Vizit Karła III u ZŠA skončyŭsia. Tramp nazvaŭ jaho najvialikšym karalom i admianiŭ pošliny na šatłandski viski

Čatyrochdzionny dziaržaŭny vizit karala Vialikabrytanii Karła III i karalevy Kamiły ŭ ZŠA skončyŭsia. Prezident ZŠA Donald Tramp na raźvitańnie nazvaŭ Karła «najvialikšym karalom» i abviaściŭ pra admienu pošlin na šatłandski viski, piša Bi-bi-si.

U čaćvier dniom pa miascovym časie karol Karł z žonkaj vylecieli z avijabazy Endrus pad Vašynhtonam na Bahamskija astravy — brytanskuju zamorskuju terytoryju ŭ Atłantyčnym akijanie, prykładna za 1300 km ad Vašynhtona.

U čaćvier, u apošni dzień vizitu, Donald Tramp z žonkaj uračysta pravodzili Karła i Kamiłu la Biełaha doma, zatym karaleŭskaja para ŭskłała vianok da pomnika Nieviadomamu sałdatu na Arlinhtonskich mohiłkach pad Vašynhtonam, paśla čaho pajechała na vuličnaje śviatkavańnie ŭ miastečka ŭ štacie Virdžynija.

Pravodziŭšy karaleŭskuju paru, Donald Tramp abviaściŭ u svajoj sacsietcy Truth Social, što ŭ honar karala i karalevy admianiaje niekatoryja pošliny na šatłandski viski. Maci Trampa, Mery Makłaŭd, była šatłandkaj.

«Ja admianiu taryfy i abmiežavańni na viski, jakija majuć dačynieńnie da mahčymaści Šatłandyi supracoŭničać z Supolnaściu Kientuki [aficyjnaja nazva štata Kientuki — Bi-bi-si] pa viski i burbonu. Dźvie vielmi važnyja haliny ŭ Šatłandyi i Kientuki, — abviaščaje post Trampa ŭ Truth Social.

— Karol i karaleva, navat amal i nie prosiačy pra heta, prymusili mianie zrabić niešta, što nichto nie moh prymusić. Heta vielizarny honar, što jany pryjechali ŭ ZŠA».

U adkaz na hetu navinu pradstaŭnik Bukinhiemskaha pałaca zajaviŭ, što karol vykazaŭ Trampu svaju «ščyruju padziaku» i «padnimie kielich» za prezidenta.

Pieršy ministr Šatłandyi Džon Suini nazvaŭ heta «ašałamlalnaj navinoj dla Šatłandyi» i skazaŭ, što ŭdziačny karalu za klučavuju rolu, jakuju jon syhraŭ.

Suini dadaŭ: «Štomiesiac šatłandskaja ekanomika hublała miljony funtaŭ».

Asnoŭnym pakupnikom vykarystanych bočak z-pad burbona z Kientuki źjaŭlajecca šatłandskaja industryja, jakaja štohod impartuje ich na sumu kala 200 miljonaŭ funtaŭ dla vytrymki šatłandskaha viski.

Ranicaj u čaćvier prajšła karotkaja cyrymonija raźvitańnia ŭ Biełym domie i pierad im.

«Cyrymonija pakazała roźnicu ŭ padychodach prezidenta i karala. Donald Tramp z zadavalnieńniem bałbataŭ pierad kamierami. Karol, padobna, prajaviŭ mienš entuzijazmu», — adznačyŭ karespandent Bi-bi-si.

Kali karaleŭskaja para źjechała, Tramp skazaŭ žurnalistam: «Vydatnyja ludzi! Nam u našaj krainie treba pabolš takich ludziej».

Padčas paziravańnia ŭčatyroch pierad Biełym domam Tramp pakazaŭ na Karła i skazaŭ: «Vydatny karol! Najvialikšy karol, jak pa mnie!»

Pośpiech ź nievyraznymi nastupstvami

Jak adznačajuć karespandenty Bi-bi-si, dla brytana-amierykanskich adnosin vizit karala prajšoŭ vidavočna paśpiachova, ale na kolki chopić hetaha pośpiechu, uličvajučy charaktar Trampa, zusim niezrazumieła.

Prezident ZŠA pa chodzie vizitu, 29 krasavika, zajaviŭ, u pryvatnaści, što ŭ amierykancaŭ niama bližejšych siabroŭ, čym brytancy.

Karol u pramovie ŭ Kanhresie ŭsialak padkreślivaŭ važnaść supracoŭnictva Łondana i Vašynhtona — u tym liku ŭ vajennaj śfiery i pa pytańni dapamohi Ukrainie.

Kamientatary z abodvuch bakoŭ sažałki [Atłantyčnaha akijana] paličyli vizit karala i karalevy dypłamatyčnym pośpiecham — ale pytańnie ab tym, ci zachavajecca hety pazityŭny nastroj paśla taho, jak karaleŭskaja para źjedzie […], zastajecca.

Raźvitaŭšysia z Trampam, Karł i Kamiła adpravilisia na tradycyjnaje ŭskładańnie vianka da pomnika Nieviadomamu sałdatu na vajennych Arlinhtonskich mohiłkach pad Vašynhtonam.

Zatym jany pajechali na «błok-paci», vuličnaje śviatkavańnie, u miastečka Front-Rojał adnosna niepadalok, u štacie Virdžynija. Tam ich sustrakała, u pryvatnaści, hubiernatar štata, člen Demakratyčnaj partyi Abihiejł Spanbierhier.

Karol i karaleva pahladzieli parad arkiestraŭ, tancavalnych hrup i staradaŭnich aŭtamabilaŭ i pakaštavali miascovyja prysmaki.

Zatym karaleŭskaja para jašče zazirnuła ŭ nacyjanalny park Šenandoa niedaloka ad Front-Rojał, dzie, u pryvatnaści, asabista paznajomiłasia z ptuškaj-simvałam ZŠA, biełahałovym arłanam.

I ŭžo paśla hetaha adpraviłasia na aeradrom.

Viečar ža sierady karaleŭskaja para praviała ŭ Rakfieler-centry, na śviatkavańni 50‑hodździa karaleŭskaha dabračynnaha fondu King's Trust, jaki dapamahaje dzieciam i maładym ludziam u navučańni i stvareńni biznesu.

U śviatkavańni ŭdzielničaŭ znakamity pop-śpiavak 1970‑ch i 1980-ch, a ciapier pasoł karaleŭskaha fondu va ŭsim śviecie Łajanieł Ryčy.

• 0
• 0
• 0
• 0
• 0
• 0
• 0
• 0