Byłoha supracoŭnika kontrraźviedki KDB aryštavali za zdradu dziaržavie
U SIZA KDB trapiŭ 51‑hadovy Rusłan Rasajeŭ, jaki zvolniŭsia z orhanaŭ u 2020 hodzie. Jon raskazvaŭ susiedziam pa kamiery, što niekali hulaŭ u KVZ i byŭ znajomy ź Zialenskim.
Pa infarmacyi Belpol, Rusłan Rasajeŭ słužyŭ u v/č 64171 (upraŭleńnie vajskovaj kontrraźviedki Kamiteta dziaržaŭnaj biaśpieki) z 2006 hoda.
Rasajeŭ naradziŭsia ŭ byłym vajskovym pasiołku Vietryna (Połacki rajon Viciebskaj vobłaści). Skončyŭ Suvoraŭskuju vajskovuju vučelniu, a paźniej i Vajskovuju akademiju.
Z momantu zvalnieńnia z kontrraźviedki ŭ 2020‑m Rasajeŭ aktyŭna pačaŭ vieści sacsietki, dzie dzialiŭsia šmatlikimi zdymkami z vandrovak: Maldyvy, Bali, Turcyja, Šviecyja, Azierbajdžan.
Na niekatorych fota pobač ź im možna zaŭvažyć Vadzima Hałyhina. Čałaviek, jaki pierasieksia z Rasajevym u kamiery SIZA KDB, raskazaŭ «Našaj Nivie», što toj raspaviadaŭ, jak niejki čas hraŭ u biełaruskim Kłubie viasiołych i znachodlivych — mahčyma, hetym i tłumačycca jaho znajomstva z Hałyhinym. Taksama Rasajeŭ śćviardžaŭ, što «viedaje Zialenskaha».
Pa apošniaj infarmacyi, Rasajeŭ u razvodzie. U jaho jość darosły syn.
Nieviadoma, u čym kankretna abvinavačvajuć Rasajeva — na karyść jakoj dziaržavie jon nibyta zdradžvaŭ Biełarusi. Nieviadoma, ci jość u jaho historyi palityčny składnik. Adnak u ciapierašnich abstavinach praktykujecca pryciahnieńnie pa hetym artykule byłych čynoŭnikaŭ i siłavikoŭ, jakija zvolnilisia paśla padziej 2020 hoda.
Pa artykule ab zdradzie dziaržavie moža pahražać ad 7 da 15 hadoŭ pazbaŭleńnia voli, a ŭ niekatorych vypadkach i śmiarotnaje pakarańnie.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary