dzicia ličycca pa dakumientach dziciem baćki Maškieviča.

Polskija śpiecsłužby paličyli, što taki niezvyčajny marjaž moh dać biełaruskim śpiecsłužbam mahčymaść dla šantažu. Ci ŭžo daŭ? «My nikoli nie prymajem rašeńnia pa hipatetyčnych pahrozach, a zaŭždy hruntujemsia na realnym materyjale», — abciakalna adkazała na hetaje pytańnie pres-sakratara ABW.

Reč u tym, što fiktyŭny šlub z metaj atrymać hramadzianstva — heta ŭžo złačynstva. A złačynstva, u adroźnieńnie ad kachańnia, nie darujecca.

Polskaja kontrvyviedka dakładnych kamientaroŭ u takich spravach nie daje, spasyłajučysia na intaresy dziaržavy. Niezrazumiełym zastajecca, ci biełaruski KDB moh upłyvać na M.Maškieviča, ci, naadvarot, spryčyniŭsia da zaviaršeńnia karjery dypłamata.

Na apošniaje namiakaje sam Maškievič. Jon raskazvaje, što, kali ŭ sakaviku 2006 h. pryvatna pryjechaŭ u Minsk, kab uziać udzieł u pratestach na Płoščy, jaho aryštavali razam ź inšymi ŭdzielnikami namiotavaha miastečka. I ŭžo na Akreścina čałaviek u cyvilnym paśla dopytu nahadaŭ na raźvitańnie: «My ciabie i ŭ tvajoj Polščy dastaniem».

Zrešty, tajamnicy supravadžajuć lubuju spravu, u jakoj zamiešanyja asoby takoha ŭzroŭniu. Tym bolš, kali sprava hetaja nastolki intymnaja.

«Heta praŭda, — pryznaje Maškievič u intervju «Žečpaspolitaj». — Žanićba z baćkam zdavałasia vielmi dobraj idejaj. Tak lahčej było atrymać polskaje hramadzianstva, jakoje nam było treba. Ale, kali łaska, nie pišycie, što heta fiktyŭny šlub, bo moj baćka moh sapraŭdy ŭ jaje zakachacca. Moža być, usia situacyja krychu šakavała aficeraŭ ABW, jakija pachodziać ź nievialikich miastečkaŭ i źjaŭlajucca ludźmi kansiervatyŭnymi. Zrešty, ja j sam čałaviek kansiervatyŭny».

• 0
• 0
• 0
• 0
• 0
• 0
• 0
• 0