Naŭsieda: Dyjałoh ź Minskam mahčymy, tolki kali Biełaruś prajavić susiedskuju dobruju volu
Paśla zakliku Džona Koŭła adnavić suviazi ź Minskam prezident Litvy zajaviŭ, što dyjałoh pamiž krainami mahčymy tolki tady, kali «druhi bok demanstruje dobruju volu da raźvićcia dobrasusiedskich adnosin». Adnak ciapier jon takoj «dobraj voli» z boku Biełarusi nie bačyć.
Pasłańnik ZŠA raniej u intervju LRT adznačyŭ, što Vašynhton chacieŭ by, kab Litva i Biełaruś «pačali vyrašać prablemy, jakija ŭźnikajuć pamiž imi, kab možna było adkryć handal pamiž dźviuma krainami, adkryć handal ź Jeŭropaj i Złučanymi Štatami».
Tym časam prezident Litvy padkreśliŭ, što pytańnie sankcyj suprać Biełarusi vyrašajecca na ŭzroŭni Jeŭrapiejskaha sajuza, paviedamlaje LRT.
«Pierš za ŭsio chaču źviarnuć uvahu — ja skazaŭ heta i śpiecpradstaŭniku, — što pytańnie ŭhnajeńniaŭ vyrašajecca na ŭzroŭni Jeŭrapiejskaha sajuza. Zusim niadaŭna sankcyi byli padoŭžany jašče na 12 miesiacaŭ. Jany byli ŭviedzienyja značna raniej i źviazany nie stolki ź ciapierašnimi hibrydnymi atakami, kolki z parušeńniami pravoŭ čałavieka, ź nielehitymnymi prezidenckimi vybarami 2020 hoda. I, biezumoŭna, z faktyčnym udziełam Biełarusi ŭ rasijskaj ahresiŭnaj vajnie suprać Ukrainy», — zajaviŭ jon.
Džon Koŭł vykazaŭ nadzieju, što Litva pahodzicca pravieści dvuchbakovuju sustreču ź Biełaruśsiu na ŭzroŭni vice-ministraŭ. Adnosiny ZŠA i Biełarusi paciapleli paśla viartańnia Donalda Trampa ŭ Bieły dom. U abmien na vyzvaleńnie palityčnych źniavolenych Vašynhton asłabiŭ uviedzienyja suprać Minska sankcyi. Aŭtarytarny prezident Biełarusi na hetym tydni taksama daŭ «zialonaje śviatło» vyjezdu litoŭskich hruzavikoŭ ź Biełarusi.
«Toje, što adbyvajecca ciapier, padobna na pryncyp «ciahni-šturchaj». U adnym miescy nibyta demanstrujecca niejkaja ŭjaŭnaja dobraja vola, choć ciažka ŭsprymać heta jak znak dobraj voli, kali, možna skazać, niezakonna spynienyja i zatrymanyja našy litoŭskija hruzaviki viartajucca. Atrymlivajecca, što ty jašče pavinien dziakavać za toje, što niezakonna kanfiskavanuju reč tabie viartajuć», — adznačyŭ Naŭsieda.
Prezident Litvy taksama asprečyŭ śćviardžeńnie Džona Koŭła pra toje, što prablema šaroŭ z kantrabandaj vyrašana. Pavodle słoŭ Naŭsiedy, hetuju prablemu pakul vyrašyć nie ŭdałosia.
«Niadaŭnija ataki z vykarystańniem šaroŭ, na žal, abviarhajuć zdahadki, pra jakija kazaŭ pavažany spadar Koŭł, što prablemu šaroŭ u cełym udałosia vyrašyć. Na žal, jaje vyrašyć nie ŭdałosia, i heta navat demanstratyŭna pakazvajecca — adrazu paśla adjezdu śpiecyjalnaha ŭpaŭnavažanaha ź Biełarusi», — zajaviŭ jon.
«Usio heta dazvalaje dumać, što pakul my nie bačym dobraj voli z boku Biełarusi. Ja b skazaŭ, što mahčymaści dla dyjałohu źjaŭlajucca tady, kali druhi bok demanstruje žadańnie raźvivać — nakolki heta mahčyma — dobrasusiedskija adnosiny. Kali na praciahu peŭnaha času my budziem bačyć, što situacyja stabilnaja i što biełaruski režym sapraŭdy nie stvaraje pramych pahroz Litvie, tady kantakty i dyjałoh na peŭnym uzroŭni mahčymyja. Mienavita hetaha ja i chacieŭ by pažadać», — skazaŭ kiraŭnik litoŭskaj dziaržavy.
Premjer-ministarka Inha Ruhinienie zajaviła, što Litva razhledzić prapanovu pasłanca ZŠA pa Biełarusi Džona Koŭła pravieści sustreču ź Biełaruśsiu na ŭzroŭni vice-ministraŭ, adnak dla hetaha isnujuć niekalki ŭmoŭ. Pry hetym kiraŭnica ŭrada padkreśliła, što tranzit biełaruskich uhnajeńniaŭ z amierykanskim pasłancam nie abmiarkoŭvaŭsia — dla hetaha niama ŭmoŭ, bo ciapier dziejničajuć sankcyi Jeŭrapiejskaha sajuza.
Ciapier čytajuć
Pratasievič znoŭ ženicca — ciapier z tarołaham Nastaśsiaj, jakaja pracavała ŭ elitnym miedcentry «Miersi»40
Kamientary