Hety małaviadomy vostraŭ trapiŭ u top miescaŭ dla padarožžaŭ u 2026 hodzie
Niekalki daviednikaŭ i vydańniaŭ uklučyli hrečaski vostraŭ Ias u śpis rekamiendavanych miescaŭ dla padarožžaŭ u 2026 hodzie — dziakujučy jaho žyvoj kultury i dzikaj, mała zakranutaj čałaviekam pryrodzie.
Uvahu na jaho źviarnuli, bo ŭsio bolš padarožnikaŭ šukajuć aŭtentyčnyja, małaviadomyja miescy, piša Delfi.
Upłyvovaje brytanskaje vydańnie The Times uklučyła stalicu vostrava Choru ŭ śpis «25 samych pryhožych viosak Hrecyi». Heta tradycyjnaje pasielišča začaroŭvaje naviedvalnikaŭ biełymi damami kubičnaj formy i vuzkimi stromkimi vułačkami.
Adno ź miescaŭ, jakoje abaviazkova varta naviedać na Iasie — carkva Panahija Hramijotysa. Jana staić u samym vysokim punkcie vostrava, adkul adkryvajucca ŭražvalnyja vidy na Ehiejskaje mora. Taksama tam jość dahistaryčnaje pasielišča Skarkas, jakoje adnosicca da III tysiačahodździa da našaj ery, i mahiła Hamiera.
Italjanski turystyčny partał WomTravel.it, jaki analizuje sučasnyja moładzievyja turystyčnyja tendencyi, taksama rekamienduje Ias. Pavodle źviestak partała, maładoje pakaleńnie ŭsio čaściej vybiraje miescy, dzie možna atrymać šmathranny vopyt — nasyčanaje hramadskaje žyćcio, aktyŭny adpačynak na pryrodzie i kulturnyja adkryćci.
Vostraŭ taksama ŭvajšoŭ u štohadovy śpis najlepšych hrečaskich astravoŭ, jaki składajecca francuzskim turystyčnym hidam Petit Fute. Adznačajecca, što na Ias možna dabracca pa mory ź inšych hrečaskich astravoŭ. Naprykład, kali adpravicca ź Iraklijona na Krycie, marskoje padarožža zojmie kala 2,5 hadziny. Kali vy budziecie dabiracca z vostrava Mikanas, daroha zojmie 2 hadziny. Samy karotki šlach na Ias — z Santaryni: jon zajmaje ŭsiaho 45 chvilin. Turystyčnyja ahienctvy adznačajuć, što na vostravie Ias niama aeraporta.
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić
Kamientary