Zialenski: Rasija trojčy zdymała avijabazy ZŠA ŭ Saudaŭskaj Aravii pierad udaram Irana
U vyniku ŭdaru pa avijabazie byli paranienyja 12 amierykanskich vajskoŭcaŭ i źniščany darahi amierykanski samalot dalokaha radyjołakacyjnaha vyjaŭleńnia i kiravańnia AWACS.
Prezident Ukrainy Uładzimir Zialenski zajaviŭ, što Rasija trojčy ažyćciaŭlała spadarožnikavuju zdymku avijabazy ZŠA ŭ Saudaŭskaj Aravii za niekalki dzion da taho, jak Iran nanios udar pa hetym abjekcie i paraniŭ amierykanskich vajskoŭcaŭ, piša «Ukrainskaja praŭda».
Padčas intervju NBC News Zialenski padzialiŭsia vytrymkaj z štodzionnaj spravazdačy, jakuju jon atrymlivaje ad ukrainskich śpiecsłužbaŭ.
U spravazdačy adznačałasia, što rasijskija spadarožniki zrabili zdymki avijabazy «Prync Sułtan» u Saudaŭskaj Aravii 20, 23 i 25 sakavika.
27 sakavika Iran nanios udar pa bazie, na jakoj dysłakujucca amierykanskija i saudaŭskija vojski. Pavodle źviestak amierykanskich čynoŭnikaŭ, u vyniku ŭdaru byli paranienyja 12 amierykanskich vajskoŭcaŭ. SMi paviedamili taksama, što byŭ źniščany darahi amierykanski samalot dalokaha radyjołakacyjnaha vyjaŭleńnia i kiravańnia AWACS.
Zielenski adznačyŭ, što, zychodziačy z vopytu Ukrainy, nieadnarazovaje fatahrafavańnie abjektaŭ Rasijaj na praciahu niekalkich dzion źjaŭlajecca prykmietaj padrychtoŭki da napadu.
«My viedajem, što kali jany robiać zdymki adzin raz, to rychtujucca. Kali robiać zdymki druhi raz, heta padobna na simulacyju. U treci raz heta aznačaje, što praz adzin-dva dni jany atakujuć», — skazaŭ jon.
U toj ža čas NBC News adznačaje, što Zialenski nie pryvioŭ dokazaŭ adnosna rasijskich spadarožnikavych zdymkaŭ, a taksama nie paviedamiŭ, jak Ukraina pra heta daviedałasia.
Zialenski zajaviŭ, što «na 100%» upeŭnieny: Rasija pieradaje takuju raźviedyvalnuju infarmacyju Iranu, kab dapamahčy jamu nanosić udary pa amierykanskich vojskach na Blizkim Uschodzie.
«Ja liču, što Rasija zacikaŭlenaja ŭ tym, kab dapamahać irancam. I ja nie vieru — ja viedaju — što jany abmieńvajucca infarmacyjaj… Ci dapamahajuć jany irancam? Viadoma. Na kolki pracentaŭ? Na sto pracentaŭ», — skazaŭ ukrainski prezident.
Jon taksama vykazaŭ mierkavańnie, što kiraŭnik Rasii Uładzimir Pucin spadziajecca na «doŭhuju vajnu na Blizkim Uschodzie».
«[Pucin] atrymlivaje vyhadu, niemałuju vyhadu, ad hetaj vajny», — skazaŭ Zialenski, pakazaŭšy na rost cen na naftu i časovuju admienu niekatorych amierykanskich sankcyj u dačynieńni da rasijskaj nafty, što aznačaje dadatkovyja dachody dla Kramla.
Kamientary